Mutshawuteli 3:1-22
3 A cilo cin’we ni cin’wani ci na ni cikhati ca cona ci yimisilweko;Ku na ni cikhati ca zvontlhe zvi mahiwako lahasi ka matilo:
2 A cikhati ca kupswaliwa,* ni cikhati ca kufa;A cikhati ca ku byala, ni cikhati ca ku tsuwula lezvi zvi byalilweko;
3 A cikhati ca ku daya, ni cikhati ca ku hanyisa;A cikhati ca ku hohlola, ni cikhati ca ku aka;
4 A cikhati ca ku rila, ni cikhati ca ku hleka;A cikhati ca kuba tinyandha, ni cikhati ca ku kina;*
5 A cikhati ca ku hoxa maribye, ni cikhati ca ku rolela maribye;A cikhati ca ku bharasara, ni cikhati ca ku nga bharasari;
6 A cikhati ca ku lavetela, ni cikhati ca ku vhumela ku zvi lahlekile;A cikhati ca ku veka, ni cikhati ca ku hoxa;
7 A cikhati ca ku handzula,+ ni cikhati ca ku runga;A cikhati ca ku miyela,+ ni cikhati ca ku wulawula;+
8 A cikhati ca ku randza, ni cikhati ca ku venga;+A cikhati ca yimpi, ni cikhati ca kurula.
9 Zvini lezvi a mutiri a bhindzulako hi kutikarata kakwe kontlhe ke?+
10 Ndzi no wona a mitiro leyi Nungungulu a nyikileko a vana va vanhu kasi va khomeka hi yona.
11 I mahile zvontlhe na zvi sasekile hi cikhati ca zvona.+ I tlhelile a chela timbilwini tabye a cikhati ca pindzukelwa; hambulezvo a vanhu va nga ta tshuka va wu zwisisa a ntiro lowu a Nungungulu wa lisine a wu mahileko kusukela kusanguleni kala magumo.
12 Ndzi no wona lezvaku a ku na ca chukwana a ku hundza ku va tsaka, va maha zvazvinene wutomini gabye,+
13 ni lezvaku a mun’we ni mun’wani aga, anwa, a tlhela a ti buza hi ntiro wakwe wontlhe a wu dzunukeleko. Leco cinyikiwo ca Nungungulu.+
14 Ndzi no tiva lezvaku zvontlhe lezvi a Nungungulu wa lisine a zvi mahako zvi ta tshama kala kupindzuka. Ci hava ci to engetelwa hambu ku hunguliwa ka zvona. A Nungungulu wa lisine i zvi mahisile lezvo kasi a vanhu va mu chava.+
15 Lezvi zvi mahekako zvi sina zvi mahekile, ni lezvi zvi tova kona zvi wa hi kona;+ kanilezvi a Nungungulu wa lisine i hlota lezvi zvi lavetelwako.*
16 Ndzi no tlhela ndzi wona lezvi lahasi ka gambo: Wutshan’wini ga nongameto ku wa hi ni kubiha, ni wutshan’wini ga kululama ku wa hi ni kubiha.+
17 Hikwalaho, mbilwini ya mina, ndzi te: “A Nungungulu wa lisine i ta lamula a wakululama ni wakubiha+ hakuva ku na ni cikhati ca mitiro yontlhe ni ca zvontlhe zvi mahiwako.”
18 Ndzi no tlhela ndzi ti byela mbilwini ya mina lezvaku a Nungungulu wa lisine i ta ringa a vana va vanhu a va komba lezvaku va fana ni zvihari,
19 hakuva lezvi zvi mahekako ka vanhu zva maheka kambe ni ka zvihari; a magumo ya zvona man’we.+ Kota lezvi a cihari ci fako ni munhu yenawu wafa. I moya wun’we wu nga kona ka zvihari ni vanhu.+ Hikwalaho, a munhu a nga zvi hundzi hi nchumu a zvihari, hakuva zvontlhe a zvi nyawuli.
20 Zvontlhe zviya ka wutshamu gin’we.+ Zvontlhe zvi mahilwe hi ntshuri+ niku zvontlhe zvi tlhelela ntshurini kambe.+
21 Makunu himani a zvi tivako ku kani a moya wa vanhu wu tlakukela hehla kutani a moya wa zvihari wu relela lahasi misaveni ke?+
22 Ndzi no wona kambe lezvaku a ku na nchumu wa chukwana ka munhu a ku hundza ku a tsakela a ntiro wakwe,+ hakuva lowo hi wona a nchachazelo* wakwe; hakuva himani a to mu wonisa lezvi zvi to maheka andzhako ka loku a nga ha hi kona ke?+
Mitlhamuselo ya lahasi
^ Kutani: “cikhati ca ku pswala”.
^ Hi kukongoma: “ca ku tlulatlula”.
^ Zvi nga maha na zvi wula ku: “zvi hundzileko”.
^ Kutani: “ciavelo”.