Mitsengo 6:1-27
6 Jehovha i no engeta a byela Mosi, aku:
2 “Byela a vaIzrayeli, uku: ‘Loku a wanuna kutani wasati a maha cifungo co hlawuleka ka Jehovha ca ku hanya kota munazira,*+
3 i wa fambele kule ni vhinyo ni tin’wani tixaka ta byala. A nga tshuki anwa vhinagre ya vhinyo kutani vhinagre ya ni gihi byala.+ A nganwi ni cihi ci mahilweko hi mauvha, ne hambu kuga mauvha, kani yo tsakama kutani yo woma.
4 Ka masiku wontlhe ya wunazira gakwe, a nga faneli kuga ni cihi ci humako hi ka vhina,* kusukela ka mauvha ya mambisi kala ka makamba ya kona.
5 “‘Ka masiku wontlhe lawa a nga lomu ka cifungo ca wunazira gakwe, ku nga ngheni likari* hlokweni yakwe.+ I ta tshama na a basile hi ku tsika misisi ya hloko yakwe yi kula kala ku mbhela a masiku lawa a to ngha a ti nyikele ka Jehovha.
6 A nga tshineli* ka munhu* a fileko ka masiku wontlhe lawa a to ngha a ti nyikele ka Jehovha.
7 Hambu loku a felwa hi papayi wakwe, kutani hi mamani wakwe, kutani hi makabye wakwe wa cinuna, kutani hi makabye wakwe wa cisati, a nga ti nyenyezisi+ hakuva a cikombiso ca wunazira gakwe ka Nungungulu wakwe ci lomu hlokweni yakwe.
8 “‘Ka masiku wontlhe ya wunazira gakwe i basile ka Jehovha.
9 Kanilezvi loku a wokari afa hi citshuketi tlhelweni gakwe,+ a nyenyezisa a misisi leyi yi yimelako a kutinyikela kakwe ka Nungungulu, i wa halule a hloko yakwe+ hi siku ga kubasiswa kakwe. I wa halule hi siku ga wu 7.
10 Hi siku ga wu 8, i wa nehe ka mupristi a matuva mambiri kutani mavhinyani mambiri ya zvipomba laha nyangweni ya tenda ga mutlhangano.
11 A mupristi i ta nyikela gin’we kota munyikelo wa ciwonho, legi gin’wani kota munyikelo wa kuhiswa, a mu mahela muphahlo wa ku kombela ku tsetselelwa ciwonho cakwe+ hi kota ya lezvi a vileko kusuhani ni munhu* a fileko. Ka siku lego, i fanele ku basisa a hloko yakwe.
12 I ta ti nyikela kambe ka Jehovha kasi a sangulisa a masiku ya wunazira gakwe niku i ta neha a yivhana ya matsune ya lembe gin’we kota munyikelo wa nandzu. Hambulezvo, a masiku lawa ma hundzileko ma nga ta ha hlayiwa, hakuva i nyenyezisile a wunazira gakwe.
13 “‘A nayo xungetano hi munazira hi lowu: Loku a mbheta a masiku ya wunazira gakwe+ i ta nehiwa laha nyangweni ya tenda ga mutlhangano.
14 Kwalaho i ta nyikela a munyikelo wakwe mahlweni ka Jehovha, wu nga lowu: yivhana ya yinene ya matsune ya lembe gin’we kota munyikelo wa kuhiswa,+ ni yivhana ya yinene ya kati ya lembe gin’we kota munyikelo wa ciwonho,+ ni yivhu ya yinene ya matsune kota muphahlo wa kuhlengela,*+
15 ni cindzala* ca tipawa to khwatsi tiphera ti nga hiko na comelo ti mahilweko hi mapa ma sililweko khwatsi ma patsilweko ni mafura, ni tipawa ta zviphamana ti nga hiko na comelo ti totilweko mafura, ni munyikelo wa kona wa tindzhoho,+ ni minyikelo ya kona ya zvakunwa.+
16 A mupristi i ta zvi neha mahlweni ka Jehovha, a nyikela a munyikelo wakwe wa ciwonho ni munyikelo wakwe wa kuhiswa.
17 I ta nyikela yivhu ya matsune ka Jehovha kota muphahlo wa kuhlengela ni cindzala* ca tipawa to kala comelo; a mupristi i ta nyikela ni munyikelo wa kona wa tindzhoho+ ni munyikelo wa kona wa zvakunwa.
18 “‘A munazira i ta halula a misisi ya hloko yakwe*+ laha nyangweni ya tenda ga mutlhangano, a teka misisi leyo yi kulileko cikhatini ca wunazira gakwe a yi chela ndzilweni lowu wu nga lahasi ka muphahlo wa kuhlengela.
19 A mupristi i ta teka a woko ga yivhu ya matsune go khoniwa,+ ni pawa yin’we yo khwatsi i phera yi nga hiko na comelo lomu cindzaleni,* ni pawa yin’we ya ciphamana yi nga hiko na comelo, a zvi chela lomu mandleni ya munazira, andzhako ka loku a halulile a cikombiso ca wunazira gakwe.
20 A mupristi i ta zvi ndziwilita zviya phambeni ni ndzhako kota munyikelo wa ku kundziwilitelwa mahlweni ka Jehovha.+ Lezvo zvilo zvo basa zva mupristi, zvin’we ni cifuva ca munyikelo wa kundziwilitelwa ni nenge wa cipandze co basa.+ Andzhako ka lezvo, a munazira a nganwa vhinyo.
21 “‘A nayo xungetano hi munazira+ loyi a mahako cifungo hi lowu: Loku a maha cifungo na a zvi kota ku nyikela ka Jehovha zvo hundza lezvi zvi lavekako ka wunazira gakwe, i wa tatise a cifungo cakwe ci yelanako ni wunazira gakwe.’”
22 Jehovha i no byela Mosi, aku:
23 “Byela Aroni ni vana vakwe, uku: ‘Lezvi hi lezvi mu faneleko ku va katekisisa zvona+ a vanhu va ka vaIzrayeli. Va byeleni, muku:
24 “Ngha Jehovha a ku katekisa+ ni ku ku vhikela.
25 Ngha Jehovha a ku woningela hi nghohe yakwe+ ni ku ku mahela wuxinji.
26 Ngha Jehovha a ku cuwuka hi wunene* a tlhela a ku nyika kurula.”’+
27 Va wa vitane a vito ga mina hehla ka vaIzrayeli,+ kasi ndzi fela ku va katekisa.”+
Mitlhamuselo ya lahasi
^ Hi ciHebheru: “nazír”, zvi wulako ku “a hlawulilweko; a nyikelweko; a hambanisilweko”.
^ A vhina i sinya leyi yi pswalako mauvha.
^ A likari i nchumu wa simbi wo kariha wa ku tsema hi wona misisi.
^ Kutani: “A nga tshuki a tshinela kusuhani”.
^ Kutani: “muhefemulo”. Wona Tlhamuselo wa magezu ya Bhibhiliya.
^ Kutani: “muhefemulo”. Wona Tlhamuselo wa magezu ya Bhibhiliya.
^ Kutani: “muphahlo wa kurula”. Wona Tlhamuselo wa magezu ya Bhibhiliya.
^ Kutani: “cirundzu”.
^ Kutani: “cirundzu”.
^ Kutani: “ya hloko ya wunazira gakwe”.
^ Kutani: “cirundzwini”.
^ Hi kukongoma: “a ku tlakusela a nghohe yakwe”.
