Tisimu 78:1-72
-
A kukhatala ka Nungungulu ni kungakholwi ka vaIzrayeli
Maxili* ya Asafa.+
78 N’wina vanhu va mina, ingisani a nayo* wa mina;Dembani ndleve ka magezu ya nomu wa mina.
2 Ndzi ta vhulula a nomu wa mina hi vingu.
Ndzi ta hlawutela a titekatekani ta kaleloko.+
3 A zvilo lezvi hi nga zvizwa, hi zvi tiva,Lezvi a vapapayi va hina va hi hlawuteleko,+
4 Hi nga ta zvi fihlela a vana vabye;Hi ta hlawutela a cizukulwana ca ha tako+A mitiro yo dzundzeka ya Jehovha ni ntamu wakwe,+A zvilo zvo hlamalisa lezvi a zvi mahileko.+
5 I yimisile cialakanyiso ka Jakobe,A yimisa nayo ka Izrayeli,A leletela a vakokwani va hinaLezvaku va tivisa a zvilo lezvi ka vana vabye+
6 Kasi a cizukulwana ca ha tako,A vana lava va to pswaliwa, ci zvi tiva.+
Vonawu va ta zvi hlawutela a vana vabye,+
7 Makunu va wa ta tsumba Nungungulu,
Va nga rivali a mitiro ya Nungungulu+Kanilezvi va hlayisa a zvileletelo zvakwe.+
8 Makunu va wa nga ta fana ni vakokwani vabye,A cizukulwana ca tinhamu to nonoha, ci nga ingisiko,+A cizukulwana ca mbilu yo kala ku tiya,*+Lava a moya wabye wu nga kala ku tsumbeka ka Nungungulu.
9 A va ka Efrayime va wa hlomile a mawura,Kanilezvi va no tlhelela ndzhako sikwini ga yimpi.
10 A va hlayisangi a civhumelwano ca Nungungulu,+Ne a va vhumelangi ku famba nayweni wakwe.+
11 Va no tlhela va rivala lezvi a nga mahile,+A mitiro yakwe yo hlamalisa leyi a nga va komba.+
12 I mahile zvihlamaliso mahlweni ka vakokwani vabye,+Le tikweni ga Gibhite, a Zowane.+
13 I no avanyisa bimbi kasi va tlhatuka,A yimisa mati ma ku khwatsi i khurisi.*+
14 Ni hlikanhi, i no va rangela hi refu,A wusiku gontlhe a va rangela hi kuwonekela ka ndzilo.+
15 I pandzile maribye lomu ciwuleni,A va nyika mati vanwa va kolwa, a ku khwatsi i mati ya lomu kueteni.+
16 I bhoxile micongo laha ribyeni,A khulungisa mati a ku khwatsi micongo.+
17 Kanilezvi va no simama ku mu wonhelaHi ku nga ingisi Loyi a Tlakukileko ku Hundza Vontlhe lomu ciwuleni;+
18 Va no ringa Nungungulu lomu timbilwini tabye+Hi ku mu londza zvakuga* lezvi va nga zvi mbilukela.
19 Hikwalaho, va no wulawula kubiha hi Nungungulu,Vaku: “Nungungulu a nga longisela meza lomu ciwuleni ke?”+
20 I bile ribyeKu huma mati, ku khulunga micongo.+
“A nga zvi kota ku hi nyika ni zvakuga* kambe ke?Kutani a nga va nyika nyama a vanhu vakwe ke?”+
21 Laha Jehovha a nga vazwa, i no zangara nguvhu;+A ndzilo+ wu no vhurela Jakobe,Ni zanga yakwe yi no vhindlukela Izrayeli+
