Tisimu 118:1-29
118 Bongani Jehovha hakuva mu nene;+A lirandzo lakwe li nga mbheliko li simama kala kupindzuka.
2 Izrayeli i wa wule, aku:
“A lirandzo lakwe li nga mbheliko li simama kala kupindzuka.”
3 Lava va yindlu ya Aroni va wa wule, vaku:
“A lirandzo lakwe li nga mbheliko li simama kala kupindzuka.”
4 Lava va chavako Jehovha va wa wule, vaku:
“A lirandzo lakwe li nga mbheliko li simama kala kupindzuka.”
5 Ndzi no khongela ka Jah* zvikaratweni zva mina;Jah i no ndzi hlamula, a ndzi neha wutshan’wini go rula.*+
6 Jehovha i reveni ga mina; ndzi nga ta chava nchumu.+
A munhu a nga ndzi maha yini ke?+
7 Jehovha i reveni ga mina kota muvhuni wa mina;*+Ndzi ta cuwuka lava va ndzi vengako na ndzi giyagiya.+
8 I chukwana a ku tsutsumela ka JehovhaA ku hundza ku tsumba vanhu.+
9 I chukwana a ku tsutsumela ka JehovhaA ku hundza ku tsumba a tihosana.+
10 A matiko wontlhe ma no ndzi randzela,Kanilezvi hi vito ga Jehovha,Ndzi no ma hlongola.+
11 Ma ndzi randzele, ina, ndzi wa randzelwe matlhelweni wontlhe,Kanilezvi hi vito ga Jehovha,Ndzi no ma hlongola.
12 Ma no ndzi pomela a ku khwatsi tinyoxi,Kanilezvi ma timekile hi kuhatlisa a ku khwatsi i ndzilo wa mimizwa.
Hi vito ga Jehovha,Ndzi no ma hlongola.+
13 Va no ndzi nikinya hi ntamu* kasi ndziwaKanilezvi Jehovha i no ndzi vhuna.
14 Jah wutumbelo ga mina ni ntamu wa mina,Niku kuhanyiswa ka mina.+
15 A guwa ga kutsaka ni ga kuhanyiswa*Gi lomu matendeni ya valulamileko.
A canja ga cinene ga Jehovha gi kombisa ntamu wa gona.+
16 A canja ga cinene ga Jehovha ga ti tlakusa;A canja ga cinene ga Jehovha gi kombisa ntamu wa gona.+
17 Ndzi nga tafa, ahihi, ndzi ta hanya,Kasi ndzi hlawutela a mitiro ya Jah.+
18 Jah i ndzi tsayisile nguvhu,+Kanilezvi a nga ndzi nyikelangi kufeni.+
19 Ndzi vhuleleni a tinyangwa ta kululama;+Ndzi ta nghena hi tona ndzi dhumisa Jah.
20 Leyi i nyangwa ya Jehovha.A valulamileko va ta nghena hi yona.+
21 Ndzi ta ku dhumisa hakuva u ndzi hlamulile,+Uva kuhanyiswa ka mina.
22 A ribye legi gi nga aliwa hi vaakiGive gona ribye ga laha khoneni ga lisima ka wontlhe.*+
23 Lezvi zvita hi ka Jehovha;+Zvi sasekile nguvhu matihlweni ya hina.+
24 Legi hi gona siku gi nga mahiwa hi Jehovha;Hi ta tsaka hi kulungela ka gona.
25 Jehovha, hi ponise, ha ku khongotela!
Jehovha, hi nyike kuhlula, ho kombela!
26 I katekile loyi a tako hi vito ga Jehovha;+Ha mu katekisa hi lomu ndlwini ya Jehovha.
27 Jehovha i Nungungulu;Wa hi nyika kuwonekela.+
Nghenani ntlaweni wa lava va yako mubuzweni ni madhavi mandleni,+Kala timhondzweni ta alati.+
28 Wena u Nungungulu wa mina; ndzi ta ku dhumisa.Nungungulu wa mina, ndzi ta ku tlakusa.+
29 Bongani Jehovha+ hakuva mu nene;A lirandzo lakwe li nga mbheliko li simama kala kupindzuka.+
Mitlhamuselo ya lahasi
^ A ku “Jah” i vito gi komisilweko gaku Jehovha.
^ Kutani: “wutshan’wini go anama”.
^ Zvi nga maha na zvi wula ku: “i zvin’we ni lava va ndzi vhunako”.
^ Zvi nga maha na zvi wula ku: “U no ndzi nikinya hi ntamu”.
^ Kutani: “kuhlula”.
^ Hi kukongoma: “hloko ya magumo”. A ribye legi gi wa vekiwa laha khoneni ku tlhanganako makhurisi mambiri kasi ku ma tiyisa.