Tisimu 147:1-20
147 Dhumisani Jah!*
Zvi nene a ku yimbelela a tisimu ta ku dhumisa* a Nungungulu wa hina;A zvo ku tsakisa niku zva ringana a ku mu dhumisa!+
2 Jehovha wa aka Jerusalema;+I tsombanisa a vaIzrayeli lava va hangalakileko.+
3 Wa hanyisa lava va timbilu ti tshovekileko,A bhandicha a zvilondza zvabye.
4 Wa hlaya a ntsengo wa tinyeleti;I vitana tontlhe hi mavito.+
5 A Hosi ya hina ya hombe niku yi na ni ntamu wa hombe;+A kuzwisisa ka yona a ku na lipimo.+
6 Jehovha wa tlakusa vakurula,+Kanilezvi a vakubiha i va hoxa lahasi.
7 Yimbelelani ka Jehovha na mu bonga;Yimbelelani a tisimu ta ku dhumisa a Nungungulu wa hina hi citende,
8 Loyi a fenengetako matilo hi marefu,Loyi a nisako vhula laha misaveni,+Loyi a milisako byanyi+ lomu zvitsungeni.
9 Wa zvi nyika zvakuga a zvihari,+Ni mavhinyani ya zvikunguwa ma rilako hi ndlala.+
10 A nga tsakiswi hi ntamu wa haxi;+Ne hambu ku hlamaliswa hi minenge yo tiya ya munhu.+
11 Jehovha i tsakiswa hi lava va mu chavako,+Lava va rindzelako a lirandzo lakwe li nga mbheliko.+
12 Dzundza Jehovha, O Jerusalema.
Dhumisa a Nungungulu wa wena, O Ziyoni.
13 I tiyisa a zvikwinyaro zva tinyangwa ta dhoropa ga wena,A katekisa a vana va wena va nga cikari ka wena.
14 I neha kurula lomu tikweni ga wena,+A ku xurisa hi trigo ya yinene nguvhu.+
15 I rumela cileletelo cakwe misaveni;A mhaka yakwe yi famba hi kutsutsuma.
16 I nisa a gapongo a ku khwatsi i woya;+I hangalasa a civera a ku khwatsi i khuma.+
17 I wisa a maralala yakwe a ku khwatsi matlhatlha ya pawa.+
Himani a nga tiyelako a cirami cakwe ke?+
18 I rumela a mhaka yakwe, ma nyeka.
I maha a moya wakwe wu pupuxa,+ a mati ma khulunga.
19 I hlawutela a mhaka yakwe ka Jakobe,Ni milayo yakwe ni kulamula kakwe ka Izrayeli.+
20 A ku na tiko gin’wani a nga gi mahela lezvo;+A ma tivi nchumu hi kulamula kakwe.
Dhumisani Jah!*+
Mitlhamuselo ya lahasi
^ Kutani: “Haleluya!” A ku “Jah” i vito gi komisilweko gaku Jehovha.
^ Kutani: “a ku mu chayela muzka”.
^ Kutani: “Haleluya!” A ku “Jah” i vito gi komisilweko gaku Jehovha.