22 Hakuva a va kholwangi ka Nungungulu;+A va tsumbangi a ntamu wakwe wa ku va ponisa.
23 Hikwalaho, i no laya marefu le hehla,A vhulula a tivati ta tilo.
24 I no simama ku va nisela a mana kasi vaga,A va nyika mbewu ya le tilweni.+
25 A vanhu va noga zvakuga* zva tinhenha;*+I no va nyika zvakuga zvo enela kasi vaga va xura.+
26 I no vhuxa moya wa cikobani* le matilweni,A maha a moya wa le dzongeni* wu pupuxa hi ntamu wakwe.+
27 I no va nisela nyama a ku khwatsi i ntshuri,Ni zvinyanyani a ku khwatsi misava ya mbhiri ya bimbi.
28 I no zvi wisela lomu wugovelweni gakwe,Matlhelweni wontlhe ya matenda yakwe.
29 Va noga va xura ku hundza mpimo;I no va nyika lezvi va nga zvi navela.+
30 Kanilezvi na va nga se daya a ndomba yabye,A zvakuga na zva ha hi minon’wini yabye,
31 A zanga ya Nungungulu yi no va vhurela.+
I no daya a tinhenha tabye,+A wisa a majaha ya ka Izrayeli.
32 Hambulezvo va no engetela ku wonha,+A va kholwangi ka mitiro yakwe yo hlamalisa.+
33 Hikwalaho, i no mbheta a masiku yabye a ku khwatsi mova kuhefemula ntsena,+A mbheta ni malembe yabye hi kuchava ka citshuketi.
34 Kanilezvi khati ni khati a nga va daya, va wa mu lavetela;+Va wa hundzuluka va hlota Nungungulu,
35 Na va alakanya lezvaku Nungungulu i Ribye gabye,+Ni lezvaku Nungungulu, Loyi a Tlakukileko ku Hundza Vontlhe, Mutlhatlhisi* wabye.+
36 Kanilezvi va no zama ku mu kanganyisa hi minomu yabye,Va mu hembela hi tirimi tabye.
37 A timbilu tabye ti wa nga tiyangi kakwe,+Ne va wa nga tsumbeki ka civhumelwano cakwe.+
38 Kanilezvi i wa hi ni wuxinji;+I wa tsetselela* a cigoho cabye, a nga va lovisi.+
I no bohlisa a zanga yakwe zvikhati zvo tala,+Wutshan’wini ga ku chulula a khulo gakwe gontlhe.
39 Hakuva i no alakanya lezvaku vona i nyama,+A moya lowu wu bako wu hundza wu nga ha wuyi.*
40 Makhati mangani va nga mu hluwukela lomu ciwuleni+Va tlhela va mu zwisa kubayisa lomu livaleni ke?+
41 Va wa phindaphinda ku ringa Nungungulu,+Va pandzisa mbilu ya Loyi a Basileko wa Izrayeli.
42 A va alakanyangi a ntamu* wakweA siku legi a nga va tlhatlhisa ka nala,+
43 Ni zvikombiso zvakwe lezvi a nga maha le Gibhite,+Ni zvihlamaliso zvakwe le tikweni ga Zowane,
44 Ni lezvi a nga hundzulisa zvona a minonga ya Nilo yi maha nkhata,+Va tsandzeka kunwa a mati ya lomu micongweni yabye.
45 I no rumela a mabutho ya mabhowani kasi ma va hlasela,+Ni makhele kasi ma va lovisa.+
46 I nyikele a timbewu tabye ka humbi* yi lambileko,A mihandzu leyi va yi dzunukeleko ka butho ga humbi.+
47 I dele a mivhina* yabye hi maralala,+Ni mikuwu yabye hi vhula ya maralala.
48 I no nyikela a zvifuyo zvabye zva ku rwala mindzhwalo ka maralala,+Ni mitlhambi yabye ka zvingwalangwandla.*
49 I no vaba hi zanga yakwe yi vhurako,Ni khulo, ni kukwata, ni kukarateka;I no rumela a mabutho ya tingilozi kasi ma tisa khombo.
50 I yi vhululele ndlela a zanga yakwe.
A nga va ponisangi* kufeni;I no va nyikela* ka ntungu.
