Tisimu 107:1-43
-
Bongani Nungungulu hi kota ya mitiro yakwe yo hlamalisa
107 Bongani Jehovha hakuva mu nene;+A lirandzo lakwe li nga mbheliko li simama kala kupindzuka.+
2 Ngha lava va tlhatlhisilweko hi Jehovha va wula lezvo,Ina, lava a va tlhatlhisileko canjeni* ga nala,+
3 Lava a va hlengeletileko hi lomu matikweni,+Hi le mutsuwuka-gambo ni mupela-gambo,Ni le n’walungu* ni dzongeni.*+
4 Va no pepetseka lomu ciwuleni, lomu livaleni;A va kumangi ndlela ya kuya dhoropeni legi va nga wa ta hanya ka gona.
5 Va wazwa ndlala ni tora;Va* wa rerekile hi kukarala.
6 Kukaratekeni kabye, va no simama ku rila ka Jehovha,+A va tlhatlhisa zvikaratweni zvabye.+
7 I no va fambisa ndleleni yi lulamileko+Kasi va chikela dhoropeni legi va nga wa ta hanya ka gona.+
8 Ngha a vanhu va bonga Jehovha+ hi kota ya lirandzo lakwe li nga mbhelikoNi mitiro yakwe yo hlamalisa leyi a yi mahelako a vana va vanhu.+
9 Hakuva i kolwisile loyi* wa tora,A mu xurisa hi zvilo zva zvinene loyi a nga ni ndlala.+
10 A vokari va wa hanya munyameni wu etileko,Na va bohilwe hi kuxaniseka ni machini.
11 Hakuva va wa hluwukele a mhaka ya Nungungulu,Va chepeta a wusungukati ga Loyi a Tlakukileko ku Hundza Vontlhe.+
12 Hikwalaho, i no koramisa timbilu tabye hi tixanisa,+Va ti phinganyeta, na ku nga hi na wa ku va vhuna.
13 Kukaratekeni kabye, va no rila ka Jehovha va kombela ku vhuniwa,Yena a va ponisa zvikaratweni zvabye.
14 I no va humesa lomu munyameni wa kueta,A phewula machini yabye.+
15 Ngha a vanhu va bonga Jehovha hi kota ya lirandzo lakwe li nga mbheliko+Ni mitiro yakwe yo hlamalisa leyi a yi mahelako a vana va vanhu.
16 Hakuva i pandzile tivati ta kobre,A tsemelela zvikwinyaro zva simbi.+
17 Va wa hi zvipumbu niku va no xaniseka+Hi kota ya zvihambunyeto ni zvigoho zvabye.+
18 Va no swihala kuga* a zvakuga zva tixaka tontlhe;Va no tshinela kusuhani ni tinyangwa ta kufa.
19 Kukaratekeni kabye, va wa rila ka Jehovha va kombela ku vhuniwa,Yena a va ponisa zvikaratweni zvabye.
20 I wa rumela a mhaka yakwe, a va hanyisa,+A va tlhatlhisa mikeleni leyi va nga wele ka yona.
21 Ngha a vanhu va bonga Jehovha hi kota ya lirandzo lakwe li nga mbhelikoNi mitiro yakwe yo hlamalisa leyi a yi mahelako a vana va vanhu.
22 Va wa nyikele miphahlo ya kubonga,+Va huwelela a mitiro yakwe hi mikulungwani.
23 Lava va endzako hi zvitimela* lomu bimbini,Lava va mahako mabhindzu lomu matini ya hombe,+
24 Va yi wona a mitiro ya JehovhaNi mitiro yakwe yo hlamalisa lomu kueteni:+
25 Lezvaku hi gezu gakwe ku vhuka bhubhutsa,+Gi tlakusa a mavingo* ya bimbi.
26 Va tlakuka kala le tilweni;Va tlhela va relela lomu kueteni;
Va tsemeka hlanha hi kota ya khombo gi nga kwalaha nyongeni.
27 Va ndlengandlengiswa, va dhedherekela a ku khwatsi munhu a popilweko;Gontlhe a wutlhari gabye a gi vhuni nchumu.+
28 Kukaratekeni kabye, va rila ka Jehovha,+Yena a va ponisa zvikaratweni zvabye.
29 Wa miyeta a bhubhutsa,A mavingo* ya bimbi ma rula.+
30 Va tsaka loku ma rula,A tlhela a va rangela vaya ka porto* leyi va yi lavako.
31 Ngha a vanhu va bonga Jehovha hi kota ya lirandzo lakwe li nga mbhelikoNi mitiro yakwe yo hlamalisa leyi a yi mahelako a vana va vanhu.+
32 Va wa mu tlakuse lomu hlengeletanweni ya vanhu,+Va mu dhumisa hubyeni* ya madhota.
33 Yena i hundzula micongo yiva ciwula,Ni zvibuka zva mati zviva misava ya cikhwakhwa,+
34 Ni misava yo nona i yi maha misava ya munyu yi nga humesiko nchumu,+Hi kota ya kubiha ka lava va tshamako lomo.
35 I hundzula a ciwula civa mativa ya mati ma teleko hi hlanga,Ni tiko gi womileko giva zvibuka zva mati.+
36 I va akisa lomo lava va nga ni ndlala,+Kasi va yimisa a dhoropa ga ku va hanya ka gona.+
37 Va byala masimu ni zvivhina*+Zvi pfunako timbewu to tala.+
38 Wa va katekisa, va andza nguvhu;A nga tsiki a zvifuyo zvabye zvi hunguleka.+
39 Kanilezvi va tlhela vava va tsongwani, va tsongahatiwaHi kota ya kuxanisiwa, ni khombo, ni hlomulo.
40 I chulula kuchepetwa hehla ka tihosana,A ti pepetsekisa ciwuleni co kala ndlela.+
41 Kanilezvi i vhikela* zvisiwana ka ku xanisiwa,+A andzisa a mingango ya zvona a ku khwatsi i ntlhambi.
42 A valulamileko va zvi wona va tsaka;+Kanilezvi vontlhe a vangalulamangiko vo vhala minomu yabye.+
43 Ni wihi a tlharihileko i ta ehleketa hi zvilo lezvi,+Niku i ta pimisisa khwatsi hi mitiro ya Jehovha ya lirandzo li nga mbheliko.+
Mitlhamuselo ya lahasi
^ Kutani: “ntan’wini”.
^ Kutani: “norte”.
^ Kutani: “sul”.
^ Kutani: “A muhefemulo wabye wu”.
^ Kutani: “muhefemulo”.
^ Kutani: “A muhefemulo wabye wu no nyenya”.
^ Kutani: “mapaketi; tinavhiyo”.
^ Kutani: “mabyandlati; mavimbi”.
^ Kutani: “mabyandlati; mavimbi”.
^ A porto wutshamu legi a zvitimela zvi nyimako kona.
^ Hi kukongoma: “citshan’wini”.
^ A zvivhina masimu ya tisinya leti ti pswalako mauvha.
^ Kutani: “veka hehla”, ku nga ka wutshamu ga ku zvi nga kumelwi.