Zakariya 1:1-21
1 Hi hweti ya wu 8, ka lembe ga wumbiri ga Dhariyusi,+ a mhaka ya Jehovha yi nota ka muphrofeti Zakariya,*+ a n’wana wa Bherekiya, a n’wana wa Idho, yi taku:
2 “Jehovha i va zangarele nguvhu a vapapayi va n’wina.+
3 “Va byele ku: ‘Jehovha wa mabutho i ngalo: “‘Wuyani ka mina’, ku wula Jehovha wa mabutho, ‘minawu ndzi ta wuya ka n’wina’,+ ku wula Jehovha wa mabutho.”’
4 “‘Mu nga fani ni vapapayi va n’wina, lava a vaphrofeti va kale va nga kanela ka vona, vaku: “Jehovha wa mabutho i ngalo: ‘Fularelani tindlela ta n’wina to biha ni mitiro ya n’wina yo biha.’”’+
“‘Kanilezvi a va ingisangi, ne a va dembangi ndleve ka mina’,+ ku wula Jehovha.
5 “‘Va kwihi vapapayi va n’wina zvezvi? Kona a vaphrofeti va hanyile kala kupindzuka ke?
6 Kanilezvi, a magezu ya mina ni milayo ya mina lezvi ndzi leleteleko malandza ya mina, a vaphrofeti, zvi chikele ka vapapayi va n’wina, a hi zvona ke?’+ Hikwalaho, va no wuya ka mina, va taku: ‘Jehovha wa mabutho i mahile ka hina hi kuya hi tindlela ta hina ni mitiro ya hina, khwatsi hi lezvi a nga bohile ku maha.’”+
7 Hi siku ga wu 24 ka hweti ya wu 11, ku nga hweti ya Xebhate,* hi lembe ga wumbiri ga Dhariyusi,+ a mhaka ya Jehovha yi nota ka Zakariya, a n’wana wa Bherekiya, a n’wana wa Idho, yi taku:
8 “Ndzi wonile muwoniso ni wusiku. Ku wa hi ni wanuna a nga khilele haxi go pswhuka, na a yimile cikari ka tisinya ta mirta laha ndzhelelweni. Le ndzhako kakwe ku wa hi ni mahaxi yo pswhuka, ni ya kastanyu,* ni yo basa.”
9 Hikwalaho, ndzi te: “Hosi yanga, hi vamani lava?”
A ngilozi leyi yi nga kari yi wulawula na mina yi no hlamula, yiku: “Ndzi ta ku komba ku hi vamani.”
10 A wanuna loyi a nga yimile cikari ka tisinya ta mirta i te: “A vanhu lava hi lava va rumilweko hi Jehovha kasi va fambafamba misaveni.”
11 Va no byela a ngilozi ya Jehovha leyi yi nga yimile cikari ka tisinya ta mirta, vaku: “Hi fambafambile misaveni; a misava yontlhe yi rulile, a ku na guwa.”+
12 Hikwalaho, a ngilozi ya Jehovha yi te: “O Jehovha wa mabutho, kala rini na u nga mu maheli wuxinji Jerusalema ni madhoropa ya Judha,+ lawa u ma zangareleko ka malembe lawa ya 70 ke?”+
13 Jehovha i no hlamula ngilozi leyi yi nga kari yi wulawula na mina, hi magezu ya manene ni yo chavelela.
14 Hi kulandzela, a ngilozi leyi yi nga kari yi wulawula na mina yi no ndzi byela ku: “Huwelela uku: ‘Jehovha wa mabutho i ngalo: “Ndza ti tsitsirita hi kota ya Jerusalema ni Ziyoni hi kutitsitsirita ka hombe.+
15 Ndzi zangarile, ina, ndzi ma zangarele nguvhu a matiko lawa ma tshamisekileko,+ hakuva ndzi wa zangarile kutsongwani,+ kanilezvi wona ma no engetela khombo.”’+
16 “Hikwalaho, Jehovha i ngalo: ‘“Ndzi ta wuya Jerusalema ni wuxinji,+ ni yindlu ya mina yi ta akiwa kona”,+ ku wula Jehovha wa mabutho, “a lingoti la ku pima hi lona li ta tshambulutiwa hehla ka Jerusalema.”’+
17 “Huwelela kambe, uku: ‘Jehovha wa mabutho i ngalo: “A madhoropa ya mina ma ta tlhela ma tala ma halakela hi wunene; Jehovha i ta tlhela a chavelela Ziyoni,+ a tlhela a hlawula Jerusalema.”’”+
18 Andzhako ka lezvo, ndzi no tlakusa matihlo ndzi wona a mune wa timhondzo.+
19 Hikwalaho, ndzi no wutisa a ngilozi leyi yi nga kari yi wulawula na mina, ndziku: “A timhondzo leti ti wula yini?” Yi hlamula yiku: “Leti timhondzo leti ti nga hangalasa Judha,+ na Izrayeli,+ na Jerusalema.”+
20 Hi kulandzela, Jehovha i no ndzi komba a mune wa vameseri.
21 Ndzi no wutisa, ndziku: “A vameseri lava vata va ta maha yini?”
Aku: “Leti timhondzo leti ti nga hangalasa Judha, laha ka kuza ne mun’we a nga zvi koti ku tlakusa hloko yakwe. Lava va tata va ta va chavisela, va tshova timhondzo ta matiko lawa ma nga tlakusa timhondzo ta wona ma vhukela a tiko ga Judha kasi ku gi hangalasa.”
