Zakariya 4:1-14
4 A ngilozi leyi yi nga wulawulile na mina yi no wuya yi ta ndzi vhuxa, a ku khwatsi hi loku yi vhuxa munhu hi lomu wurongweni.
2 Yiku ka mina: “Cini u ci wonako?”
Ndziku: “Ndzi wona a nenge wa tikandiya, wontlhe wo mahiwa hi ouro,+ wu nga ni ngelo hehla ka wona. Ku na ni 7 wa tikandiya hehla ka wona,+ ina, i 7 wa tona. A tikandiya leto ti nga hehla ka wona ti na ni 7 wa titubhu.
3 Laha kusuhani ka wona ku na ni tisinya timbiri ta maolivha,+ a yin’we reveni ga cinene ga ngelo, ni yin’wani reveni ga cibhabha.”
4 Hi kulandzela, ndzi no wutisa a ngilozi leyi yi nga kari yi wulawula na mina, ndziku: “Hosi yanga, kasi zvi wula yini a zvilo lezvi?”
5 A ngilozi leyi yi nga kari yi wulawula na mina yi no ndzi wutisa ku: “A wu zvi tivi ku zvi wula yini a zvilo lezvi ke?”
Mina ndziku: “Ahihi, hosi yanga.”
6 A ngilozi yi no gumesa yiku ka mina: “Leyi i mhaka ya Jehovha ka Zerubhabheli: ‘“Zvi nga ta maheka hi ntamu wa butho ne hambu hi ntamu,+ kanilezvi hi moya wa mina”,+ ku wula Jehovha wa mabutho.
7 Hi wena mani, wena citsunga ca hombe? Mahlweni ka Zerubhabheli+ u ta maha livala ntsena.+ I ta neha a ribye ga le hehla na ku huwelelwa ku: “A zvi no kusaseka! A zvi no kusaseka!”’”
8 A mhaka ya Jehovha yi no tlhela yita ka mina, yi taku:
9 “A mandla ya Zerubhabheli ma zimile a ciseketelo ca yindlu leyi,+ hi wona kambe ma to yi mbhetisa.+ U ta zvi tiva lezvaku hi Jehovha wa mabutho a ndzi rumileko ndzita ka n’wina.
10 Kona himani a kanyisileko a siku ga masangulo matsongwani* ke?+ Hakuva va ta tsaka va tlhela va wona a lingoti la prumo* canjeni ga Zerubhabheli. A 7 loyi, matihlo ya Jehovha lawa ma fambafambako ma cuwuka a misava yontlhe.”+
11 Ndzi no yi wutisa, ndziku: “Ti wula yini a tisinya leti ta timbiri ta miolivha ti nga reveni ga cinene ni reveni ga cibhabha ga nenge wa tikandiya ke?”+
12 Ndzi no yi wutisa hi khati ga wumbiri, ndziku: “Ma wula yini a madhavi* lawa ya mambiri ya tisinya ta miolivha, ma chululako mafura ya ouro hi titubhu timbiri ta ouro ke?”
13 Hi kulandzela yi no ndzi wutisa, yiku: “A wu zvi tivi ku zvi wula yini a zvilo lezvi ke?”
Mina ndziku: “Ahihi, hosi yanga.”
14 Yiku: “Lava hi vatotilweko vambiri va yimileko zvin’we ni Hosi ya misava yontlhe.”+
Mitlhamuselo ya lahasi
^ Kutani: “zvilo zvitsongwani”.
^ Hi kukongoma: “ribye”.
^ Ku nga madhavi ya sinya ma nga ni mihandzu.
