Tisimu 49:1-20
Ka muchuli. Lisimu la vana va Kora.+
49 Zwanani lezvi, n’wina n’wentlhe matiko.
Dembani ndleve, n’wina n’wentlhe vahanyi va tiko,
2 A vatsongwani ni vahombe,*A zviganyi ni zvisiwana.
3 A nomu wa mina wu ta wulawula wutlhari,Ni kuehleketa ka mbilu ya mina+ ku ta kombisa a kupimisisa.
4 Ndzi ta demba ndleve ka vingu,Ndzi landzula a litekatekani la mina hi citende.
5 Ndzi ta chavela yini zvikhatini zva zvikarato,+A cikhati leci ndzi to randzelwa hi kubiha* ka lava va zamako ku ndzi wisa ke?
6 Lava va tsumbako a titshomba tabye,+Ni lava va ti kulisako hi titshomba tabye to tala,+
7 I hava ni mun’we wabye a nga tlhatlhisako a makabyeKutani ku mu humesela a hakhelo ya kutlhatlhisa mahlweni ka Nungungulu,+
8 (A ntsengo wa hakhelo ya ku tlhatlhisa a wutomi* gabye wa lisima nguvhu,Laha ka ku va nga ta tshuka va zvi kota ku wu humesa);
9 Kasi a hanya kala kupindzuka, a nga woni nkele.*+
10 Hakuva a munhu wa zvi wona lezvaku hambu a titlhari tafa;A cipumbu ni munhu a nga hava kupimisisa va lova zvin’we,+Va va siyela titshomba tabye van’wani.+
11 A timbilu tabye ti navela ku a tiyindlu tabye ti tshama kala kupindzuka,A matenda yabye ma simama ka cizukulwana ni cizukulwana.
Va ma chulile a mavito yabye a matiko yabye.
12 Kanilezvi hambu loku a munhu a dzundziwa a nga ta pindzuka;+A nga zvi hundzi hi nchumu a zvihari lezvi zvi lovako.+
13 Leyi i ndlela ya zvipumbu+Ni ya lava va zvi landzelako, lava va tsakisiwako hi timhaka tabye ti nga vhuniko nchumu. (Sela)
14 Va konelwe kuya Cilahleni* a ku khwatsi tiyivhu.
A kufa ku ta va risa;Loyi a lulamileko i ta va fumela+ ni mixo.
Yontlhe a mimiri yabye yi ta lova;+A Cilahla*+ hi cona ci tova muti wabye, na ku nga hi yindlu ya wuhosi.+
15 Kanilezvi Nungungulu i ta ndzi tlhatlhisa* canjeni* ga Cilahla,*+Hakuva i ta ndzi wokola. (Sela)
16 U nga chavi loku a munhu a ganya,Ni loku a wudzundzo ga yindlu yakwe gi andza,
17 Hakuva a cikhati a tofa a nga ta teka nchumu;+A wudzundzo gakwe gi nga ta relela naye.+
18 Hakuva kuhanyeni kakwe wa ti dzundza ha yece.*+
(A vanhu va ku dzundza loku u ganya.)+
19 Kanilezvi hi kugumesa i ti patsa ni cizukulwana ca vakokwani vakwe.
Va nga ta ha tshuka va wona kuwonekela.
20 A munhu a nga yi zwisisiko a mhaka leyi, hambu loku a dzundziwa,+A nga zvi hundzi hi nchumu a zvihari lezvi zvi lovako.
Mitlhamuselo ya lahasi
^ Hi kukongoma: “A vana va vanhu ni vana va munhu”.
^ Hi kukongoma: “cigoho”.
^ Kutani: “muhefemulo”.
^ Kutani: “cilahla”.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “tlhatlhisa a muhefemulo wa mina”.
^ Kutani: “ntan’wini”.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “i dzundza muhefemulo wakwe”.