Mitsengo 4:1-49
4 Makunu Jehovha i no wulawula na Mosi na Aroni, aku:
2 “Cikari ka vana va Levhi, tsalelani a vana va Kohate+ hi mingango yabye ni hi tiyindlu ta vapapayi vabye,
3 vontlhe lava va nga ni 30+ kuya ka 50 wa malembe,+ lava va nga ntlaweni lowu wu yimisilweko kasi ku tira lomu tendeni ga mutlhangano.+
4 “Lowu i ntiro wa vana va Kohate lomu tendeni ga mutlhangano.+ I nchumu wo basabasa.
5 Loku a wugovelo gi lava ku suka, Aroni ni vana vakwe va ta nghena va tlhatlha a kortina ga ku hambanisa+ va fenengeta hi gona a Arke+ ga Wukustumunyu.
6 Va ta fenengeta arke hi nguwo ya bhebhe ga macalo,* va andlala nguwo ya azuli hehla ka gona, va gumesa va tlhomeka mipingu ya gona+ wutshan’wini ga yona.
7 “Va ta tlhela va andlala a nguwo ya azuli hehla ka meza ya tipawa ta munyikelo,+ va tlhateka a mingelo, ni tikopo, ni zvingelwana, ni tijaro ta munyikelo wa zvakunwa;+ a munyikelo wo khandzakanya wa tipawa+ wu ta simama hehla ka meza.
8 Va ta andlala a nguwo yo pswhuka hehla ka zvibya lezvo, va fenengeta meza hi nguwo ya bhebhe ga macalo,* va gumesa va tlhomeka mipingu ya meza+ wutshan’wini ga yona.
9 Andzhako ka lezvo, va ta teka a nguwo ya azuli va fenengeta a nenge wa tikandiya+ ta kuwoninga, ni tikandiya ta kona,+ ni zvitimo* zva kona, ni zvibya zva kona zva ku woka hi zvona ndzilo,+ ni zvontlhe a zvibya zva kona zva ku chela mafura lawa ma tirisiwako kasi a tikandiya ti tshama na ti vhura.
10 Va ta phutsela a nenge wa tikandiya ni zvontlhe a zvibya zva wona hi nguwo ya bhebhe ga macalo* va wu vekela laha ka pingu.
11 Va ta andlala a nguwo ya azuli hehla ka alati ga ouro,+ va gi fenengeta hi nguwo ya bhebhe ga macalo,* va gumesa va tlhomeka a mipingu ya gona+ wutshan’wini ga yona.
12 Hi kulandzela, va ta teka a zvibya zvontlhe+ zva ntiro lezvi va zvi tirisako hi kukhandzakanya lomu wutshan’wini go basa va zvi chela ka nguwo ya azuli va zvi fenengeta hi nguwo ya bhebhe ga macalo,* va gumesa va zvi vekela laha ka pingu.
13 “Va ta susa khuma* laha alatini,+ va fenengeta a alati hi nguwo yo pswhuka.
14 Va ta veka hehla ka gona a zvibya zvontlhe lezvi va zvi tirisako a cikhati leci va tirako laha alatini: a zvibya zva ku woka hi zvona ndzilo, ni magarfo, ni mafoxola, ni zvingelwana — zvontlhe a zvibya zva alati.+ Va ta gi fenengeta hi nguwo ya bhebhe ga macalo,* va gumesa va tlhomeka mipingu ya gona+ wutshan’wini ga yona.
15 “A cikhati leci a vaIzrayeli va to suka ka wutshamu gin’we vaya ka gin’wani, Aroni ni vana vakwe va fanele ku ngha va mbhetile ku fenengetela a wutshamu go basa+ ni zvibya zvontlhe zva wutshamu go basa. A vana va Kohate va ta nghena va zvi rwala+ kanilezvi va nga henyi a wutshamu go basa, va ngafa.+ Lowu i ntiro* wa vana va Kohate wu yelanako ni tenda ga mutlhangano.
16 “Eleyazari,+ a n’wana wa mupristi Aroni, hi yena a faneleko ku wonelela a mafura ya ku wona hi wona,+ ni libani lo nuhela,+ ni munyikelo wa tindzhoho wo khandzakanya, ni mafura ya ku tota.+ Hi yena kambe a wonelelako a tabhernakeli gontlhe ni zvontlhe zvi nga ka gona, a ku patsa ni wutshamu go basa ni zvibya zva gona.”
17 Jehovha i no engeta a byela Mosi na Aroni, aku:
18 “Mu nga tsiki lixaka la mingango ya vaKohate+ li fuva cikari ka vaLevhi.
19 Kanilezvi va maheleni lezvi kasi va simama va hanya va ngafi hi ku tshinela ka zvilo zvo basabasa.+ Aroni ni vana vakwe va ta nghena va avela a mun’we ni mun’wani a ntiro lowu a to wu maha ni lezvi a to rwala.
20 Va nga ngheni kasi ku wona a zvilo zvo basa, hambu ku hi ku nghena zva cikhatana, va ngafa.”+
21 Jehovha i no wulawula na Mosi, aku:
22 “Tsalela a vana va Gerxoni+ hi tiyindlu ta vapapayi vabye ni hi mingango yabye.
23 Tsalela vontlhe kusukela ka lava va nga ni 30 wa malembe kala ka lava va nga ni 50 wa malembe, lava va nga ntlaweni lowu wu yimisilweko kasi ku tira lomu tendeni ga mutlhangano.
