Valamuli 5:1-31
5 Ka siku lego, Dhebhora+ na Bharaki,+ a n’wana wa Abhinowame, va no yimbelela lisimu leli:+
2 “Hi kota ya misisi yi tlhatlhilweko* lomu Izrayeli,Ni lezvi a vanhu va ti nyikeleko hi kuzvirandza,+Dhumisani Jehovha!
3 Ingisani, n’wina tihosi! Dembani ndleve, n’wina vafumeli!
Ndzi ta yimbelela ka Jehovha.
Ndzi ta yimbelela a tisimu ta ku dhumisa* Jehovha,+ a Nungungulu wa Izrayeli.+
4 Jehovha, laha u nga huma Seyire,+A cikhati leci u nga huma hi le tikweni ga Edhomi,A misava yi no tsekatseka, ku halaka vhula hi le tilweni,A marefu ma chulula mati.
5 A zvitsunga zvi no nyeka* mahlweni ka nghohe ya Jehovha,+Hambu Sinayi i no nyeka mahlweni ka nghohe ya Jehovha,+ a Nungungulu wa Izrayeli.+
6 Masikwini ya Xamgare,+ a n’wana wa Anati,Masikwini ya Jayeli,+ a maruwa ma wa hi ciwula;A vaendzi va wa famba hi tindlela to jikajika.
7 Lava va nga hanya lomu zvidhoropaneni, lomu Izrayeli, va nyamalele;Va no nyamalala kala mina Dhebhora+ ndzi suka ndzi yima;Kala laha ndzi nga suka ndzi maha mamani lomu Izrayeli.+
8 Va no ti hlawulela a vanungungulu va vaswa,+Kuva ni tiyimpi lomu tinyangweni.+
Ku wa nga woneki a citlhangu ne tlhariCikari ka 40 000 wa vavanuna va ka Izrayeli.
9 A mbilu ya mina yi zvin’we ni vakomandante va ka Izrayeli,+Lava va ti nyikeleko ni vanhu hi kuzvirandza.+
Dhumisani Jehovha!
10 N’wina vakhileli va timbongola ta kastanyu,N’wina mu tshamako ka matapete ya manene,Na n’wina lava mu fambako hi ruwa,Ehleketani!
11 A magezu ya vakhi va mati ma zwilwe lomu ku khiwako matiNa va hlawutela a mitiro yo lulama ya Jehovha,Ni mitiro yo lulama ya lava va tshamako lomu zvidhoropaneni zva Izrayeli.
Makunu a vanhu va Jehovha va no relela tinyangweni.
12 Vhuka, vhuka Dhebhora!+
Vhuka, vhuka u yimbelela lisimu!+
Suka, Bharaki!+ Suka u rangela lava u va khomileko, wena n’wana wa Abhinowame!
13 Lava va nga sele va no relela ka tihosana;A vanhu va Jehovha va no relela ka mina va talwa ni tinhenha.
14 Lava va nga hi nkoveni va wa huma hi le Efrayime;Va wa hi na wena, Bhenjamini, cikari ka masochwa ya wena.
A vakomandante va no relela hi le Makira;+Ni le Zebhuloni ku no relela lava va welelako a nhonga ya loyi a vitanisako masochwa.*
15 A tihosana ta Isakari ti wa hi na Dhebhora,A ku khwatsi hi Isakari na Bharaki.+
I no rumelwa le nkoveni hi minenge.+
Cikari ka mitlawa ya ka Rubheni ku wa hi ni kuhlola ka hombe ka mbilu.
16 Hikuyini u tshamileko cikari ka mindzhwalo yimbiri,*U ingisela a varisi na vaba mimpundzu ka mitlhambi ke?+
A mitlawa ya ka Rubheni yi wa hi ni kuhlola ka hombe ka mbilu.
