Tisimu 109:1-31
Ka muchuli. Lisimu la Dhavhidha.
109 O Nungungulu, wena loyi ndzi ku dhumisako,+ u nga miyeli.
2 Hakuva a vakubiha ni vakanganyisi va ndzi ahlamele minomu yabye.
Va wulawula hi mina hi tirimi ta mawunwa;+
3 Va ndzi randzela hi magezu ya livengo,Va ndzi dhumela mahala.+
4 Va ndzi tlhelisela a lirandzo la mina hi ku ndzi vhukela;+Kanilezvi ndza simama ku khongela.
5 Va ndzi tlhelisela wunene hi kubiha,+Ni lirandzo la mina hi livengo.+
6 Yimisa a wakubiha hehla kakwe;Ngha ku yima mulumbeti* tlhelweni gakwe ga cinene.
7 I wa koneke kulamulweni;Hambu ni mukhongelo wakwe wu wa woniwe kota ciwonho.+
8 A masiku yakwe ma wa mahe ma tsongwani;+A cikhundla cakwe ca kuwonelela ci wa tekiwe hi mun’wani.+
9 A vana vakwe va wa sale na va nga hi na papayi,Ni sati wakwe i wa mahe noni.*
10 A vana vakwe va wa pepetseke va kombela zomola,Va huma hi lomu mitini yabye yi hahlukileko va lavetela zvakuga.
11 A mupembisi i wa mu tekele zvontlhe lezvi a nga nazvo,Ni vamatiko va wa phange a titshomba takwe.
12 Ku ngavi ni munhu a mu mahelako wunene,*Ne wa ku va mahela wuxinji a vana vakwe vo kala papayi.
13 A pswalo* wakwe wu wa tsemiwe,+Ni vito gabye gi wa vhinyiwe ndzeni ka cizukulwana.
14 A cigoho ca vakokwani vakwe ci wa alakanyiwe hi Jehovha,+Ni ciwonho ca mamani wakwe ci nga vhinyiwi.
15 Ngha contlhe cikhati Jehovha a alakanya lezvi va zvi mahileko;I wa fuvise a cialakanyiso cakwe laha misaveni.+
16 Hakuva a nga alakanyangi a ku maha wunene,*+Kanilezvi i no hlongolisela loyi a xanisiwako,+ ni cisiwana, ni loyi a tshovekileko mbiluA fela ku va daya.+
17 I wa randza ku ruka, hikwalaho zvi wuyile hi yena;I wa nga tsakeli ku katekisa, hikwalaho a nga katekisiwangi.
18 I wa boha zviruko a ku khwatsi i nguwo yakwe.
Zvi no chululiwa mirini wakwe a ku khwatsi i mati,Zvi nghena lomu marambyini yakwe a ku khwatsi mafura.
19 A zviruko zvakwe zvi wa fane ni nguwo leyi a fenengelako,+Zvi tlhela zvi ku khwatsi libhandi leli a tshamako na a bohile.
20 Lowu i nchachazelo wa Jehovha ka loyi a ndzi vhukelako+Ni ka lava va wulawulako kubiha hi mina.*
21 Kanilezvi, wena Jehovha, Hosi ya Hombe,Ndzi lwele hi kota ya vito ga wena.+
Ndzi tlhatlhise hakuva a lirandzo la wena li nga mbheliko li nene.+
22 Hakuva a ndzi na wa mina niku ndzi cisiwana,+Ni mbilu ya mina yi tlhavilwe ndzeni ka mina.+
23 Ndza hundza a ku khwatsi i ndzhuti wu n’walalako;Ndzi kukuletilwe ndziya kule a ku khwatsi i humbi.*
24 A madzolo ya mina ma rerekile hi ku pfhunga;*A miri wa mina wu wondzile, niku ndza khanyana.*
25 Ndzi mahile cihlekiso cabye.+
Loku va ndzi wona, vo ninginisa tihloko tabye.+
26 Ndzi vhune, O Jehovha, Nungungulu wa mina.Ndzi ponise hi kota ya lirandzo la wena li nga mbheliko.
27 Ngha va zvi tiva lezvaku i canja ga wena gi zvi mahileko;Lezvaku hi wena Jehovha u zvi mahileko.
28 Va wa ruke, kanilezvi wena katekisa.
Ngha va wisiwa tingana a cikhati va sukako va ndzi vhukela,Kanilezvi a nandza ga wena gi wa tsake.
29 Lava va ndzi vhukelako va wa ambale tingana;Va wa fenengetiwe hi tingana a ku khwatsi i nguwo.*+
30 A nomu wa mina wu ta dhumisa Jehovha hi kuchivirika;Ndzi ta mu dhumisa mahlweni ka vanhu vo tala.+
31 Hakuva i ta yima reveni ga cinene ga cisiwanaA fela ku ci ponisa ka lava va ci konako.*
Mitlhamuselo ya lahasi
^ Kutani: “mukaneti”.
^ Kutani: “i wa felwe hi nuna”.
^ Kutani: “a mu kombisako lirandzo li nga mbheliko”.
^ Kutani: “vazukulu”.
^ Kutani: “a ku kombisa lirandzo li nga mbheliko”.
^ Kutani: “muhefemulo wa mina”.
^ A humbi zviharana zvo fana ni bhandzala.
^ Kutani: “jejuwara”.
^ Hi kukongoma: “A nyama ya mina yi wondzile, a yi nonangi (a yi na mafura)”.
^ Kutani: “nghanju yo kala mawoko”.
^ Kutani: “va konako muhefemulo wa cona”.
