Tisimu 55:1-23
Ka muchuli; kasi li yimbelelwa na ku biwa zvichaya-chaya zva tingoti. Maxili* ya Dhavhidha.
55 O Nungungulu, ingisela a mukhongelo wa mina,+U nga ti vhali tindleve ka cikombelo ca mina ca ku lava ku mahelwa wuxinji.*+
2 Chela kota hi mina, u ndzi hlamula.+
A kukarateka ka mina a ku ndzi nyiki kurula,+Ndzi jujekile kupima
3 Hi kota ya lezvi a nala a zvi wulakoNi lezvi a vakubiha va ndzi karatako.
Hakuva va wungeletela zvikarato hehla ka mina,Va ndzi vekela civiti na va zangarile.+
4 A mbilu ya mina ya bayisa ndzeni ka mina,+Ni kuchava kufa ka ndzi bindza.+
5 A kuchava ni kururumela zvi wela hehla ka mina,Ni kururumela ka ndzi fenengeta.
6 Ndzi tshama hiku: “Loku ndzi wova ni tipapa a ku fana ni cipomba!
Ndzi wa ta puruma ndziya kule ndzi ya hanya kuruleni.
7 Ndzi wa ta tsutsuma ndziya kule,+
Ndzi ya tshama ciwuleni.+ (Sela)
8 Ndzi wa ta hatlisa ndziya wuchavelweni,Ndziya kule ni moya wa hombe, kule ni cingulo.”
9 O Jehovha, va vhilinganyise, u thinda makungo yabye,*+Hakuva ndzi wonile tihanyi ni tiholova lomu dhoropeni.
10 Mumu ni wusiku va rendzelekela a makhurisi ya gona;Ndzeni ka gona ku na ni kubiha ni zvikarato.+
11 Lomu ndzeni ka gona ku na ni khombo;A kuxanisiwa ni kukanganyisa a zvi tshuki zvi suka lomu maprasa* ya gona.+
12 Hakuva loyi a ndzi rukako a hi nala;+Loku i wa hi nala, ndzi wa ta zvi timisela.
Loyi a ndzi vhukelako a hi nala;Loku i wa hi nala, ndzi wa ta mu fihlala.
13 Kanilezvi hi wena, a munhu wo khwatsi hi mina,+A munghana wa mina loyi ndzi mu tivako khwatsi.+
14 Hi wa ti buza hi wunghana go tsakisa;Hi wa famba zvin’we ni citshungu hiya ndlwini ya Nungungulu.
15 Ngha a kulovisa ku va kuma!+
Va wa relele Cilahleni* na va ha hanya;Hakuva a kubiha ku tshama cikari kabye ni ndzeni kabye.
16 Kanilezvi mina ndzi ta rila ka Nungungulu,Na Jehovha i ta ndzi ponisa.+
17 Laha wusikwini, ni laha mixweni, ni laha hlikanhini ndza karateka ndzi keta,+Na yena wazwa a gezu ga mina.+
18 I ta ndzi tlhatlhisa,* a ndzi nyika kurula mahlweni ka lava va lwako na mina,Hakuva va tele lava va ndzi vhukelako.+
19 Nungungulu i ta zvizwa, a va hlamula,+Loyi cima ka kale a tshamileko citshan’wini ca wuhosi.+ (Sela)
Va ta ala ku cica,Lava va nga chaviko Nungungulu.+
20 I* vhukele lava va nga hi ni kurula naye,+A tshova a civhumelwano cakwe.+
21 A magezu yakwe ma olova a ku hundza matega,+Kanilezvi mbilwini yakwe ku na ni tiholova.
A magezu yakwe ma olova a ku hundza mafura,Kanilezvi wona zvipadha zvi hlomulilweko.+
22 Hoxela* a ndzhwalo wa wena ka Jehovha,+I ta ku seketela.+
A nga ta tshuka a tsika a wakululama awa.*+
23 Kanilezvi wena Nungungulu, u ta va relelisa nkeleni wo eta nguvhu.+
Lava va nga ni nandzu wa nkhata ni vakanganyisi va nga ta hanya khihlanya ga masiku yabye.+
Kanilezvi mina ndzi ta tsumba wena.
Mitlhamuselo ya lahasi
^ Kutani: “U nga ti fihli loku ndzi khongela ndzi kombela ku vhuniwa”.
^ Hi kukongoma: “u avanyisa lirimi labye”.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “I ta tlhatlhisa muhefemulo wa mina”.
^ Ku nga munghana wakwe wa kale a kumbukilweko ka vs. 13 ni 14.
^ Kutani: “Nyikela”.
^ Kutani: “a dhedhereka; a tsekatseka”.