Zakariya 7:1-14
7 Hi lembe ga wumune ga hosi Dhariyusi, a mhaka ya Jehovha yi nota ka Zakariya,+ hi siku ga wu 4 ka hweti ya wu 9, yi nga hweti ya Kislevhi.*
2 A vanhu va le Bheteli va no rumela Xarezera, na Regem-Meleki ni vavanuna vakwe kasi va ya khongotela a wuxinji ga Jehovha,
3 va byela a vapristi va yindlu* ya Jehovha ni vaphrofeti, vaku: “Ndzi fanele ku rila hi hweti ya wutlhanu+ ndzi tlhela ndzi ti tsona zvakuga, a ku khwatsi hi lezvi ndzi mahako hi malembe yo tala ke?”
4 A mhaka ya Jehovha wa mabutho yi no tlhela yita ka mina, yi taku:
5 “Byela a vanhu vontlhe va tiko ni vapristi, uku: ‘A cikhati leci mu nga pfhunga* mu tlhela muba huwa hi hweti ya wutlhanu ni ya wu 7,+ a 70 wa malembe,+ hakunene mu wa pfhungela mina ke?
6 A cikhati leci mu ngaga ni kunwa, mu wa nga geli n’wina venyi ni ku nwela n’wina venyi ke?
7 Xana mu wa nga faneli ku ingisa a timhaka ta Jehovha leti a ti huweleleko hi nomu wa vaphrofeti va kale,+ Jerusalema ni madhoropa lawa ma nga mu randzele na ma ha hanya kuruleni, ni le Negebhe ni le Xefela na ka ha hanya vanhu ke?’”
8 A mhaka ya Jehovha yi no engeta yita ka Zakariya, yi taku:
9 “Jehovha wa mabutho i ngalo: ‘Lamulani hi kululama ka lisine,+ mu hanyisana hi lirandzo li nga mbheliko+ ni wuxinji.
10 Mu nga kanganyisi a noni* kutani n’wanana a nga hava papayi,*+ ni muluveli+ kutani cisiwana;+ mu nga mahelani zvikungo zvo biha timbilwini ta n’wina.’+
11 Kanilezvi va no simama ku ala ku chela kota,+ va ti nonohisa va ndzi fularela,+ va tlhela va vhala a tindleve tabye kasi va ngazwi.+
12 Va no nonohisa timbilu tabye ti ku khwatsi i dhayimani;*+ a va ingisangi nayo* ni timhaka leti Jehovha wa mabutho a va rumeleko hi moya wakwe, hi nomu wa vaphrofeti va kale.+ Hikwalaho, Jehovha wa mabutho i no zangara nguvhu.”+
13 “‘Kota lezvi va nga kala ku ingisa a cikhati ndzi* nga vitana,+ minawu ndzi nga ta va ingisa a cikhati va to vitana’,+ ku wula Jehovha wa mabutho.
14 ‘Ndzi va hangalasile hi moya wa cingulo matikweni wontlhe va nga kala va nga ma tivi,+ a tiko legi va nga gi fularela gi sala gi maha rumbi. A nga kona a nga kari a hundza hi lomo kutani ku tlhela,+ hakuva va cicile a tiko ga ginene giva nchumu wo tshisa.’”
Mitlhamuselo ya lahasi
^ Kutani: “tempeli”.
^ Kutani: “jejuwara”.
^ Kutani: “wasati wo felwa hi nuna”.
^ Kutani: “a felweko hi vapswali”.
^ Zvi nga maha na zvi wula ku: “ribye go tiya”, go kota ribye ga esmeril.
^ Kutani: “gondziselelo”.
^ Hi kukongoma: “a”.