Tisimu 94:1-23
94 O Jehovha, Nungungulu wa kuphotela,+O Nungungulu wa kuphotela, ngangamela!
2 Suka u yima, wena Mulamuli wa misava.+
Tlhelisela a vamatshandza lezvi zvi va ringanako.+
3 O Jehovha, kala rini?Kala rini a vakubiha na va ha tsaka ke?+
4 Va kavhulela a timhaka ta matshandza;Vontlhe a vamahi va kubiha va ti kulisa.
5 O Jehovha, va gandletela a vanhu va wena,+Va xanisa a tshomba ya wena.
6 Va daya a tinoni* ni valuveli,Va tlhela va daya ni vana vo kala vapapayi.
7 Ve ngalo: “Jah a nga zvi woni;+Nungungulu wa Jakobe a nga cheli kota hi zvona.”+
8 N’wina mu nga hava kupimisisa, zwisisani lezvi;N’wina zvipumbu, kasi mu ta tlhariha rini?+
9 Loyi a mahileko* ndleve a nga tsandzeka kuzwa ke?
Loyi a vangileko tihlo a nga tsandzeka ku wona ke?+
10 Loyi a layako matiko a nga tsandzeka ku kawuka ke?+
Hi yena a nyikako vanhu a wutivi!+
11 Jehovha wa ma tiva a maalakanyo ya vanhuLezvaku kuhefemula ntsena.+
12 O Jah, wa tsaka a munhu loyi u mu layako,+Loyi u mu gondzisako a nayo wa wena,+
13 Kasi u mu nyika kurula masikwini ya khomboKala ku keliwa a nkele wa vakubiha.+
14 Hakuva Jehovha a nga ta tsika a vanhu vakwe,+Ne hambu ku fularela a tshomba yakwe.+
15 Hakuva a kulamula ku ta tlhela kuva ko lulama,Ni vontlhe va timbilu ti lulamileko va ta ku landzela.
16 Himani a to suka a ndzi lwela ka vakubiha?
Himani a to ndzi yimela ka vamahi va kubiha?
17 Loku Jehovha i wa nga ndzi vhunangi,Na ndzi* lovile* hi kuhatlisa.+
18 Laha ndzi ngaku: “A mikondzo ya mina ya retemuka”,
A lirandzo la wena li nga mbheliko li no ndzi seketela, O Jehovha.+
19 A cikhati leci a zvikarato* zvi nga ndzi rera,*U ndzi chavelele, u ndzi rulisa.*+
20 Xana a citshamu ca wuhosi* ca ku kanganyisa ci ngava ni wuhlengeli na wena,Kuveni ca vanga zvikarato hi vito ga nayo* ke?+
21 Va dhumela wakululama* hi ndlela ya xapi,+Va kona munhu wo kala nandzu kasi a dawa.*+
22 Kanilezvi Jehovha i tava wuchavelo ga mina go tiya,*A Nungungulu wa mina i ribye ga mina ga wuchavelo.+
23 I ta va tlhelisela a mitiro yabye ya kubiha hehla kabye.+
I ta va lovisa* hi kubiha ka vona venyi.
Jehovha, a Nungungulu wa hina, i ta va lovisa.*+
Mitlhamuselo ya lahasi
^ Kutani: “vavasati vo felwa hi vanuna”.
^ Hi kukongoma: “a byalileko”.
^ Hi kukongoma: “ndzi tshamile kumiyeleni”.
^ Kutani: “A muhefemulo wa mina na wu”.
^ Kutani: “a kukarateka”.
^ Kutani: “zvi nga tala ndzeni ka mina”.
^ Kutani: “A kuchavelela ka wena ku tangalisile a muhefemulo wa mina”.
^ Kutani: “a vafumeli; valamuli”.
^ Kutani: “cileletelo”.
^ Hi kukongoma: “Va nyika nandzu a nkhata wa munhu a nga hiko na nandzu”.
^ Kutani: “a muhefemulo wa wakululama”.
^ Kutani: “khokhola ga mina gi tlakukileko”.
^ Hi kukongoma: “miyeta”.
^ Hi kukongoma: “miyeta”.