24 Lezvi a mingango ya vaGerxoni yi avelweko ku tira ni ku rwala hi lezvi:+
25 Va ta rwala tinguwo ta tabhernakeli,+ ku nga tenda ga mutlhangano, ni cifenengeto ca kona, ni nguwo ya bhebhe ga macalo* leyi yi nga hehla ka gona,+ ni kortina ga laha nyangweni ya tenda ga mutlhangano,+
26 ni makortina ya laha tsendzeleni,*+ ni kortina ga laha nyangweni ya tsendzele,+ lowu wu randzelako a tabhernakeli ni alati, ni tingoti ta tenda, ni zvontlhe zvibya zva kona ni zvontlhe lezvi zvi tirisiwako ka gona. Lowu i ntiro wabye.
27 A ntiro wontlhe wa vaGerxoni+ ni zvontlhe lezvi va to rwala zvi ta wonelelwa hi Aroni ni vana vakwe; u ta va nyika zvontlhe lezvi va to rwala kota ntiro wabye.
28 Lowu i ntiro wu to mahiwa hi mingango ya vaGerxoni lomu tendeni ga mutlhangano;+ a mitiro yabye yi ta wonelelwa hi Itamare,+ a n’wana wa mupristi Aroni.
29 “U ta tsalela a vana va Merari+ hi ngango wabye ni hi yindlu ya vapapayi vabye,
30 vontlhe kusukela ka lava va nga ni 30 wa malembe kala ka lava va nga ni 50 wa malembe, lava va nga ntlaweni lowu wu yimisilweko kasi ku tira lomu tendeni ga mutlhangano.
31 Lezvi va to rwala+ zvi yelanako ni ntiro wabye lomu tendeni ga mutlhangano hi lezvi: Makwadru*+ ya tabhernakeli, ni tivalelo ta gona,+ ni timhandze ta gona,+ ni zvikhato zva gona;+
32 ni timhandze+ leti ti randzeleko a tsendzele,* ni zvikhato zva kona,+ ni zvikhongwani zva tenda,+ ni tingoti ta tenda zvin’we ni zvibya zvontlhe, ni ku maha a ntiro wontlhe lowu wu yelanako nazvo. Mu ta va avela a zvibya lezvi va to rwala hi mavito ya vona.
33 A mingango ya vana va Merari+ yi ta tirisa lezvo lomu tendeni ga mutlhangano na yi wonelelwa hi Itamare, a n’wana wa mupristi Aroni.”+
34 Mosi, na Aroni ni tihosana+ ta hlengeletano va no tsalela a vana va Kohate+ hi mingango yabye ni hi yindlu ya vapapayi vabye,
35 vontlhe lava va nga hi ni 30 kuya ka 50 wa malembe, lava va nga hi ntlaweni lowu wu yimisilweko kasi ku tira lomu tendeni ga mutlhangano.+
36 A ntsengo wa vontlhe lava va tsalelweko hi kuya hi mingango yabye wu wa hi 2750.+
37 Lava hi lava va tsalelweko va mingango ya vaKohate, vontlhe lava va nga tira lomu tendeni ga mutlhangano. Mosi na Aroni va no va tsalela hi kuya hi cileletelo leci Jehovha a nga byelile Mosi.+
38 A vana va Gerxoni+ va no tsalelwa hi mingango yabye ni hi yindlu ya vapapayi vabye,
39 vontlhe lava va nga hi ni 30 kuya ka 50 wa malembe, lava va nga hi ntlaweni lowu wu yimisilweko kasi ku tira lomu tendeni ga mutlhangano.
40 A ntsengo wa vontlhe lava va tsalelweko hi mingango yabye ni hi yindlu ya vapapayi vabye wu wa hi 2630.+
41 Lava hi lava va tsalelweko va mingango ya vana va Gerxoni, vontlhe lava va nga tira lomu tendeni ga mutlhangano. Mosi na Aroni va no va tsalela hi ku landza cileletelo ca Jehovha.+
42 A vana va Merari va no tsalelwa hi mingango yabye ni hi yindlu ya vapapayi vabye,
43 vontlhe lava va nga hi ni 30 kuya ka 50 wa malembe, lava va nga hi ntlaweni lowu wu yimisilweko kasi ku tira lomu tendeni ga mutlhangano.+
44 A ntsengo wa vontlhe lava va tsalelweko hi mingango yabye ni hi yindlu ya vapapayi vabye wu wa hi 3200.+
45 Lava hi lava va tsalelweko va mingango ya vana va Merari, lava Mosi na Aroni va va tsaleleko hi ku landza a cileletelo leci Jehovha a nga byelile Mosi.+
46 Mosi, na Aroni ni tihosana ta vaIzrayeli va no tsalela vontlhe vaLevhi lavo hi mingango yabye ni hi tiyindlu ta vapapayi vabye.
47 Va wa hi ni 30 kuya ka 50 wa malembe niku vontlhe va wa avelwe ku maha mitiro ni ku rwala zvibya zvi yelanako ni tenda ga mutlhangano.+
48 A ntsengo wa vontlhe lava va tsalelweko wu wa hi 8580.+
49 Va tsalelwe hi kuya hi cileletelo leci Jehovha a nga byelile Mosi; a mun’we ni mun’wani hi kuya hi ntiro wakwe ni lezvi a nga fanele ku rwala. Va no tsalelwa kota lezvi Jehovha a nga leletele Mosi.
Mitlhamuselo ya lahasi
^ Kutani: “foca”.
^ Kutani: “foca”.
^ Kutani: “tenazes”.
^ Kutani: “foca”.
^ Kutani: “foca”.
^ Kutani: “foca”.
^ Kutani: “khuma ga mafura”, ku nga khuma gi tsakamileko hi mafura ya miphahlo.
^ Kutani: “foca”.
^ Hi kukongoma: “ndzhwalo”.
^ Kutani: “foca”.
^ Kutani: “pátio”.
^ Kutani: “tiferemo”.
^ Kutani: “pátio”.
