Tisimu 34:1-22
Lisimu la Dhavhidha, a cikhati leci a nga ti cica a mahisa ku khwatsi munhu wo hlanya kasi va nga mu poli+ mahlweni ka Abhimeleki, loyi a nga mu hlongola a famba.
א [álefe]
34 Ndzi ta dhumisa Jehovha contlhe cikhati;A wudzundzo gakwe gi tava minon’wini ya mina contlhe cikhati.
ב [bete]
2 Ndzi* ta ti dzundza hi Jehovha;+A vakurula va ta zvizwa va tsaka.
ג [guímel]
3 Dhumisani Jehovha zvin’we na mina;+A hi gi kuliseni zvin’we a vito gakwe.
ד [dálete]
4 Ndzi no wutisa Jehovha, yena a ndzi hlamula.+
I ndzi tlhatlhisile kuchaveni ka mina kontlhe.+
ה [hê]
5 Lava va nga mu cuwuka va no ngangamela hi kutsaka;A tinghohe tabye ti wa nga hi na ku wisiwa tingana.
ז [zaine]
6 A cisiwana leci ci no vitana, Jehovha a zvizwa.
I no ci ponisa kuxanisekeni ka cona kontlhe.+
ח [hete]
7 A ngilozi ya Jehovha yi gova yi randzela lava va mu chavako,+Yi va ponisa.+
ט [tete]
8 Ringani mu wona lezvaku Jehovha mu nene;+Wa tsaka a munhu loyi a chavelako kakwe.
י [iode]
9 Chavani Jehovha, n’wina n’wentlhe vabasileko vakwe;Hakuva lava va mu chavako a va vhumali nchumu.+
כ [cafe]
10 Hambu a zvinghalana* zva ntamu zva sokola hi ndlala,Kanilezvi lava va hlotako Jehovha va nga ta vhumala nchumu wa wunene.+
ל [lâmede]
11 Tanani vana vanga, ndzi ingiseleni;Ndzi ta mu gondzisa a kuchava Jehovha.+
מ [meme]
12 Himani cikari ka n’wina a tsakisiwako hi wutomi,Loyi a navelako ku wona a masiku yo tala ya manene ke?+
נ [nune]
13 Makunu hlayisa a lirimi la wena ka zvakubiha,+Ni minomu ya wena ka ku wulawula magezu ya kukhohlisa.+
ס [sâmeque]
14 Fularela zvakubiha, u maha zvazvinene;+Hlota kurula, u ku landzela.+
ע [aine]
15 A matihlo ya Jehovha ma hehla ka valulamileko,+Ni tindleve takwe ti ingisela a kurila kabye ka ku lava ku vhuniwa.+
פ [pê]
16 Kanilezvi a nghohe ya Jehovha yi vhukela lava va mahako zvakubiha,Kasi ku vhinya a cialakanyiso cabye contlhe laha misaveni.+
צ [tsadê]
17 Va* no rila, Jehovha a vazwa;+I no va tlhatlhisa kuxanisekeni kabye kontlhe.+
ק [cofe]
18 Jehovha i kusuhani ni lava va pandzekileko timbilu;+I hanyisa lava va nga ni moya wu tshovekileko.*+
ר [rexe]
19 A zvikarato* zva loyi a lulamileko zvi tele,+Kanilezvi Jehovha wa mu tlhatlhisa ka zvontlhe.+
ש [chim]
20 Wa hlayisa a marambu yakwe wontlhe;A ku na rambu ni gin’we gi tshovilweko.+
ת [tau]
21 A khombo gi ta daya a munhu wa kubiha;Lava va vengako a vanhu va kululama va ta koniwa.
22 Jehovha wa tlhatlhisa a wutomi* ga malandza yakwe;I hava a chavelako kakwe a to koniwa.+
Mitlhamuselo ya lahasi
^ Kutani: “A muhefemulo wa mina wu”.
^ Kutani: “zvinghalana zva malevhu”.
^ Ku nga valulamileko.
^ Kutani: “va mbhelileko ntamu”.
^ Kutani: “makhombo”.
^ Kutani: “muhefemulo”.