Tisimu 31:1-24
Ka muchuli. Lisimu la Dhavhidha.
31 O Jehovha, ndzi tsutsumela ka wena.+
Ndzi nga tshuki ndzi wisiwa tingana.+
Ndzi tlhatlhise hi kota ya kululama ka wena.+
2 Kangatela a ndleve ya wena ka mina.*
Hatlisa uta u ta ndzi tlhatlhisa.+
Ngha uva khokhola ga mina gi nga laha citsungeni,Uva wutshamu gi bhiyelweko kasi ku ndzi ponisa.+
3 Hakuva u ribye ga mina ni khokhola ga mina;+Hi kota ya vito ga wena+ u ta ndzi rangela u ndzi fambisa.+
4 U ta ndzi tlhatlhisa ntlhan’wini* lowu va ndzi dembeleko kufihlaleni,+Hakuva wena u khokhola ga mina.+
5 Ndza nyikela a moya wa mina canjeni ga wena.+
O Jehovha, Nungungulu wa lisine,* u ndzi tlhatlhisile.+
6 Ndza va venga lava va khozelako zvifananiso zvi nga vhuniko nchumu ni zvi nga nyawuliko,Kanilezvi mina ndzi tsumba Jehovha.
7 Ndzi ta tsaka nguvhu hi kota ya lirandzo la wena li nga mbheliko,Hakuva u wonile a hlomulo wa mina;+Wa ku tiva a kukarateka ka mina ka hombe.*
8 A wu ndzi nyikelangi canjeni ga nala,Kanilezvi u ndzi yimisile wutshan’wini go rula.*
9 O Jehovha, ndzi mahele wuxinji hakuva ndzi lomu kukaratekeni.
A matihlo ya mina ma mbhelile ntamu hi kota ya hlomulo,+ ni miri wa mina wontlhe.*+
10 A wutomi ga mina ga mbhela hi kubayiseka,+Ni malembe ya mina ma mbhela hi miketo.+
A ntamu wa mina wa mbhela hi kota ya kugoha ka mina,Ni marambu ya mina ma mbhela ntamu.+
11 Ndza poyiliwa hi valala va mina vontlhe,+Nguvhunguvhu hi vaakelani va mina.
Lava ndzi tivanako navo va ndzi chava,Loku va ndzi wona lahandle, vo ndzi tsutsuma.+
12 Ndzi humesilwe timbilwini* tabye ndzi rivaliwa a ku khwatsi ndzi nofa;Ndzi fana ni fuko yi fayekileko.
13 Ndzi zwile a mavalivali yo tala ya kubiha;A kuchava ka ndzi randzela.+
A cikhati va tlhanganako kasi ku ndzi vhukela,Va xuxa cikungo ca ku susa wutomi* ga mina.+
14 Kanilezvi mina ndzi tsumba wena, Jehovha.+
Ndzi ngalo: “Wena u Nungungulu wa mina.”+
15 A masiku* ya mina ma canjeni ga wena.
Ndzi tlhatlhise canjeni ga valala va mina ni canjeni ga lava va ndzi xanisako.+
16 A nghohe ya wena yi wa woningele a nandza ga wena.+
Ndzi ponise hi lirandzo la wena li nga mbheliko.
17 O Jehovha, ndzi nga wisiwi tingana laha ndzi ku vitanako.+
A vakubiha va wa wisiwe tingana;+Va wa miyetiwe Cilahleni.*+
18 Ngha a minomu leyi yi hembako yi vhaleka,+Leyi yi wulawulako hi matshandza yi vhukela a vakululama, hi kutikulisa ni kuchepeta.
19 Hi nga wona a kukula ka wunene ga wena!+
U gi vekele lava va ku chavako,+U gi kombisa mahlweni ka vanhu vontlhe, na u mahela lava va chavelako ka wena.+
20 U ta va fihla wutshan’wini ga cihundla gi nga mahlweni ka wena+Kule ni zvikungo zva vanhu;U ta va fihla wuchavelweni ga wenaKule ni zvisolo zva kubiha.*+
21 I wa dhumiswe Jehovha,Hakuva i ndzi kombisile a lirandzo lakwe li nga mbheliko+ hi ndlela yo hlamalisa dhoropeni gi randzelweko.+
22 Mina ndzi no chava, ndziku:
“Ndzi ta lova mahlweni ka wena.”+
Kanilezvi wena u zwile a kukhongotela ka mina ka ku lava ku vhuniwa laha ndzi nga ku rilela.+
23 Randzani Jehovha, n’wentlhe n’wina mu tsumbekako kakwe!+
Jehovha i vhikela lava va tsumbekileko,+Kanilezvi i mu tlhelisela hi ndlela yo bava nguvhu loyi a ti kulisako.+
24 Tiyani hlanha, mu tiyisa timbilu,+N’wina n’wentlhe mu rindzelako Jehovha.+
Mitlhamuselo ya lahasi
^ Kutani: “Korama, u ndzi ingisela”.
^ Hi kukongoma: “ka likoka”.
^ Kutani: “Nungungulu wo tsumbeka”.
^ Kutani: “a zvikarato zva muhefemulo wa mina”.
^ Kutani: “wutshan’wini go anama”.
^ Kutani: “ni muhefemulo wa mina ni khwiri ga mina”.
^ Kutani: “maalakanyweni”.
^ Kutani: “muhefemulo”.
^ Hi kukongoma: “zvikhati”.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Hi kukongoma: “Ka tirimi ti holovako”.