Tisimu 69:1-36
Ka muchuli wa “Makhon’wa”. Lisimu la Dhavhidha.
69 O Nungungulu, ndzi ponise hakuva a mati ma tshinelele a muhefemulo* wa mina.+
2 Ndzi phowomele lomu madhakeni yo eta, ka ku a ku na ko kandzihela kona.+
Ndzi nghenile lomu matini yo eta,Ndzi kokiwa hi mati ya ntamu.+
3 Ndzi karele hi ku vitana,+Ni nkolo wa mina wu womile.
A matihlo ya mina ma karala laha ndzi rindzelako a Nungungulu wa mina.+
4 Lava va ndzi vengako mahala+Va tele a ku hundza a misisi ya hloko ya mina.
Lava va lavako ku ndzi daya,Va nga valala va mina va vakanganyisi,* va tele nguvhu.
Ndzi kurumetilwe ku tlhelisa zvilo zvo kala ndzi nga yivangi.
5 O Nungungulu, wena wa gi tiva a wupumbu ga mina,Ni nandzu wa mina a wu ku fihlalelangi.
6 Ngha lava va ku tsumbako va nga wisiwi tingana hi kota ya mina,O Hosi ya Hombe, Jehovha wa mabutho.
Lava va ku hlotako va nga koramiswi hi kota ya mina,O Nungungulu wa Izrayeli.
7 Ndza rukatelwa hi kota ya wena;+A tingana ti fenengeta a nghohe ya mina.+
8 Ndzi mahile mupfhumba ka vamakabye va mina,Ni muluveli ka vana va mamani wa mina.+
9 A kutitsitsirita hi yindlu ya wena ka ndziga,+Ni zviruko zva lava va ku rukatelako zvi wela mina.+
10 A cikhati leci ndzi nga ti koramisa hi kupfhunga,*Ndzi no rukiwa hi kota ya lezvo.
11 A cikhati leci ndzi nga boha tisakwa,Ndzi no maha cihlekiso* kabye.
12 Lava va tshamako laha nyangweni ya dhoropa va bhula hi mina,Ni zvidhakwa zvi ndzi maha lisimu la zvona.
13 Kanilezvi a mukhongelo wa mina wu wa chikele ka wena,+Hi cikhati ci amukelekako, O Jehovha.
O Nungungulu, hi kota ya lirandzo la wena la hombe li nga mbheliko,Ndzi hlamule hi mitiro ya wena yo tsumbeka ya kuhanyisa.+
14 Ndzi humese lomu madhakeni;U nga ndzi tsiki ndzi phowomela.
Ndzi tlhatlhise ka lava va ndzi vengakoNi ka mati yo eta.+
15 U nga ndzi tsiki ndzi kokiwa hi mati ya ndambi,+Ne u nga tsiki a kueta ku ndzi mita,Ne hambu ku tsika a hlowo* yi vhala a nomu wa yona hehla ka mina.+
16 O Jehovha, ndzi hlamule, hakuva a lirandzo la wena li nga mbheliko li nene.+
Hundzuluka u ndzi cuwuka hi kuya hi wuxinji ga wena ga hombe,+
17 U nga gi fihleli a nghohe ya wena a nandza ga wena.+
Hatlisa u ndzi hlamula, hakuva ndzi lomu kukaratekeni.+
18 Tshinela ka mina, u ndzi tlhatlhisa;*Ndzi tlhatlhise hi kota ya valala va mina.
19 Wena wa ci tiva a ciruko ca mina, ni tingana ta mina, ni kuchepetiwa ka mina.+
Vontlhe a valala va mina wa va wona.
20 A ciruko ci pandzile a mbilu ya mina niku a cilondza ca kona a ci tireki.*
Ndzi wa rindzela ku zwelwa wusiwana kanilezvi i hava a nga ndzi zwela,+Ni vachaveleli, kanilezvi a ndzi kumangi ne mun’we.+
21 Wutshan’wini ga zvakuga va no ndzi nyika vhenene,*+Va ndzi nyika a vhinagre kasi ndzi tima tora.+
22 Ngha a meza yabye yiva ntlhamu kabye,Ni kuganya kabye kuva lizinga.+
23 A matihlo yabye ma wa phume kasi va nga woni,Ni zviwunu zvabye zvi wa tshame hi ku rurumela.
24 Va chululele a khulo ga wena,Ni zanga ya wena yi vhurako yi wa va kume.+
25 A wugovelo gabye* gi wa mahe rumbi;Ku ngavi ni munhu a tshamako matendeni yabye.+
26 Hakuva va hlongolisela loyi u mu bileko,Va tshama hi ku wulawula hi kubayisa ka lava u va bayisileko.
27 Engetela a nandzu hehla ka nandzu wabye;Va nga hlengeli kululameni ka wena.
28 Va wa vhinyiwe bhukwini ga vahanyako,*+Va nga tsaliwi zvin’we ni valulamileko.+
29 Kanilezvi, mina ndzi lomu hlomulweni ni kubayisekeni.+
O Nungungulu, a ntamu wa wena wa kuponisa wu wa ndzi vhikele.
30 Ndzi ta yimbelela a tisimu ta ku dhumisa a vito ga Nungungulu;Ndzi ta mu kulisa hi kubonga.
31 Lezvo zvi ta mu tsakisa nguvhu Jehovha a ku hundza a madhuna ya tihomu,+Ni ku hundza a cidhunana ci nga ni timhondzo ni zvinyondzwani.
32 A vakurula va ta zvi wona va tsaka.
N’wina lava mu hlotako Nungungulu, a timbilu ta n’wina ti wa tangale.
33 Hakuva Jehovha wa ingisela a cisiwana;+A nga ta chepeta a vanhu vakwe va khomilweko.+
34 A tilo ni misava zvi wa mu dhumise,+A mabimbi ni zvontlhe zvi fambako lomo.
35 Hakuva Nungungulu i ta ponisa Ziyoni,+A aketa a madhoropa ya Judha;Va ta hanya lomo yiva tshomba* yabye.
36 A pswalo wa malandza yakwe wu ta gi maha tshomba yabye,+Ni lava va randzako a vito gakwe+ va ta tshama lomo.
Mitlhamuselo ya lahasi
^ Kutani: “Va nga valala va mina ahandle ka cigelo”.
^ Kutani: “kujejuwara”. Zvi nga maha na zvi wula ku: “A cikhati leci ndzi nga rila ndzi pfhunga”.
^ Hi kukongoma: “vingu”.
^ Kutani: “nkele”.
^ Kutani: “Tshinela ka muhefemulo wa mina u wu lwela”.
^ Kutani: “niku a ndzi ci tivi ni co maha”.
^ Kutani: “sinya ya vhenene”.
^ Kutani: “A wugovelo gabye gi bhiyelweko”.
^ Kutani: “bhukwini ga wutomi”.
^ Ku nga tiko.