Mutshawuteli 10:1-20
10 A ku khwatsi hi lezvi a tinhongani ta kufa ti bolisako a mafura ya mumahi wa tiperfume ma nuha, ni wupumbu gi tsongwani gi goha wutlhari ni wudzundzo.+
2 A mbilu ya munhu a tlharihileko yi mu yisa ndleleni ya yinene,* kanilezvi a mbilu ya cipumbu yi mu yisa ndleleni ya hava.*+
3 Ni ka yihi ndlela leyi a cipumbu ci fambako hi yona, a ci na kupima kunene,+ ci tlhela ci kombisa wupumbu ga cona ka vanhu vontlhe.+
4 Loku a hosi yi ku zangarela u nga suki laha u tshamileko kona,+ hakuva a kurula ku vhalela a zviwonho zva hombe.+
5 Ku na ni nchumu wo bayisa ndzi wu wonileko lahasi ka gambo, ku nga cihoxo ci mahiwako hi vafumeli:+
6 A zvipumbu zvi vekiwa zvitshan’wini zvi tlakukileko, kanilezvi a vanhu va tlharihileko* va simama zvitshan’wini zva lahasi.
7 Ndzi wonile a malandza na ma famba hi mahaxi kanilezvi a tihosana na ti famba hi minenge a ku khwatsi malandza.+
8 Loyi a kelako nkele a nga tshuka a wela ka wona,+ ni loyi a khungumulako a muro wa maribye a nga tshuka a lun’wa hi nyoka.
9 Loyi a kelako maribye a nga tshuka a bayisiwa hi wona, ni loyi a pandzako tihunyi i le mhangweni.*
10 Loku a chapo gi nga tsemi gi tlhela gi nga lotiwi zvi lava ntamu wa hombe kasi ku gi tirisa. Kanilezvi a wutlhari gi vhuna munhu lezvaku a humelela.
11 Loku a nyoka yi luma na yi nga se fumbiwa, a muloyi a nga vhuneki hi nchumu.
12 A magezu ma humako non’wini wa munhu a tlharihileko ma neha makatekwa,+ kanilezvi a minomu ya cipumbu ya ci lovisa.+
13 A magezu yo sangula ma humako non’wini wa cona wupumbu,+ ni magezu ya cona yo gumesa lihuhi li hohlotako.
14 Kanilezvi a cipumbu ci tshama hi ku wulawula.+
A munhu a nga zvi tivi lezvi zvi to humelela; himani wa ku a nga mu byela lezvi zvi to humelela andzhako kakwe?+
15 A ntiro wa cipumbu wa ci karalisa, hakuva a ci yi tivi ni ndlela yoya dhoropeni.
16 A gi no ku xaniseka a tiko legi a hosi ya kona yi nga jaha,+ legi a tihosana ta kona ti sangulako mubuzo ni mixo!
17 A go ku tsaka a tiko legi a hosi ya kona yi nga n’wana wa tihosi, legi a tihosana ta kona ti gako hi cikhati ci faneleko kasi ku kuma ntamu, na ti nga lavi ku popiwa!+
18 A minaneko ya langwa* ya tshoveka hi kota ya wulolo ga hombe, ni yindlu ya vhuta hi kota ya mandla ya lolo.+
19 A zvakuga* zvi mahelwe ku vhuxa mahleko, ni vhinyo yi maha wutomi gi tsakisa,+ kanilezvi a mali yi xuxa zvontlhe.+
20 U nga ruki a hosi hambu lomu maalakanyweni ya wena,*+ ni loku u hi lomu kwartwini ya wena u nga ruki munhu wo ganya, hakuva a cinyanyani* ci nga rwala a timhaka ta wena, ni civangwa ci nga ni tipapa ci ngaya ci ya phinda lezvi u nga wula.
Mitlhamuselo ya lahasi
^ Hi kukongoma: “yi canjeni gakwe ga cinene”.
^ Hi kukongoma: “yi canjeni gakwe ga cibhabha”.
^ Kutani: “vo ganya”.
^ Zvi nga maha na zvi wula ku: “i wa ti wonele”.
^ Kutani: “denga; terraço”.
^ Hi kukongoma: “pawa”.
^ Zvi nga maha na zvi wula ku: “laha mubhedini wa wena”.
^ Hi kukongoma: “civangwa ci hahako ca matilo”.
