Tisimu 89:1-52
Maxili* ya Etane,+ a muEzra.
89 Ndzi ta yimbelela hi lirandzo li nga mbheliko la Jehovha kala kupindzuka.
Ndzi ta tivekisa a kutsumbeka ka wena hi nomu wa mina zvizukulwaneni zvontlhe.
2 Hakuva ndzi te: “A lirandzo li nga mbheliko li ta simama kala kupindzuka;+U yimisile a kutsumbeka ka wena ku tiya le matilweni.”
3 “Ndzi mahile civhumelwano ni a hlawulilweko wa mina;+Ndzi hlambanyile ka nandza ga mina Dhavhidha, ndziku:+
4 ‘Ndzi ta yimisa a pswalo*+ wa wena wu tiya kala kupindzuka,Ndzi tiyisa a citshamu ca wena ca wuhosi zvizukulwaneni zvontlhe.’”+ (Sela)
5 O Jehovha, a matilo ma dhumisa a mitiro ya wena yo hlamalisa,Ina, a kutsumbeka ka wena lomu bandleni ga vabasileko.
6 Hakuva himani le matilweni a nga fananisiwako na Jehovha ke?+
Kona himani cikari ka vana va Nungungulu+ a fanako na Jehovha ke?
7 Nungungulu wa chaviwa lomu hlengeletanweni ya vabasileko;+Yena wa hombe niku wa hlamalisa ka vontlhe lava va mu randzeleko.+
8 O Jehovha, Nungungulu wa mabutho,Himani a nga ni ntamu a ku khwatsi hi wena, O Jah?*+
A kutsumbeka ka wena ku ku randzele.+
9 U fumela a bimbi gi zangarileko;+Loku a mavingo* ya gona ma vhindluka, wena wa ma rulisa.+
10 U pfotlosile Rahabhi+ u mu siya na a hi cirumbi.+
U hangalasile a valala va wena hi woko ga wena ga ntamu.+
11 A matilo ya wena, ni misava yonawu ya wena;+U vangile misava ni zvontlhe zvi nga ka yona.+
12 U vangile n’walungu* ni dzonga;*Tabhora+ na Hermoni+ va dhumisa vito ga wena hi kutsaka.
13 A woko ga wena gi tiyile;+A canja ga wena gi na ni ntamu;+A canja ga wena ga cinene gi tlakusilwe.+
14 A kululama ni nongameto zviseketelo zva citshamu ca wena ca wuhosi;+A lirandzo li nga mbheliko ni kutsumbeka zvi mahlweni ka wena.+
15 Va tsaka lava va tivako a mikulungwani ya kutsaka.+
O Jehovha, va famba kuwonekeleni ka nghohe ya wena.
16 Gontlhe siku va tsakela vito ga wena,Va tlakusiwa kululameni ka wena.
17 Hakuva wena u wudzundzo ga ntamu wabye,+Ni ntamu* wa hina wa engetela hi kota ya wuxinji ga wena.+
18 Hakuva a citlhangu ca hina ci lumba Jehovha,Ni hosi ya hina yi lumba Loyi a Basileko wa Izrayeli.+
19 Ka cikhati leco, u wulawulile ka vatsumbekileko va wena hi lomu muwonisweni, uku:
“Ndzi yi nyikile ntamu a nhenha;+Ndzi tlakusile loyi ndzi mu hlawulileko cikari ka vanhu.+
20 Ndzi kumile Dhavhidha, a nandza ga mina,+Ndzi mu tota hi mafura ya mina yo basa.+
21 A canja ga mina gi ta mu seketela,+Ni woko ga mina gi ta mu tiyisa.
22 A ku na nala a to mu kurumeta ku humesa ndzuvo,*Ne a munhu a nga lulamangiko a nga ta mu xanisa.+
23 Ndzi ta chindza a valala vakwe mahlweni kakwe,+Ndzi daya lava va mu vengako.+
24 A kutsumbeka ka mina ni lirandzo la mina li nga mbheliko zvi le ka yena,+Ni ntamu* wakwe wu ta andza vitweni ga mina.
25 Ndzi ta yimisa a canja gakwe* hehla ka bimbiNi canja gakwe ga cinene hehla ka micongo.+
26 I ta ndzi vitana, aku: ‘Wena u Papayi wa mina,A Nungungulu wa mina ni Ribye ga kuhanyiswa ka mina.’+
27 Ndzi ta mu maha matewula,+Ava wahombe cikari ka tihosi ta misava.+
28 Ndzi ta mu randza hi lirandzo la mina li nga mbheliko kala kupindzuka,+Ni civhumelwano ca mina leci ndzi mahileko naye ci nga ta tshuka ci fuva.+
29 Ndzi ta yimisa a pswalo* wakwe wu tshama kala kupindzuka,Ndzi maha citshamu cakwe ca wuhosi ci pindzuka a ku fana ni matilo.+