17 Gileyadhe i no tshama le tlhatuko wa Jordhani;+Dhani ke, hikuyini a nga tshama kusuhani ni zvitimela?*+
Axeri i no tshama mbhirini ya bimbi a nga mahi nchumu,A tshama lomu a zvitimela zvi nyimako kona.+
18 Zebhuloni i tiko gi nga veka wutomi ga gona mhangweni,* laha ka ku gi wa nga chavi kufa;Naftali yenawu+ i vekile wutomi gakwe mhangweni lomu ka matshamu ma tlakukileko.+
19 Ku tile tihosi ti talwa;A tihosi ta Khanani ti nolwa+Le Taanaka, kusuhani ni mati ya Megidho.+
A ti tekangi muphango wa prata.+
20 A tinyeleti ti nolwa na ti hi le tilweni;Hi kwale tilweni* ti nolwa na Sisera.
21 A cicongwana ca Kixoni ci no va kukuleta,+A cicongwana ca kale, ina, a cicongwana ca Kixoni.
U kandzihetele lava va ntamu, O muhefemulo* wanga.
22 A zvinyondzwani zva mahaxi zvi no tsekatsekisa lahasiLaha a mahaxi yakwe ya yimpi ma nga kari ma tsutsuma hi ntamu wontlhe.+
23 A ngilozi ya Jehovha yi te: ‘I wa rukatelwe Meroza,Ina, va wa rukatelwe a vahanyi vakwe.Hakuva a va tangi va ta vhunetela* Jehovha,Ina, a va tangi ni tinhenha va ta vhunetela Jehovha.’
24 Jayeli+ i katekile ku hundza vavasati vontlhe,A sati wa Hebhere,+ a muKeni;I katekile ku hundza vavasati vontlhe va hanyako matendeni.
25 Sisera i no mu kombela mati; Jayeli a mu nyika masi.
I no mu nyika masi yo tiya+ lomu ka ngelo wa wuhosi.
26 I no nawuluta a canja gakwe a teka cikhongwani ca tenda,Hi canja gakwe ga cinene i no khoma a hamela ya vatiri.
I noba Sisera hi hamela, a mu faya hloko,A pandza a tihlaya takwe a ti bhoxa.+
27 I nowa mikondzweni ya Jayeli; i nowa a nga ha vhuki;I nowa mikondzweni yakwe a ku sudhu;Laha a nga wela kona, i no hluliwa kwalaho.
28 Hi laha janeleni ku wa hlomela wasati,Ku nga mamani wa Sisera, na a cuwukela hi lomu ka mavanga ya janela, aku:‘Hikuyini a kareta yakwe yi hlwelako ku wuya?Hikuyini a guwa ga tikareta takwe ta mahaxi gi hlwelako ku zwala?’+
29 A vavasati vo tlhariha nguvhu va laha wuhosini va no mu hlamula;Yenawu i wa ti byela ha yece, aku:
30 ‘Kona a vo avelana a muphango va wu kumileko?A musochwa mun’we ni mun’wani a teka nhanyana mun’we kutani vanhanyana vambiri,Ni muphango wa tinguwo ta mivalavala ta Sisera, a muphango wa tinguwo ta mivalavalaNi tinguwo to sasekiselwa, ina, ta mivalavala, a tinguwo timbiri to sasekiselwa,Kasi ku sasekisa a tinhamu ta vaphangi.’
31 O Jehovha, a valala va wena vontlhe va wa love,+Kanilezvi lava va ku randzako va wa fane ni gambo loku gi tsuwuka kungangameleni ka gona.”
A tiko gi no humula a 40 wa malembe.+
Mitlhamuselo ya lahasi
^ Kutani: “ya masochwa ma nga ni misisi yi tlhatlhilweko”.
^ Kutani: “Ndzi ta mu chayela muzka”.
^ Zvi nga maha na zvi wula ku: “zvi no tsekatseka”.
^ Zvi nga maha na zvi wula ku: “lava va nga ni cibya ca mutsali”.
^ Ku nga mindzhwalo yi nga rwaliwa hi cihari.
^ Kutani: “mapaketi; tinavhiyo”.
^ Kutani: “gi nga kala gi nga hi na mhaka hi muhefemulo wa gona”.
^ Hi kukongoma: “Hi lomu ka tindlela ta tona”.
^ Kutani: “vhunetela kulweni ka”.
