Tisimu 51:1-19
Ka muchuli. Lisimu la Dhavhidha, a cikhati leci muphrofeti Natani a ngaya kakwe andzhako ka loku Dhavhidha a etlele na Bhatexebha.+
51 O Nungungulu, ndzi mahele wuxinji maringano ni lirandzo la wena li nga mbheliko.+
Vhinya a zvihambunyeto zva mina maringano ni wuxinji ga wena ga hombe.+
2 Ndzi hlazve hi kumbhelela cigohweni ca mina,+U ndzi basisa ciwonhweni ca mina.+
3 Hakuva ndza zvi tiva khwatsi a zvihambunyeto zva mina,Ni ciwonho ca mina ci mahlweni ka* mina contlhe cikhati.+
4 Ndzi ku wonhele, ina, ndzi wonhele wena a ku hundza vontlhe;*+Ndzi mahile lezvi zvi bihileko mahlweni ka wena.+
Hikwalaho, u lulamile loku u wulawula,U lulamile kulamuleni ka wena.+
5 Ndzi pswalilwe na ndzi hi ni nandzu wa cigoho,Ni mamani wa mina i xurile nyimba ya mina ciwonhweni.*+
6 U tsakisiwa hi lisine mbilwini ya munhu;+Gondzisa a mbilu ya mina a wutlhari ga lisine.
7 Ndzi basise ciwonhweni ca mina hi hisope* kasi ndzi basa;+Ndzi hlazve kasi ndzi basa a ku hundza ni gapongo.+
8 Ndzi tsike ndzizwa a guwa ga litsako ni mikulungwani,Kasi a marambu lawa u ma fayeteleko ma tsaka.+
9 Hambukisa* a nghohe ya wena ka zviwonho zva mina,+U vhinya* zvontlhe a zvigoho zva mina.+
10 O Nungungulu, ndzi vangele a mbilu yi basileko,+U chela ndzeni ka mina a moya wuswa,+ a moya wa kutiya.
11 U nga ndzi hoxi kule na wena,Ne u nga ndzi suseli a moya wa wena wo basa.
12 Ndzi vhuxele a litsako la kuhanyisa ka wena;+U hlanganyetela ndzeni ka mina a moya wa ku ku ingisa.*
13 Ndzi ta va gondzisa a tindlela ta wena a vahambunyeti,+Kasi a vawonhi va hundzuluka va wuya ka wena.
14 O Nungungulu, ndzi ponise ka nandzu wa nkhata,+ wena Nungungulu wa kuhanyiswa ka mina,+Kasi a lirimi la mina li hlawutela a kululama ka wena hi kutsaka.+
15 O Jehovha, vhulula a minomu ya mina,Kasi a nomu wa mina wu huwelela a kudhumiswa ka wena.+
16 Hakuva a wu lavi muphahlo, loku zvi wa nga hi lezvo, ndzi wa ta ku nyika wona;+A wu tsakiswi hi munyikelo wa kuhiswa wa murumba.+
17 A miphahlo yi tsakisako Nungungulu i moya wu tshovekileko;O Nungungulu, u nga ta nyenya* a mbilu yi tshovekileko ni leyi yi pandzekileko.+
18 Wuneneni ga wena maha lezvi zvi nga zvinene ka Ziyoni;Aketa a makhurisi ya Jerusalema.
19 Makunu u ta xalaliswa hi miphahlo ya kululama,A miphahlo ya kuhiswa ni minyikelo ya murumba;Makunu, a tihomu ti ta nyikelwa alatini ga wena.+
Mitlhamuselo ya lahasi
^ Kutani: “maalakanyweni ya”.
^ Hi kukongoma: “wena wece”.
^ Kutani: “Ndzi muwonhi kusukela loku mamani a xurile nyimba ya mina”.
^ Kutani: “Fihla”.
^ Kutani: “fuvisa”.
^ Hi kukongoma: “U ndzi tiyisa hi moya wu vhumelako”.
^ Kutani: “chepeta”.