Tisimu 106:1-48
106 Dhumisani Jah!*
Bongani Jehovha hakuva mu nene;+A lirandzo lakwe li nga mbheliko li simama kala kupindzuka.+
2 Himani a nga hlawutelako hi kumbhelela a mitiro ya Jehovha ya ntamu,Kutani ku huwelela mitiro yakwe yontlhe yo dzundzeka ke?+
3 Va tsaka lava va mahako zva nongameto,Lava va mahako zvakululama contlhe cikhati.+
4 O Jehovha, ndzi alakanye laha u va mahelako wuxinji a vanhu va wena.+
Ndzi hlayise hi mitiro ya wena ya kuhanyisa,
5 Kasi ndzi ti buza hi wunene legi u mahelako a vahlawulilweko va wena,+Ndzi tsaka zvin’we ni tiko ga wena,Ndzi fela ku ku dhumisa na ndzi tizwa matshandza, na ndzi hi zvin’we ni tshomba ya wena.
6 Hi wonhile a ku fana ni vakokwani va hina;+Hi gohile; hi mahile zvakubiha.+
7 A vakokwani va hina le Gibhite a va yi nyikangi lisima* a mitiro ya wena yo hlamalisa.
A va alakanyangi a lirandzo la wena la hombe li nga mbheliko,Kanilezvi va no ku hluwukela le bimbini, Bimbini go Pswhuka.+
8 Hambulezvo, i no va ponisa hi kota ya vito gakwe,+Kasi a tivekisa a ntamu wakwe.+
9 I no kawuka a Bimbi go Pswhuka, gi woma,A va rangela lomu kueteni ka gona a ku khwatsi hi lomu ciwuleni;+
10 I no va ponisa canjeni ga lava va nga kari va va venga,+A va tlhatlhisa canjeni ga nala.+
11 A mati ma no khubhunyeta a valala vabye;I hava ni mun’we wabye a nga pona.*+
12 Makunu va no kholwa ka citsumbiso cakwe,+Va sangula ku yimbelela va mu dhumisa.+
13 Kanilezvi va no hatlisa va rivala lezvi a zvi mahileko;+A va rindzelangi a wusungukati gakwe.
14 Va no landzela a kunavela kabye ka hava lomu ciwuleni,+Va ringa Nungungulu lomu ciwuleni.+
15 I no va nyika lezvi va nga kombela,Kanilezvi a gumesa a vaba hi mababyi, ma vaga.+
16 Lomu wugovelweni, va no lusela Mosi,Na Aroni,+ a basileko wa Jehovha.+
17 A misava yi no vhululeka yi mita DhataniYi tlhela yi fenengeta lava va nga tsombene na Abhiramu.+
18 A ndzilo wu no vhura cikari ka ntlawa wabye;A langavi gi no hisa a vakubiha.+
19 Va no maha role le Horebhe,Va khizamela a cifananiso ca simbi;*+
20 Va cicisile a kungangamela ka minaHi cifananiso ca homu yi gako byanyi.+
21 Va rivele Nungungulu,+ a Muhanyisi wabye,Loyi a nga maha zvilo zva hombe le Gibhite,+
22 Ni zvihlamaliso tikweni ga Hamu,+Ni mitiro yo hlamalisa Bimbini go Pswhuka.+
23 I wa hi kusuhani ni ku laya lezvaku va hihiritwa,Kanilezvi Mosi, a hlawulilweko wakwe, i no mu khongotela*Kasi a rengisa a zanga yakwe a nga va lovisi.+
24 Va no chepeta a tiko go saseka;+A va kholwangi citsumbiso cakwe.+
25 Va no simama ku ngurangura lomu matendeni yabye;+A va ingisangi a gezu ga Jehovha.+
26 Hikwalaho, i no tlakusa a canja gakwe a va hlambanyelaLezvaku i ta va wisa lomu ciwuleni,+
27 I ta tsika a pswalo wabye wuwa cikari ka matiko,A va hangalasa cikari ka matiko.+
