Tisimu 60:1-12
Ka muchuli wa “Khon’wa ga Cialakanyiso”. Miktamu* ya Dhavhidha ya ku gondzisa, a cikhati leci a ngalwa na Aramu-Naharayime na Aramu-Zobha, Jowabe a wuya a ta daya a 12 000 wa vaEdhome Nkoveni wa Munyu.+
60 O Nungungulu, wena u hi tsikile; u hi hangalasile.+
U wa hi zangarele; kanilezvi zvezvi hi amukele!
2 U tsekatsekisile misava, u yi pandza.
Vhala a tifa ta yona hakuva ya khungumuka.
3 U mahile ku a vanhu va wena va xaniseka.
U hi nwisile a vhinyo yi hi dhedherekisako.+
4 Va nyike* cikombiso lava va ku chavako,Kasi va tsutsuma va vhika wura. (Sela)
5 Kasi a varandzekako va wena va tlhatlhiswa,Hi ponise hi canja ga wena ga cinene niku hi hlamule.+
6 Nungungulu i wulawulile kubaseni kakwe,* aku:
“Ndzi ta kulungela, ndzi nyikela Xekemi ava tshomba,+Niku ndzi ta pima a Nkova wa Sukote.+
7 Gileyadhe wa mina, a ku khwatsi hi Manase,+Na Efrayime i kapasete* ga hloko ya mina;Judha i nhonga ya mina ya wukomandante.+
8 Mowabhi i basiya ya mina yo hlambela.+
Hehla ka Edhomi, ndzi ta hoxa a sandalia ga mina.+
Hehla ka Filistiya, ndzi ta kanyuluka ndzi giya.”+
9 Himani a to ndzi yisa dhoropeni gi randzelweko?*
Himani a to ndzi rangela kala Edhomi?+
10 A hi wena Nungungulu, wena loyi u hi tsikileko,A Nungungulu wa hina, loyi a nga ha humiko zvin’we ni mabutho ya hina ke?+
11 Hi vhune hlomulweni wa hinaHakuva a kuhanyisa ka munhu a ku vhuni nchumu.+
12 Hi ta kuma ntamu hi ka Nungungulu,+Niku yena i ta kandzihetela a valala va hina.+
Mitlhamuselo ya lahasi
^ Zvi nga maha na zvi wula ku: “U va nyikile”.
^ Zvi nga maha na zvi wula ku: “wutshan’wini gakwe go basa”.
^ Hi kukongoma: “khokhola”.
^ Zvi nga maha na zvi wula ku: “gi vhikelweko khwatsi”.
