Lisimu 96:1-13
96 Yimbelelani a lisimu liswa ka Jehovha.+
Yimbelelani ka Jehovha, n’wentlhe n’wina misava!+
2 Yimbelelani ka Jehovha; dhumisani vito gakwe.
Huwelelani a mahungu ya manene ya kuhanyisa kakwe siku ni siku.+
3 Kanelani a wudzundzo gakwe cikari ka matiko,Ni mitiro yakwe yo hlamalisa cikari ka mifumo yontlhe.+
4 Jehovha wa hombe niku wa ringanelwa nguvhu hi ku dhumisiwa.
Wa chaveka a ku hundza vontlhe a vanungungulu lava van’wani.
5 Vontlhe a vanungungulu va matiko vanungungulu va nga vhuniko nchumu,+Kanilezvi Jehovha hi yena a nga maha matilo.+
6 Mahlweni kakwe ku na ni wukulu* ni kungangamela;+A ntamu ni kusaseka zvi lomu wutshan’wini gakwe go basa.+
7 Nyikani Jehovha lezvi zvi mu fanelako, n’wina mingango ya matiko;Nyikani Jehovha lezvi zvi mu fanelako hi kota ya kungangamela kakwe ni ntamu wakwe.+
8 Nyikani Jehovha a wudzundzo legi gi fanelako a vito gakwe;+Nehani cinyikiwo, mu nghena lomu mitsendzeleni* yakwe.
9 Khizamelani* Jehovha na mu bohile a tinguwo to basa;*Rurumelani mahlweni kakwe, n’wentlhe n’wina misava!
10 Kanelani cikari ka matiko, muku: “Jehovha i mahile Hosi!+
A misava yi yimisilwe yi tiya; yi nga ta tsekatsekiswa.*
I ta lamula* mifumo hi kululama.”+
11 Ngha a matilo ma tsaka, ni misava yi nengela;A bimbi gi wa dzindze ni zvontlhe zvi gi tatileko;+
12 A mafusi ni zvontlhe zvi nga ka wona zvi wa tsake.+
Ka cikhati caleco, a tisinya tontlhe ta khwati ti wa kulungele hi kutsaka+
13 Mahlweni ka Jehovha hakuva wata,*Wata a ta lamula misava.
I ta lamula misava hi kululama,+Ni matiko hi kutsumbeka kakwe.+
Mitlhamuselo ya lahasi
^ Kutani: “wudzundzo”.
^ Kutani: “pátios”.
^ Kutani: “Khozelani”.
^ Zvi nga maha na zvi wula ku: “hi kota ya kungangamela ka kubasa kakwe”.
^ Kutani: “ninginiswa”.
^ Kutani: “yimela”.
^ Kutani: “i chikele”.
