Zakariya 14:1-21
-
A wukhozeli ga lisine gi hlula hi kumbhelela (1-21)
14 “Hi nga wona! A siku gata, a siku ga Jehovha, laha a titshomba ta wena* ti to avanyiselwa cikari ka wena.
2 Ndzi ta hlengeleta a matiko wontlhe kasi malwa ni Jerusalema; a dhoropa gi ta tekiwa, a miti yi phangiwa, ni vavasati va pfinyiwa. A khihlanya ga dhoropa gi taya wukhumbini, kanilezvi lava va to sala va nga ta fuvisiwa lomu dhoropeni.
3 “Jehovha i ta huma a yalwa ni matiko lawo+ a ku khwatsi hi loku alwa sikwini ga yimpi.+
4 Hi siku lego, a mikondzo yakwe yi ta yima Citsungeni ca maOlivha,+ leci ci cuwukeneko ni Jerusalema hi tlhelo ga mutsuwuka-gambo. A Citsunga ca maOlivha ci ta pandzeka hi laha cikari, kusukela mutsuwuka-gambo kala mupela-gambo,* ku huma nkova wa hombe nguvhu; a khihlanya gin’we ga citsunga gi taya n’walungu,* legi gin’wani giya dzongeni.*
5 Mu ta tsutsumela nkoveni wa zvitsunga zva mina, hakuva a nkova wa zvitsunga wu ta famba kala Azeli. Mu ta tsutsuma a ku fana ni lezvi mu nga tsutsuma hi kota ya kutsekatseka ka misava masikwini ya Uziya, a hosi ya Judha.+ Niku Jehovha, a Nungungulu wa mina i tata, ni vontlhe vabasileko va tava zvin’we naye.+
6 “Hi siku lego, ku nga tava ni kuwonekela ka lisima;+ a zvilo zvi ta woma.*
7 A siku lego gi tava siku go hlawuleka, a siku gi to tiviwa ku gi lumba Jehovha.+ Gi nga tava ni hlikanhi hambu wusiku; loku gi phuma ku ta wonekela.
8 Hi siku lego, ku ta khulunga mati ya wutomi+ hi Jerusalema.+ A khihlanya ga wona gi ta khulunga giya bimbini ga mutsuwuka-gambo,*+ ni khihlanya legi gin’wani gi khulunga giya bimbini ga mupela-gambo.*+ Lezvo zvi ta maheka hi nguva ya cimumu ni ya cirami.
9 Jehovha i tava Hosi ya misava yontlhe.+ Hi siku lego, Jehovha i tava mun’we,+ ni vito gakwe gi tava gin’we.+
10 “A tiko gontlhe gi ta fana ni Arabha,+ kusukela Gebha+ kala Rimoni,+ dzongeni wa Jerusalema; niku Jerusalema i ta tlakuka a tlhela ava ni vahanyi wutshan’wini gakwe,+ kusukela Nyangweni ya Bhenjamini+ kala Nyangweni yo Sangula, zvi famba kala Nyangweni ya laha Khoneni; ni kusukela ka Likhokhola* la Hananeli+ kala zvigowolweni zva vhinyo zva hosi.
11 A vanhu va ta aka kona; gi nga ta ha tshuka gi konelwa kulova.+ A vahanyi va Jerusalema va ta hanya kuruleni.+
12 “Lowu i ntungu lowu Jehovha a toba hi wona a matiko wontlhe lawa ma lwako ni Jerusalema:+ A nyama yabye yi ta bola na va yimile hi mikondzo yabye, a matihlo yabye ma ta bola lomu makheleni ya wona, ni tirimi tabye ti ta bola lomu minon’wini yabye.
13 “Hi siku lego, Jehovha i ta hangalasa pfilupfilu cikari kabye; a mun’we ni mun’wani i ta khoma canja ga muakelani wakwe, niku a canja gakwe gi ta vhukela a canja ga muakelani wakwe.*+
14 Judha yenawu i talwa yimpi le Jerusalema; a titshomba ta matiko wontlhe lawa ma nga lomu matlhelweni ti ta hlengeletwa: a ouro, ni prata ni tinguwo hi ntsengo wa hombe nguvhu.+
15 “A ntungu wo fana ni ntungu lowo wu taba ni mahaxi, ni mamula, ni makameli, ni timbongola, ni zvifuyo zvontlhe zvi nga lomu wugovelweni.
16 “Vontlhe lava va to sala cikari ka matiko wontlhe lawa ma vhukelako Jerusalema va ta kandziha lembe ni lembe+ va ya khizama* mahlweni ka Hosi, Jehovha wa mabutho,+ va maha Mubuzo wa Michacha.+
17 Kanilezvi ni wihi munhu cikari ka mingango ya laha misaveni a to kala ku kandziha Jerusalema a ya khizama mahlweni ka Hosi, Jehovha wa mabutho, a nga ta niselwa vhula.+
18 Ni loku a ngango wa Gibhite, wu nga kandzihi ne ku nghena lomu dhoropeni, wu nga ta niselwa vhula. Kanilezvi va ta biwa hi ntungu lowu Jehovha a bako hi wona a matiko wontlhe lawa ma kalako ku kandziha ma ya maha Mubuzo wa Michacha.
19 Lowu wu tava tsayiselelo wa ciwonho ca Gibhite ni ciwonho ca wontlhe matiko lawa ma to kala ku kandziha ma ya maha Mubuzo wa Michacha.
20 “Hi siku lego, a magezu lawa yaku: ‘A kubasa ku lumba Jehovha!’+ ma ta tsaliwa lomu ka vanyangende* va mahaxi. A timbita+ ti nga lomu ndlwini ya Jehovha ti ta fana ni mingelo+ mahlweni ka alati.
21 A timbita tontlhe ti nga le Jerusalema ni le Judha ti ta basa niku ti tava ta Jehovha wa mabutho; vontlhe lava va mahako miphahlo va tata va ta tirisa tokari kasi ku bhika hi tona. Hi siku lego, ku nga ta hava ni muKhanani* lomu ndlwini ya Jehovha wa mabutho.”+
Mitlhamuselo ya lahasi
^ Ku nga dhoropa legi gi kumbukiwako ka vs. 2.
^ Hi kukongoma: “bimbini”.
^ Kutani: “norte”.
^ Kutani: “sul”.
^ A ku khwatsi zvi no womisiwa hi cirami.
^ Ku nga Bimbi ga Medhiteraneo.
^ Ku nga Bimbi Gofa.
^ Kutani: “Torre”.
^ Kutani: “a mun’we i ta vhukela mun’wani”.
^ Kutani: “khozela”.
^ Zvi nga maha na zvi wula ku: “muxavisi”.
