Nahume 3:1-19
3 Khombo ka dhoropa ga ku halata nkhata!
Gi tele hi kukhohlisa ni kuphanga.
A gi tshuki gi tshama na gi nga hi na nyama!
2 Ku zwala guwa ga kukwapa ka musephu ni ga marodha,Ni haxi gi khanako, ni kutlulatlula ka kareta.
3 Hi nga wonani lava va khileleko a mahaxi, ni zvipadha zvi hatimako, ni matlhari ma phatimako,A vanhu va tsandza-vahlayi va delweko ni tinhulu ta zvirumbi— A zvirumbi a zvi mbheli.
Va tshama hi ku ti khudhulela hi zvirumbi.
4 Lezvo zvi maheka hi kota ya wubhayi gi mahiwako hi cibhayi;Ca koka kupima niku ci sasekile; i hosi ya cisati ya wuloyi;Ci phasa matiko hi wubhayi ga cona ni mingango hi wuloyi ga cona.
5 “Ndza ku* vhukela”, ku wula Jehovha wa mabutho,+“Ndzi ta kupula saya ya wena kala yi ku fenengeta nghohe.Ndzi ta komba matiko a wumbyiri ga wena,Ni mifumo, a tingana ta wena.
6 Ndzi ta ku phatsekela chakaNdzi ku nyenyezisa;Ndzi ta ku maha cihlekiso.*+
7 Vontlhe va to ku wona va ta ku tsutsuma,+ vaku:‘Ninivha i hahlulilwe!
Himani a to mu zwela wusiwana ke?’
Ndzi ta va kuma kwihi va ku ku chavelela?
8 Wena wova chukwana a ku hundza No-Amoni*+ loyi a nga hi kusuhani ni minonga ya Nilo?+
A mati ma wa mu randzele;A tshomba yakwe yi wa hi bimbi ni muro wakwe wu wa hi bimbi.
9 Etiopia i wa hi yena cibuka cakwe ca ntamu, na Gibhite yenawu.
Puti+ ni vaLibhia va wa hi vavhuneteli va wena.+
10 Kanilezvi hambu yena i mahile khumbi;I yisilwe wukhumbini.+
A vana vakwe vonawu va no pswhandlasiwa lomu mahandzakanyeni* wontlhe ya maruwa.
Va bile tihlolo na va bela a vanhu vakwe va lisima,Ni vavanuna vakwe vontlhe va hombe va no fasiwa tinghomondo.*
11 Wenawu u ta popiwa;+U taya kufihlaleni.
U ta lava ko fihlala a nala.
12 A makhokhola ya wena wontlhe ma fana ni mikuwu yi nga ni mihandzu yo sangula yi buvhileko;Loku yi jujiwa, a makuwu ma ta wela minon’wini ya vakhadamuli.
13 A masochwa ya wena ma fana ni vavasati cikari ka wena.
A tinyangwa ta tiko ga wena ti ta vhululelwa a valala va wena ti ku ha.
A ndzilo wu ta hisa zvikwinyaro zva tinyangwa ta wena.
14 Khana mati u ti longisela ku randzelwa!+
Tiyisa makhokhola ya wena.
Nghena lomu madhakeni u kandzihetela wumba;Khoma muchini wa kuba zvitini.
15 Hambu kwaseyo a ndzilo wu ta ku mita.
A cipadha ci ta ku lovisa.+
Ci ta ku khadamulisa ku khwatsi hi lezvi a humbi* yo kala yi nga se tiyela yi mahako.+
Andzani mu ku khwatsi mu humbi yo kala yi nga se tiyela!
Ina, andzani mu tala a ku khwatsi mu humbi.
16 U andzisile nguvhu a vaxavisi va wena a ku hundza a tinyeleti ta matilo.
A humbi yo kala yi nga se tiyela yi chemulile yi haha.
17 A varindzeli va wena va fana ni humbi,Ni tihosana ta wena ti fana ni butho ga humbi.
Yi fihlala lomu marangeni ya maribye hi siku ga cirami,Kanilezvi loku a gambo gi tlhava, yi puruma yiya kule;Niku i hava a ku tivako lomu yi yako kona.
18 A varisi va wena va khudzehela, wena hosi ya Asiriya;A tihosana ta wena ti tshama mitini ya tona.
A vanhu va wena va hangalakele lomu zvitsungeni,Niku a ku na munhu a va hlengeletako.+
19 A ku na kutlhatlhiswa khombyeni ga wena.
A cilondza ca wena a ci chumeki.
Vontlhe lava va tozwa mahungu ya wena va taba mandla;+Hakuva himani a nga kala ku xanisiwa hi tihanyi ta wena ta tshisela ga cima ke?”+
Mitlhamuselo ya lahasi
^ Ku nga Ninivha.
^ Kutani: “cipetakulo”.
^ Ku nga Tebhesi.
^ Kutani: “tinjema”.
^ Hi kukongoma: “tihlokweni”.
^ A humbi zviharana zvo fana ni bhandzala.