30 Loku a vana vakwe va tsika a nayo wa mina,Va nga fambi hi zvileletelo* zva mina,
31 Loku va hambunyeta a zvileletelo zva mina,Va nga hlayisi a milayo ya mina,
32 Ndzi ta tsayisa a kungaingisi kabye hi nhonga,+Ni cigoho cabye hi limhika.
33 Kanilezvi ndzi nga ta tshuka ndzi tsika ku mu randza hi lirandzo la mina li nga mbheliko,+Ne ndzi nga ta tsika ku maha lezvi ndzi tsumbisileko.
34 Ndzi nga ta tshova a civhumelwano ca mina+Kutani ku cica lezvi a minomu ya mina yi wulileko.+
35 Ndzi hlambanyile hi kubasa ka mina khati gin’we kala kupindzuka;Ndzi nga ta mu hembela Dhavhidha.+
36 A pswalo* wakwe wu ta tshama kala kupindzuka.+A citshamu cakwe ca wuhosi ci ta pindzuka a ku fana ni gambo mahlweni ka mina.+
37 A ku khwatsi i hweti, ci ta yimisiwa ci tiya kala kupindzukaKota kustumunyu a tsumbekileko le matilweni.” (Sela)
38 Kanilezvi wena u mu hoxile, u mu tsika;+U zangarele a totilweko wa wena.
39 U tsikile a civhumelwano leci u ci mahileko ni nandza ga wena;U nyenyezisile a cidlodlo* cakwe, u ci hoxa lahasi.
40 U khungumulile a makhurisi yakwe wontlhe ya* maribye,Ni makhokhola yakwe u ma mahile marumbi.
41 Vontlhe a vahundzi va ndlela va phanga tshomba yakwe;Cihlekiso ka vaakelani vakwe.+
42 U mahile a valala vakwe va hlula,*+Ni valala vakwe vontlhe va kulungela.
43 U bhinyile a wukari ga cipadha cakwe,A wu mu seketelangi yimpini.
44 U fuvisile a kungangamela kakwe,U wisa a citshamu cakwe ca wuhosi lahasi.
45 U komisile a masiku ya wuswa gakwe,U mu fenengeta hi tingana. (Sela)
46 O Jehovha, u ta ti fihla kala rini? Kala kupindzuka ke?+
A zanga ya wena yi ta simama ku vhura a ku fana ni ndzilo ke?
47 Alakanya lezvi a wutomi ga mina gi nga komisa zvona!+
Kasi u no halahala u vanga vanhu vontlhe na u nga hi na kungo ke?
48 Himani a zvi kotako ku hanya a nga tshuki a wona kufa?+
Kona himani a nga ti ponisako* ntan’wini wa Cilahla* ke? (Sela)
49 O Jehovha, yi kwihi a mitiro ya wena ya kale ya lirandzo li nga mbheliko,Leyi u hlambanyileko ka Dhavhidha hi kutsumbeka ka wena ke?+
50 O Jehovha, alakanya a zviruko lezvi zvi rwexiwako a malandza ya wena;Ni lezvi ndzi rwalisako zvona a zviruko zva matiko wontlhe cifuveni ca mina;
51 O Jehovha, alakanya lezvi a valala va wena va nga rukatelisa zvona,Lezvi va nga ma rukatelisa zvona a mazambo wontlhe ya a totilweko wa wena.
52 Jehovha i wa dhumisiwe kala kupindzuka. Amen ni Amen.+
Mitlhamuselo ya lahasi
^ Hi kukongoma: “mbewu”.
^ A ku “Jah” i vito gi komisilweko gaku Jehovha.
^ Kutani: “mabyandlati; mavimbi”.
^ Kutani: “norte”.
^ Kutani: “sul”.
^ Hi kukongoma: “limhondzo”.
^ Kutani: “tributo”, wona laha kaku: “ndzuvo” ka Tlhamuselo wa magezu ya Bhibhiliya.
^ Hi kukongoma: “limhondzo”.
^ Kutani: “ntamu wakwe”.
^ Hi kukongoma: “mbewu”.
^ Kutani: “kulamula”.
^ Hi kukongoma: “mbewu”.
^ Kutani: “korowa; cidlodlo ca wuhosi”.
^ Kutani: “a wuchavelo gakwe ga”.
^ Hi kukongoma: “U tlakusile a canja ga cinene ga valala vakwe”.
^ Kutani: “a nga ponisako muhefemulo wakwe”.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.