Mitsengo 36:1-13
-
Nayo xungetano hi kuchadha ka vavasati va nga zviga-tshomba (1-13)
36 A tihloko ta mingango ta vana va Gileyadhe, a n’wana wa Makira,+ a n’wana wa Manase, ta mingango ya vana va Josefa, ti no tshinela ti wulawula mahlweni ka Mosi ni ka tihosana, ku nga tihloko ta mingango ta va ka Izrayeli,
2 tiku: “Jehovha i leletele a hosi ya mina lezvaku yi avela a tiko hi tihlolo+ kota tshomba ka vaIzrayeli; Jehovha i leletele a hosi ya mina lezvaku a tshomba ya makabye wa hina Zelofehadhe yi nyikiwa a vanhanyana vakwe.+
3 Loku vo chadha ni vavanuna va tixaka tin’wani ta vaIzrayeli, a tshomba ya vavasati lava yi ta tekiwa tshombeni ya vapapayi va hina yi engetela a tshomba ya lixaka leli va to lumba lona. Hi ndlela leyo, a tshomba leyo yi ta tekiwa ka cipandze leci ci lumbako a tshomba ya hina.
4 Loku ku chikela a lembe ga Jubhilewu+ ka vanhu va ka Izrayeli, a tshomba ya vavasati lava yi ta engetela a tshomba ya lixaka leli va lumbako lona. Hi ndlela leyo, a tshomba yabye yi ta tekiwa ka tshomba ya vapapayi va hina.”
5 Hi kuleletela ka Jehovha, Mosi i no byela vaIzrayeli, aku: “Lezvi a lixaka la vana va Josefa li wulako hi zvona.
6 A cileletelo ca Jehovha xungetano hi vanhanyana va Zelofehadhe hi leci: ‘Va nga chadha ni wihi va mu tsakelako. Hambulezvo, va wa chadhe ni munhu wa ngango wa lixaka la papayi wabye.
7 Yi hava tshomba ya vaIzrayeli yi faneleko ku suka ka lixaka lin’we yiya ka lin’wani, hakuva a vaIzrayeli va fanele ku tshama ni tshomba ya lixaka la vakokwani vabye.
8 A nhanyana mun’we ni mun’wani loyi a nga ni tshomba cikari ka tixaka ta ka Izrayeli i fanele kuva sati wa wanuna wa laha lixakeni la papayi wakwe+ kasi a vaIzrayeli va tshama ni tshomba ya vakokwani vabye.
9 Yi hava tshomba ya vaIzrayeli yi faneleko ku suka ka lixaka lin’we yiya ka lin’wani, hakuva a tixaka ta ka Izrayeli ti fanele ku tshama ni tshomba ya tona wutsumbu.’”
10 A vanhanyana va Zelofehadhe va no maha zvalezvi Jehovha a nga leletele Mosi.+
11 Hikwalaho, Mahla, na Tirza, na Hogla, na Milka, na Nowa, a vanhanyana va Zelofehadhe,+ va no chadha ni vafana va vamakabye va papayi wabye.
12 Va no chadha ni vavanuna va mingango ya va ka Manase, a n’wana wa Josefa, kasi a tshomba yabye yi simama lixakeni la ngango wa papayi wabye.
13 Lezvi zvileletelo ni zviboho zva kulamula lezvi Jehovha a nyikileko vaIzrayeli hi nomu wa Mosi tivaleni ta Mowabhi, kusuhani ni Jordhani ni Jeriko.+
