Zakariya 6:1-15
6 Ndzi no tlhela ndzi tlakusa matihlo ndzi wona mune wa tikareta na tita hi cikari ka zvitsunga zvimbiri. A zvitsunga lezvo zvi wa hi zva kobre.
2 A kareta yo sangula yi wa kokiwa hi mahaxi yo pswhuka; a kareta ya wumbiri yi wa kokiwa hi mahaxi ya ntima.+
3 A kareta ya wunharu yi wa kokiwa hi mahaxi yo basa, ni kareta ya wumune yi wa kokiwa hi mahaxi ya matlhakatlhaka ni ya mivalavala.+
4 Ndzi no wutisa ngilozi leyi yi nga kari yi wulawula na mina, ndziku: “Hosi yanga, zvini lezvi?”
5 A ngilozi yi no ndzi hlamula ku: “Leyi mune wa mimoya+ ya matilo yi humako andzhako ka loku yi yimile mahlweni ka Hosi ya misava yontlhe.+
6 A kareta leyi yi kokiwako hi mahaxi ya ntima yiya tikweni ga n’walungu;*+ lawa yo basa maya tlhatuko wa bimbi, ni lawa ya matlhakatlhaka maya tikweni ga le dzongeni.*
7 Lawa ya mivalavala ma wa zvi lava nguvhu ku huma ma fambafamba misaveni.” Hi kulandzela, a ngilozi yi te: “Sukani, mu fambafamba misaveni.” Ma se sangula ku fambafamba misaveni.
8 Hi kulandzela, a ngilozi yi no ndzi vitana, yiku: “Hi nga wona, a mahaxi lawa ma yako tikweni ga n’walungu ma humutile a moya wa Jehovha tikweni ga n’walungu.”
9 A mhaka ya Jehovha yi no tlhela yita ka mina, yi taku:
10 “Teka lezvi Heldhayi, na Tobhija, na Jedhaya va tileko nazvo hi ka vanhu va nga wukhumbini. Ka siku galego, u fanele kuya mutini wa Josiya, a n’wana wa Zefaniya, na u hi zvin’we ni lava va tileko hi Bhabhuloni.
11 Teka prata ni ouro u maha hi zvona a cidlodlo* u bohisa Joxuwa,+ a n’wana wa Jehozadhaki, a mupristi wa hombe,
12 uku ka yena:“‘Jehovha wa mabutho i ngalo: “Hi loyi a wanuna loyi a vito gakwe a nga Hluke.+ I ta hluka hi laha wutshan’wini gakwe, niku i ta aka a tempeli ya Jehovha.+
13 Hi yena a to aka a tempeli ya Jehovha niku hi yena a to amukela wudzundzo. I ta tshama citshan’wini cakwe ca wuhosi a fuma; i tava mupristi kambe citshan’wini cakwe ca wuhosi,+ niku ku tava ni civhumelwano ca kurula cikari ka zvikhundla lezvi zva zvimbiri.*
14 A cidlodlo* ci ta vekiwa lomu tempeleni ya Jehovha, civa cialakanyiso ca Helema, na Tobhija, na Jedhaya,+ na Heni, a n’wana wa Zefaniya.
15 Lava va nga le kule va tata va ta hlengela kuakeni ka tempeli ya Jehovha.” Mu ta zvi tiva lezvaku Jehovha wa mabutho i ndzi rumile ka n’wina. Lezvo zvi ta maheka, loku hakunene mu nga tsiki ku ingisa a gezu ga Jehovha, a Nungungulu wa n’wina.’”
Mitlhamuselo ya lahasi
^ Kutani: “norte”.
^ Kutani: “sul”.
^ Kutani: “cidlodlo ca hombe; korowa ya hombe.”
^ Ku nga zvikhundla zvakwe kota hosi ni mupristi.
^ Kutani: “cidlodlo ca hombe; korowa ya hombe.”
