Zakariya 9:1-17
9 Ciphrofeto:
“A mhaka ya Jehovha ya vhukela a tiko ga Hadrake,Yi kongoma* Dhamasku+— Hakuva a matihlo ya Jehovha ma hehla ka vanhu+Ni hehla ka tixaka tontlhe ta Izrayeli —
2 Yi vhukela na Hamate,+ loyi a tsemelanako mbhingano naye,Na Tire+ na Sidhoni,+ hakuva a va no ku tlhariha.+
3 Tire i ti akele khokhola,*
I wungeletela a prata yiku dzu, a ku khwatsi misava,Ni ouro yi ku khwatsi i chaka ga lomu maruweni.+
4 Jehovha i ta mu wutlela a titshomba takwe,Niku i ta lovisa butho gakwe, a gi hoxa lomu bimbini;*+I ta hisiwa hi ndzilo.+
5 Axkeloni i ta zvi wona, a chava;Gaza i ta karateka nguvhu,Na Ekroni yenawu, hakuva a kutsumba kakwe ku wisilwe tingana.
A hosi ya le Gaza yi ta lovisiwa,Le Axkeloni ku nga ta ha tshama munhu.+
6 A n’wana wa kuta, hi yena a to tshama le Axdhodhe.Ndzi ta fuvisa matshandza ya muFilistiya.+
7 Ndzi ta mu susa a zvilo zvi nga ni nkhata non’wini wakwe,Ni zvilo zvo nyenyeza matinweni yakwe.Yena i tava salela wa Nungungulu wa hina,Niku i ta ku khwatsi i hosana* lomu Judha,+Na Ekroni i ta ku khwatsi muJebhusi.+
8 Ndzi ta gova kota mugadhi ndzi vhikela a muti wa mina,+Kasi ku ngavi ni wa ku hundza hi lomo kutani wa ku wuya hi kona;Hambu muxanisi a nga ta ha tsemakanya hi kona kambe,+Hakuva makunu ndzi zvi* wonile hi matihlo ya mina.
9 Giya hi kutsaka, wena nhanyana wa Ziyoni.
Bana mikulungwani, wena nhanyana wa Jerusalema.
Hi nga wona! A hosi ya wena yata ka wena.+
Yi lulamile, yi neha a kuhanyisa,*Ya ti koramisa,+ yi khilele mbongola,A cimbongolana,* ci nga n’wana wa pswele ga mbongola.+
10 Ndzi ta fuvisa a tikareta ta yimpi ta Efrayime,Ni mahaxi ya Jerusalema.
A mawura ya yimpi ma ta fuviswa.
I ta huwelela kurula cikari ka matiko;+A kufuma kakwe ku ta sukela ka bimbi gin’we kala ka gin’wani bimbi,Ni kusukela Congweni* kala magemeta-musi ya misava.+
11 Wena wasati, hi nkhata wa civhumelwano ca wena,Ndzi ta humesa zvibochwa zva wena lomu nkeleni wo kala mati.+
12 N’wina zvibochwa, tlhelani khokholeni na mu hi ni kutsumba.+
Nyamutlha ndza ku byela ndziku:‘Wena wasati, ndzi ta ku nyika ciavelo ci wuyetilweko kumbiri.+
13 Hakuva ndzi ta kondla* Judha a ku khwatsi i wura ga mina.
Efrayime i tava ligalala la kona.Wena Ziyoni, ndzi ta vhuxa vana va wena,Kasi va vhukela vana va wena, wena Grekiya;Ndzi ta ku maha u ku khwatsi u cipadha ca musochwa.’
14 Jehovha i ta woneka hehla kabye,Ni ligalala lakwe li ta phandiwa li ku khwatsi kuhatima.
Jehovha, a Hosi ya Hombe, i taba linanga,*+A famba ni zvingulo zva le dzongeni.*
15 Jehovha wa mabutho i ta va vhikela.Va ta khadamula va tlhela va kandzihetela maribye lawa ma phandilweko hi cipelupelu.*+
Va tanwa va vanga guwa a ku khwatsi va nonwa vhinyo;Va ta tatiwa a ku khwatsi i ngelo,Va ku khwatsi makhona ya alati.+
16 Ka siku lego, Jehovha, a Nungungulu wabye, i ta va ponisaKota ntlhambi wa vanhu vakwe;+Hakuva va ta ku khwatsi maribye ya lisima ya cidlodlo* ma hatimako hehla ka misava yakwe.+
17 Hakuva a wunene gakwe ga hombe nguvhu,+Ni kusaseka kakwe ka hombe nguvhu!
A timbewu ti ta nyukisa majaha,Ni vhinyo yiswa yi ta nyukisa vanhwana.”*+
Mitlhamuselo ya lahasi
^ Hi kukongoma: “A wutshamu ga yona go humula hi”.
^ Kutani: “muro wa hombe”.
^ Zvi nga maha na zvi wula ku: “lovisa butho gakwe lomu bimbini”.
^ Kutani: “hosana ya lixaka”.
^ Zvi wonekisa ku khwatsi ku wuliwa a kuxaniseka ka vanhu vakwe.
^ Kutani: “mbongola ya matsune”.
^ Kutani: “ya hlula”.
^ Ku nga Congo wa Eufrate.
^ Hi kukongoma: “kandzihela”.
^ Kutani: “khombela”.
^ Kutani: “sul”.
^ Kutani: “korowa”.
^ Kutani: “virgens”.