Tisimu 38:1-22
Lisimu la Dhavhidha, kasi liva cialakanyiso.*
38 O Jehovha, u nga ndzi kawuki zangeni ya wena,Ne u nga ndzi luleki khulweni ga wena.+
2 Hakuva a mipaxa ya wena yi ndzi tlhavile yi nghena ndzeni ka mina,Ni canja ga wena ga ndzi bindza.+
3 A miri wa mina wontlhe wa babya* hi kota ya zanga ya wena.
A marambu ya mina a ma ruli hi kota ya ciwonho ca mina.+
4 A zvigoho zva mina zvi hundza ni hloko ya mina;+A ku fana ni ndzhwalo wo bindza, zvi tele nguvhu kasi ku zvi rwala.
5 A zvilondza zva mina zva nuha ni ku huma wubovhuHi kota ya wupumbu ga mina.
6 Ndzi karatekile, ndzi xukuvala nguvhu;Ndzi fambafamba na ndzi bayisekile gontlhe siku.
7 Lomu ndzeni ka mina ka vhura;*A miri wa mina wontlhe wa babya.+
8 Ndzi rerekile ndzi pfotloka;Ndza keta nguvhu* hi kota ya kupandza ka mbilu ya mina.
9 O Jehovha, kontlhe a kuxuva ka mina ku mahlweni ka wena,Ni miketo ya mina a yi ku fihlaleli.
10 A mbilu ya mina ya bhikitana; a ntamu wa mina wu mbhelile,Ni kuwona ka matihlo ya mina ku ndzi tsikile.+
11 A vanghana va mina ni maxaka ya mina va ndzi venga hi kota ya ntungu wa mina,Ni vaakelani va mina va yima hi le kule.
12 Lava va hlotako a wutomi* ga mina va demba mitlhamu;Lava va zamako ku ndzi vangela mhango va wulawula kubiha;+Gontlhe siku, va tshama hi ku alakanyela ku kanganyisa.
13 Kanilezvi a ku fana ni munhu wa kufa tindleve, a ndzi ingiseli;+A ku fana ni munhu wo kala ku wulawula, a ndzi vhululi a nomu wa mina.+
14 Ndzi fana ni munhu wo kala kuzwa,Loyi a nomu wakwe wu nga hava gezu ga ku ti yimela hi gona.
15 O Jehovha, ndzi no rindzela wena;+Wena u ndzi hlamula, O Jehovha, Nungungulu wa mina.+
16 Hakuva ndzi te ngalo: “Ngha va nga giyagiyi ha mina,Hambu ku ti kulisa ha mina loku a mikondzo ya mina yi retemuka.”
17 Hakuva kutsongwani ndzi wa lava kuwa,Niku ndzi wazwa kubayisa contlhe cikhati.+
18 Ndzi no wulela a cigoho ca mina;+Ndzi wa xaniswa hi ciwonho ca mina.+
19 Kanilezvi a valala va mina va tiyile* niku va na ni ntamu;*Va tele lava va ndzi vengako ahandle ka cigelo.
20 Va ndzi tlhelisele a wunene hi kubiha;Va lwile na mina hi lezvi ndzi hlotako zvazvinene.
21 O Jehovha, u nga ndzi tsiki.
O Nungungulu, u nga tshameli kule na mina.+
22 Hatlisa u ndzi vhuna,O Jehovha, wena kuhanyiswa ka mina.+
Mitlhamuselo ya lahasi
^ Kutani: “kasi li alakanyisa”.
^ Hi kukongoma: “A ku na laha ku nga ku nene nyameni ya mina”.
^ Hi kukongoma: “A ciwunu ca mina ci tele hi ndzilo”.
^ Kutani: “Ndzaba huwa”.
^ Kutani: “muhefemulo”.
^ Hi kukongoma: “va hanya”.
^ Zvi nga maha na zvi wula ku: “Kanilezvi lava va nga valala va mina ahandle ka cigelo va tele”.
