Mitsengo 9:1-23
9 Jehovha i no wulawula na Mosi ciwuleni ca Sinayi, hi hweti yo sangula,+ ka lembe ga wumbiri, andzhako ka loku va humile tikweni ga Gibhite, aku:
2 “A vaIzrayeli va wa longisele a muphahlo wa Phasika+ hi cikhati ci yimisilweko.+
3 Mu fanele ku wu longisela hi cikhati ci yimisilweko, hi siku ga wu 14 ka hweti yaleyi, na gi ku pswite.* Wu longiseleni hi ku landza a zvileletelo zva kona zvontlhe ni wontlhe a mamahela ya kona ma yimisilweko.”+
4 Hikwalaho, Mosi i no byela vaIzrayeli lezvaku va longisela a muphahlo wa Phasika.
5 Va no longisela a muphahlo wa Phasika ciwuleni ca Sinayi hi hweti yo sangula, hi siku ga wu 14 ga hweti, na gi ku pswite.* A vaIzrayeli va no maha zvontlhe lezvi Jehovha a nga leletele Mosi, va zvi mahisa zvalezvo.
6 Kanilezvi ku wa hi ni vavanuna va nga ti nyenyezisile hi cirumbi ca munhu+ laha ka ku zvi wa nga koteki a ku va longisela a muphahlo wa Phasika ka siku lego. Hikwalaho, a vavanuna lavo va noya ka Mosi na Aroni ka siku lego,+
7 va yaku kakwe: “A hi hlazvekangi hi kota ya lezvi hi nga henya a cirumbi ca munhu. Hikuyini lezvo zvi to hi vhalela a ku nyikela munyikelo ka Jehovha hi cikhati ci yimisilweko zvin’we ni vaIzrayeli lava van’wani ke?”+
8 Zvalezvo Mosi i te ngalo kabye: “Nyimani kwalaha, ndza haya ndzi yazwa lezvi Jehovha a to wula xungetano hi n’wina.”+
9 Jehovha i no byela Mosi, aku:
10 “Byela a vaIzrayeli, uku: ‘Hambu loku a munhu cikari ka n’wina kutani wa zvizukulwana zva n’wina zva ha tako a ti nyenyezisa hi ku henya cirumbi ca munhu+ kutani loku a endzile aya kule, wa ha hi ni fanelo ya ku mu mahela muphahlo wa Phasika Jehovha.
11 Va wa gi longisele ka hweti ya wumbiri+ hi siku ga wu 14 ga hweti, na gi ku pswite.* Va fanele kuga a yivhana zvin’we ni tipawa to kala comelo ni matluka yo bava.+
12 Va nga siyi nchumu kala ni mixo+ ne va nga tshovi hambu ni rambu gin’we ga yivhana.+ Va wa yi longisele hi kuya hi zvileletelo zvontlhe zva Phasika.
13 Kanilezvi loku a munhu a hlazvekile kutani na a nga hi lomu kuendzeni, hambulezvo a nga longiseli a muphahlo wa Phasika ha womu, a munhu* loye i ta tsemiwa* cikari ka vanhu vakwe,+ hakuva a nga nyikelangi a munyikelo wa Jehovha hi cikhati ci yimisilweko. A munhu loye i ta rwala a nandzu wakwe.
14 “‘Loku ku hi ni muluveli a hanyako cikari ka n’wina, yenawu i wa mu longiselele a muphahlo wa Phasika Jehovha.+ I wa gi mahe na a landza a cileletelo ca Phasika ni mamahela ya gona ma yimisilweko.+ Ku fanele kuva ni cileletelo cin’we ntsena ka n’wina, a ka muluveli ni ka muIzrayeli wa mabeleko.’”+
15 Makunu ka siku legi a tabhernakeli gi nga yimisiwa,+ a refu gi no fenengeta a tabhernakeli, ku nga tenda ga Wukustumunyu, kanilezvi ni wusiku ku wa tshama a nchumu wu nga wonekisa ku khwatsi i ndzilo hehla ka tabhernakeli, kala ni mixo.+
16 Contlhe cikhati ku wa maheka lezvi: Ni mumu, gi wa fenengetiwa hi refu, ni wusiku, gi fenengetiwa hi nchumu wu nga wonekisa ku khwatsi i ndzilo.+
17 Ni ka cihi cikhati leci a refu gi nga suka laha tendeni, a vaIzrayeli va wo tekela ku suka;+ ni kwihi laha a refu gi nga nyima kona, a vaIzrayeli va wa gova kwalaho.+
18 A vaIzrayeli va wa suka hi kulaya ka Jehovha, va tlhela va gova hi kulaya ka Jehovha.+ Contlhe cikhati leci a refu gi nga simama hehla ka tabhernakeli, vonawu va wa nga suki.
19 Loku a refu gi tshama hehla ka tabhernakeli hi masiku yo tala, a vaIzrayeli va wa ingisa Jehovha va nga suki.+
20 Ka zvikhati zvin’wani, a refu gi wa simama hehla ka tabhernakeli hi masiku ma tsongwani. Va wa gwimba matenda va tshama laho hi kulaya ka Jehovha, va suka hi kulaya ka Jehovha.
21 Ka zvin’wani zvikhati, a refu gi wo tshama kusukela ni gambo kala ni mixo ntsena; ni laha a refu gi nga suka ni mixo, vonawu va wo suka. Kani a refu gi suka ni mumu kani gi suka ni wusiku, vonawu va wo suka.+
22 Kani gi simama masiku mambiri, kutani hweti, kutani ku hundza, contlhe cikhati leci a refu gi nga simama hehla ka tabhernakeli, a vaIzrayeli va wa simama va tshama, va nga suki. Kanilezvi loku gi suka, vonawu va wo suka.
23 Va wa gova hi kulaya ka Jehovha, va tlhela va suka hi kulaya ka Jehovha. Va wa simama ku ingisa cileletelo ca Jehovha kota lezvi Jehovha a layileko hi nomu wa Mosi.
Mitlhamuselo ya lahasi
^ Hi kukongoma: “cikari ka wusikwana gimbiri”.
^ Hi kukongoma: “cikari ka wusikwana gimbiri”.
^ Hi kukongoma: “cikari ka wusikwana gimbiri”.
^ Kutani: “muhefemulo”.
^ Kutani: “dawa”.