51 Hi kugumesa, i no daya a matewula wontlhe ya Gibhite,+A masangulo ya ntamu wabye wa kupswala lomu matendeni ya Hamu.
52 I no humesa a vanhu vakwe a ku khwatsi i ntlhambi,+A va rangela a ku khwatsi tiyivhu lomu ciwuleni.
53 I no va rangela a va vhikela,Va wa nga chavi nchumu;+A bimbi gi no fenengeta a valala vabye.+
54 I no va tisa tikweni gakwe go basa,+A tiko ga zvitsunga legi a gi kumileko hi canja gakwe ga cinene.+
55 I no hlongola matiko mahlweni kabye,+A va avelela tshomba hi lingoti la ku pima hi lona;+I no yimisa a tixaka ta ka Izrayeli mitini yabye.+
56 Kanilezvi va no simama ku ringa Nungungulu, Loyi a Tlakukileko ku Hundza Vontlhe, va mu hluwukela;+A va dembangi ndleve ka zvikhumbuxeto zvakwe.+
57 Vonawu va no hambuka, va kanganyisa a ku khwatsi hi vakokwani vabye.+
A ku fana ni wura go dzeseka, va wa nga tsumbeki.+
58 Va no simama ku mu khunguvanyisa hi matshamu yabye ma tlakukileko,+Va vhindlusa a zanga* yakwe hi zvifananiso zvabye zvi kehlilweko.+
59 Nungungulu i no zvizwa a zangara,+Hikwalaho, i no tsika vaIzrayeli hi kumbhelela.
60 Hi kugumesa, i no tsika a tabhernakeli ga Xilo,+A tenda legi a nga tshamile ka gona cikari ka vanhu.+
61 I tsikile a cikombiso ca ntamu wakwe ciya wukhumbini,Ni kungangamela kakwe ku wela canjeni ga nala.+
62 I no nyikela a vanhu vakwe ka cipadha,+A zangarela a tshomba yakwe.
63 A ndzilo wu no hihirita a majaha yakwe,Ni vanhwana* vakwe a va yimbelelwangi a tisimu ta muchadho.*
64 A vapristi vakwe va no dawa hi cipadha,+Ni vasati vabye a va va rilangi.+
65 Makunu Jehovha i no khindlimuka a ku khwatsi o vhuka hi wurongweni,+A ku khwatsi i nhenha+ yi kalamukako ka vhinyo.
66 I no hlongolisela a valala vakwe,+A va nyikela tinganeni ta kala kupindzuka.
67 I no ala a tenda ga Josefa;A nga hlawulangi a lixaka la ka Efrayime.
68 Kanilezvi i no hlawula lixaka la ka Judha,+A Citsunga ca Ziyoni leci a ci randzako.+
69 I no aka a wutshamu gakwe go basa gi pindzuka ku khwatsi matilo,*+Gi ku khwatsi misava leyi a yi yimisileko kala kupindzuka.+
70 I no hlawula Dhavhidha,+ a nandza gakweA mu humesa lomu marangeni ya tiyivhu,+
71 A mu susa kuhlayiseni ka tiyivhu ti an’wisako,A mu maha murisi wa Jakobe, a vanhu vakwe,+Ni wa Izrayeli, a tshomba yakwe.+
72 I no va risa hi mbilu yi tsumbekileko,+A va rangela hi mandla ya wutlhari.+
Mitlhamuselo ya lahasi
^ Kutani: “gondziselelo”.
^ Hi kukongoma: “yi nga longangiko”.
^ Kutani: “dhamu”.
^ Kutani: “zvakuga zva mihefemulo yabye”.
^ Hi kukongoma: “pawa”.
^ Hi kukongoma: “pawa”.
^ Kutani: “tingilozi”.
^ Kutani: “moya wa mutsuwuka-gambo”.
^ Kutani: “sul”.
^ Kutani: “Muphoteli”.
^ Hi kukongoma: “I wa fenengeta”.
^ Zvi nga maha na zvi wula ku: “Lezvaku a moya wu famba wu nga ha wuyi”.
^ Hi kukongoma: “canja”.
^ A humbi zviharana zvo fana ni bhandzala.
^ A mivhina tisinya leti ti pswalako mauvha.
^ Zvi nga maha na zvi wula ku: “feveri yo hisa”.
^ Kutani: “A nga ponisangi mihefemulo yabye”.
^ Hi kukongoma: “I no nyikela wutomi gabye”.
^ Kutani: “ciluse”.
^ Kutani: “virgens”.
^ Hi kukongoma: “Ni vanhwana vabye a va dzundziwangi”.
^ Hi kukongoma: “I no aka a wutshamu gakwe go basa gi ku khwatsi kutlakuka”.
