Mitsengo 8:1-26
8 Jehovha i no wulawula na Mosi, aku:
2 “Byela Aroni, uku: ‘A cikhati u lumekako a 7 wa tikandiya, ti wa woningele a wutshamu ga le mahlweni ka nenge wa tikandiya.’”+
3 Hikwalaho, Aroni i no maha lezvi: I no lumeka a tikandiya kasi ti woningela a wutshamu ga le mahlweni ka nenge wa tikandiya,+ kota lezvi Jehovha a nga leletele Mosi.
4 A nenge wa tikandiya wu wa mahisilwe lezvi: Wu wa no ya hi ku bethiwa hi ouro; kusukela ka simbi ya kona ya laha cikari kala ka zvitsangi, wu wa no ya hi ku bethiwa.+ A nenge wa tikandiya wu wa mahilwe hi kuya hi muwoniso+ lowu Jehovha a nga kombile Mosi.
5 Jehovha i no engeta a byela Mosi, aku:
6 “Cikari ka vaIzrayeli, teka a vaLevhi u va basisa.+
7 U ta va basisa hi ndlela leyi: Va n’watsekele a mati ya ku hlazva ciwonho, va halula a misisi yontlhe ya miri wabye hi likari,* va hlazva tinguwo tabye va tlhela va ti basisa.+
8 Andzhako ka lezvo, va ta teka a cidhunana ca homu+ ni munyikelo wa kona wa tindzhoho+ wa mapa ma sililweko khwatsi, ma patsilweko ni mafura; wena u ta teka a cidhunana ca homu leci cin’wani ca munyikelo wa ciwonho.+
9 U ta neha vaLevhi mahlweni ka tenda ga mutlhangano, u tsombanisa a hlengeletano yontlhe ya ka Izrayeli.+
10 Laha u to neha a vaLevhi mahlweni ka Jehovha, a vaIzrayeli va ta tlhateka mandla yabye hehla ka vaLevhi.+
11 Aroni i ta nyikela* vaLevhi mahlweni ka Jehovha kota munyikelo wa kundziwilitelwa+ wu humako hi ka vaIzrayeli. Vona va ta maha a ntiro wa Jehovha.+
12 “Makunu, a vaLevhi va ta tlhateka mandla yabye ka tihloko ta madhuna ya tihomu.+ Andzhako ka lezvo, va ta nyikela a dhuna gin’we ga homu kota munyikelo wa ciwonho ni legi gin’wani kota munyikelo wa kuhiswa wu mahelwako Jehovha kasi ku maha muphahlo wa ku kombela ku tsetselelwa zviwonho+ wa vaLevhi.
13 U ta yimisa vaLevhi mahlweni ka Aroni ni ka vana vakwe, u va nyikela* kota munyikelo wa kundziwilitelwa wu mahelwako Jehovha.
14 U ta hambanisa vaLevhi cikari ka vaIzrayeli. A vaLevhi va tava va mina.+
15 Andzhako ka lezvo, a vaLevhi va ta nghena va tira lomu tendeni ga mutlhangano. Hi zvalezvo u to va basisisa zvona ni ku va nyikelisa* zvona kota munyikelo wa kundziwilitelwa.
16 Hakuva vona vanhu va nyikelweko, ndzi nyikilweko vona cikari ka vaIzrayeli. Ndzi ta va teka va maha va mina wutshan’wini ga matewula wontlhe* ya vaIzrayeli.+
17 Hakuva a matewula wontlhe cikari ka vaIzrayeli ya mina, a ya munhu ni ya cifuyo.+ Ndzi ma basisile kasi mava ya mina ka siku legi ndzi nga daya a matewula wontlhe tikweni ga Gibhite.+
18 Ndzi ta hlawula a vaLevhi wutshan’wini ga matewula wontlhe ya vaIzrayeli.
19 Ndzi ta nyikela a vaLevhi, kota vanhu va nyikelweko, ka Aroni ni ka vana vakwe cikari ka vaIzrayeli kasi va maha mitiro yi to vhuna vaIzrayeli lomu tendeni ga mutlhangano+ ni ku va mahela miphahlo ya ku kombela ku tsetselelwa zviwonho kasi a vaIzrayeli va nga welwi hi khombo+ hi kuva va tshinele wutshan’wini go basa.”
20 Mosi, na Aroni ni yontlhe hlengeletano ya ka Izrayeli va no maha lezvo hi vaLevhi. A vaIzrayeli va no maha ka vaLevhi zvontlhe lezvi Jehovha a nga leletele Mosi xungetano hi vaLevhi.
21 Hikwalaho, a vaLevhi va no ti basisa va tlhela va hlazva tinguwo tabye.+ Aroni i no va nyikela* mahlweni ka Jehovha kota munyikelo wa kundziwilitelwa.+ Hi kulandzela, Aroni i no va mahela muphahlo wa ku kombela ku tsetselelwa zviwonho kasi va basisiwa.+
22 Andzhako ka lezvo, a vaLevhi va no nghena lomu tendeni ga mutlhangano kasi va maha mitiro yabye mahlweni ka Aroni ni ka vana vakwe. Va no maha kabye kota lezvi Jehovha a nga leletele Mosi xungetano hi vaLevhi.
23 Makunu Jehovha i no byela Mosi, aku:
24 “A nayo xungetano hi vaLevhi hi lowu: Loku a wanuna a hi ni 25 wa malembe kuya hehla, i ta ti patsa ni ntlawa wa lava va tirako tendeni ga mutlhangano.
25 Kanilezvi andzhako ka 50 wa malembe, i ta huma ntlaweni wa vatiri, a nga ha tiri kambe.
26 A nga tirela vamakabye vakwe lava va tirako tendeni ga mutlhangano kanilezvi a nga tava ni ciavelo ca ntiro lomo. Lezvi hi lezvi mu to maha hi vaLevhi ni mitiro yabye.”+
Mitlhamuselo ya lahasi
^ A likari i nchumu wa simbi wo kariha wa ku tsema hi wona misisi.
^ Hi kukongoma: “ndziwilitela”, ku nga ku va yisa phambeni ni ndzhako.
^ Hi kukongoma: “ndziwilitela”, ku nga ku va yisa phambeni ni ndzhako.
^ Hi kukongoma: “ndziwilitelisa”, ku nga ku va yisa phambeni ni ndzhako.
^ Kutani: “wontlhe a matewula lawa ma vhululako marumbu”.
^ Hi kukongoma: “ndziwilitela”, ku nga ku va yisa phambeni ni ndzhako.