Zefaniya 3:1-20
3 Khombo ka dhoropa ga ku hluwuka, gi nga hlazvekangiko, a dhoropa gi xanisako!+
2 A gi ingisi gezu ni gin’we;+ a gi vhumeli ku layiwa.+
A gi mu tsumbi Jehovha;+ a gi tshineli kusuhani ka Nungungulu wa gona.+
3 A tihosana ti nga cikari ka gona tinghala ti bhongako.+
A valamuli va gona mahlolwa ni wusiku;A va siyi ne ni rambu ga ku kutsa ni mixo.
4 A vaphrofeti vakwe vanyamatshandza ni vakanganyisi.+
A vapristi va kona va nyenyezisa lezvi zvi basileko;+Va hambunyeta nayo.+
5 Jehovha i lulamile cikari ka gona;+ a nga mahi zvakubiha.
Mixo ni mixo i tivisa a kulamula kakwe;+A ku fana ni kuwonekela, a nga thindeki.
Kanilezvi loyi a nga lulamangiko a nga tivi tingana.+
6 “Ndzi lovisile matiko; a tikhokhola* tabye ta lomu makhoneni ti sele na ti hi marumbi.
Ndzi khungumulele maruwa yabye, a ka ha tsemakanyi munhu.
A madhoropa yabye ma sele na ma hi marumbi, a ka ha hi na munhu, ne muaki.+
7 Ndzi te: ‘Hakunene u ta ndzi chava, u vhumela ku layiwa’,*+
Kasi a wutshamu gakwe gi nga lovisiwi,+Ndzi ta mu tsayisa hi kota ya zvontlhe zvilo lezvi.
Kanilezvi va wa ha zvi xuva nguvhu a ku maha zvakubiha.+
8 ‘Hikwalaho, ndzi rindzeleni’,*+ ku wula Jehovha,‘Kala ka siku legi ndzi to suka ndzi teka muphango,*Hakuva a kungo ga mina ku tlhanganisa matiko, ndzi hlengeleta mifumo,Kasi ndzi chulula a zanga ya mina hehla ka wona, yontlhe a zanga ya mina yi vhurako;+Hakuva a misava yontlhe yi ta hisiwa hi ndzilo wa kutitsitsirita ka mina.+
9 Hakuva cikhatini leco, ndzi ta cica a lirimi la matiko liva lirimi li basileko,Kasi wontlhe ma vitana a vito ga Jehovha,Ma mu tirela hi mbilu yin’we.*+
10 Kusukela micongweni ya Etiopia,Lava va ndzi khongotelako, a nhanyana wa vanhu va mina va hangalakileko, va tata va ta ndzi nyika zvinyikiwo.+
11 Ka siku lego, u nga ta wisiwa tinganaHi kota ya mitiro ya wena yontlhe leyi u ndzi hluwukeleko hi yona,+Hakuva ndzi ta susa a vanyamatshandza va ku ti kulisa cikari ka wena;U nga ta ha phinda kambe uva ni matshandza citsungeni ca mina co basa.+
12 Ndzi ta tsika lava vo ti koramisa ni ku ti tsongahata va simama cikari ka wena,+Niku vona va ta tsutsumela vitweni ga Jehovha.
13 A misalela ya ka Izrayeli+ yi nga ta maha zvilo zvi nga lulamangiko;+Va nga ta wulawula mawunwa, ne hambu a lirimi li kanganyisako li nga ta kumiwa minon’wini yabye;Va taga, va etlela, niku i hava a to va dzukisa.”+
14 Kanyuluka hi kutsaka, wena nhanyana wa Ziyoni!
Tlulatlula hi kutsaka, wena Izrayeli!+
Tsaka u kulungela hi mbilu yontlhe, wena nhanyana wa Jerusalema!+
15 Jehovha i susile a kulamula hehla ka wena.+
I tlhelisile a nala wa wena.+
Jehovha, a Hosi ya Izrayeli, i cikari ka wena.+
U nga ta ha chava khombo.+
16 Ka siku lego, ku ta wuliwa lezvi hi Jerusalema:
“U nga chavi, wena Ziyoni.+
U nga tsiki mandla ya wena ma rereka.
17 Jehovha, a Nungungulu wa wena, i cikari ka wena.+
Kota nhenha, i ta ponisa.
Hi kota ya wena i ta nengela hi kutsaka ka hombe.+
I ta miyela* lirandzweni lakwe.
I ta tsaka hi kota ya wena, a banguleka hi kutsaka.
18 Ndzi ta tlhanganisa vontlhe lava va rilako hi lezvi va kalako va nga ha kumeki ka mibuzo ya wena;+Va wa tshamile kule na wena na va rwele tingana hi kota ya yena.+
19 Ka cikhati leco, ndzi ta vhukela vontlhe lava va ku xanisako;+Ndzi hanyisa loyi a khwitako,+Ndzi tlhela ndzi hlengeleta lava va hangalakileko.+
Ndzi ta va nyika wudzundzo ni nduma*Matikweni wontlhe lawa va nga wisiwa tingana ka wona.
20 Ka cikhati leco, ndzi ta mu wuyisa,A cikhati leci ndzi to mu tlhanganisa.
Hakuva ndzi ta mu nyika nduma* ni wudzundzo+ cikari ka matiko wontlhe ya misava,A cikhati leci ndzi to wuyisa a vanhu va wena va khomilweko mahlweni ka wena”, ku wula Jehovha.+
Mitlhamuselo ya lahasi
^ Kutani: “torres”.
^ Kutani: “ku kawukiwa”.
^ Kutani: “ndzi rindzeleni hi lihlazva-mbilu”.
^ Zvi nga maha na zvi wula ku: “suka kota kustumunyu”.
^ Kutani: “Ma mu khozela hi kuzwanana”.
^ Kutani: “rula; xalala”.
^ Hi kukongoma: “vito”.
^ Hi kukongoma: “vito”.