28 Makunu va no sangula ku khozela* Bhaali Peyori,+Vaga a miphahlo yi nyikelweko ka vafileko.*
29 Va no mu zangarisa hi mitiro yabye,+Ku se humelela ntungu cikari kabye.+
30 Kanilezvi a cikhati leci Finiyasi a nga suka a zvi nghenela,A ntungu wu no nyima.+
31 Niku lezvo zvi no hlayelwa kakwe kota kululamaZvizukulwaneni zvontlhe kala kupindzuka.+
32 Va no mu zangarisa matini ya Meribha*Laha ka kuza Mosi zvi mu fambela cibhabha hi kota yabye.+
33 Va no zangarisa a moya wakweLaha ka kuza yena a hatlisela ku wulawula hi minomu yakwe.+
34 A va hihiritangi a matiko+Kota lezvi Jehovha a nga va layile.+
35 Kanilezvi va no ti patsa ni matiko,+Va pimanyisa* a tindlela tabye.+
36 Va no simama ku tirela a zvifananiso zvabye,+Zvi seva ntlhamu kabye.+
37 Va wa phahlela hi vafana vabyeNi vanhanyana vabye ka madhimoni.+
38 Va no halata nkhata wo kala nandzu,+A nkhata wa vafana vabye ni vanhanyana vabye,Lava va va phahleleko ka zvifananiso zva vaKhanani;+Ni tiko gi no nyenyeziswa hi kuhalatwa ka nkhata.
39 Va no nyenyeziswa hi mitiro yabye;Va maha wubhayi ga moya hi zvimaho zvabye.+
40 Hikwalaho, a zanga ya Jehovha yi no vhurela a vanhu vakwe,A sangula ku nyenya tshomba yakwe.
41 I no va nyikela mandleni ya vamatiko hi kuphindaphinda,+Kasi va fumelwa hi lava va nga va venga.+
42 A valala vabye va no va xanisa,Vava hasi ka canja gabye.
43 I no va tlhatlhisa makhati yo tala,+Kanilezvi vona va wa mu hluwukela va nga mu ingisi,+Hikwalaho, va wa koramiswa hi kota ya cigoho cabye.+
44 Hambulezvo i wa wona kuxaniseka kabye,+A tlhela azwa kurila kabye ko lava ku vhuniwa.+
45 Hi kota yabye, i wa alakanya a civhumelwano cakwe,Niku i wa va zwela wusiwana* hi ku susumetwa hi lirandzo lakwe la hombe li nga mbheliko.+
46 I wa va maha va va zwela wusiwanaVontlhe lava va nga va maha tikhumbi.+
47 O Jehovha, Nungungulu wa hina, hi ponise,+U hi hlengeleta hi ka matiko,+Kasi hi bonga a vito ga wena go basa,Hi nengela hi ku ku dhumisa.+
48 Ngha Jehovha, a Nungungulu wa Izrayeli, a dhumiswaKusukela kupindzukeni kala kupindzuka.*+
Ni vanhu vontlhe va wa wule, vaku: “Amen!”*Dhumisani Jah!*
Mitlhamuselo ya lahasi
^ Kutani: “Haleluya!” A ku “Jah” i vito gi komisilweko gaku Jehovha.
^ Kutani: “a va yi zwisisangi”.
^ Kutani: “a nga sala”.
^ Kutani: “cifananiso ci nyekisilweko”.
^ Hi kukongoma: “i no yima laha geveni mahlweni kakwe”.
^ Kutani: “Va no namarela ka”.
^ Ku nga miphahlo yi nyikelweko ka vafileko kutani ka vanungungulu va nga hanyiko.
^ Zvi wulako ku: “Kuholova”.
^ Kutani: “Va gondza”.
^ Kutani: “i wa ti laya”.
^ Kutani: “Kupindzukeni kontlhe”.
^ Kutani: “Zvi wa maheke!”
^ Kutani: “Haleluya!” A ku “Jah” i vito gi komisilweko gaku Jehovha.