MUPROFETI Danieli i hanyile xikhatini xa ku hunza a 500 wa malembe mahlweni ka kupswaliwa ka Jesu. Hambulezo, Jehova i nyikile Danieli a mahungu lawa ma nga wa ta maha lezaku zi koteka a ku tiviwa a xikhati lexi Jesu a nga wa ta totiwa, kutani ku yimiswa ha xona, kota Messia, kutani Kristu. Danieli i byelilwe lezi: “Tiva u pima lezaku kusukela kuhumeni ka xileletelo xa ku tlhelisela ni ku aketa Jerusalema,  kala ku chikela loyi a totilweko loyi a nga hosi, ku tava ni ntlhanu wa maviki ni mambiri; zonake ni 62 wa maviki.” — Danieli 9:25.

Kasi ku tiva a xikhati xa kuchikela ka Messia, a kusangula hi fanele ku tiva a masangulo ya xikhati xi yisako ka Messia. Hi kuyelana ni xiprofeto lexo, xona xi sukela “kuhumeni ka xileletelo xa ku tlhelisela ni ku aketa Jerusalema.” Xana a ‘kuhuma ka xileletelo’ ku mahekile rini? Maringano ni mutsali wa Biblia Nehemia, a xileletelo xa ku aketwa ka makhurisi ma nga bhiyela Jerusalema xi humile “hi lembe ga wu 20 ga kufuma ka hosi Artaxerxesi.” (Nehemia 2:1, 5-8) A vatsali va matimu va tiyisa lezaku a lembe ga 474 Mahlweni ka Nguva ya Hina give lembe ga kusangula go enela ga Artaxerxesi kota hosi. Hikwalaho, a lembe ga wu 20 ga kufuma kakwe give 455 Mahlweni ka Nguva ya Hina. Makunu  hi na ni masangulo ya xiprofeto xa Danieli xa wuMessia, ku nga, 455 Mahlweni ka Nguva ya Hina.

Danieli i komba a xikhati lexi xi nga wa ta hunza kala kuchikeleni ka “loyi a totilweko loyi a nga hosi.” A xiprofeto xi wulawula hi “ntlhanu wa maviki ni mambiri; zonake ni 62 wa maviki” — lawa ma tlhanganyisako a 69 wa maviki. Xana a xikhati lexo xi lehile kala kwihi? A wuhunzuluseli go tala ga Biblia gi komba lezaku lawo a hi maviki ya ntlhanu wa masiku ni mambiri, kanilezi maviki ya malembe. Lezo zi wula ku ngalo a viki ginwe ni ginwani gi yimela a ntlhanu wa malembe ni mambiri. A mhaka leyi ya maviki ya malembe, kutani zipanze za ntlhanu wa malembe ni mambiri, yi wa tiviwa hi vaJuda va le zikhatini za kale. Hi xikombiso, va wa hlayisa a lembe ga Sabado malembeni wontlhe ya wuntlhanu ni mambiri. (Eksodusi 23:10, 11) Hikwalaho, a maviki lawo ya 69 ya lomu ka xiprofeto ma wumba a 69 wa zipanze za 7 wa malembe a xinwe ni xinwani xa zona, zonake ma tlhanganyisa a 483 wa malembe.

Makunu ku sele ku hlayela. Loku hi hlayela kusukela 455 Mahlweni ka Nguva ya Hina, a 483 wa malembe ma hi chiketa ka lembe ga 29 Nguveni ya Hina. Khwatsi-khwatsi lego hi gona a lembe legi Jesu a bapatizilweko ha gona a tlhela ava Messia! * (Luka 3:1, 2, 21, 22) A kuva xiprofeto lexi xa Biblia xi tatisekile hi ndlela leyo za tiyisa kukholwa.