XANA u alakanya yini hi Siku ga Kulamula? A vanyingi va alakanya lezaku munwe ni munwe, a tibiliyoni ta vanhu ti ta nehiwa hi kulanzelana mahlweni ka xitshamu xa wuhosi xa Nungungulu. Kwalaho, a munhu ni munhu i ta lamuliwa. A vo kari va ta chachazelwa hi kuya paradiseni ga le tilweni, niku a vanwani va ta konelwa kuxaniseka ka pinzukelwa. Kanilezi, a Biblia gi wulawula zilo zo hambana nguvu ni lezo xungetano hi xikhati lexo. A Mhaka ya Nungungulu yi gi komba kota xikhati xa kutsumba ni kuwuyiselwa ka zilo, na ku nga hi xikhati xo tshisa.

Lomu ka Kuvululelwa 20:11, 12, hi gonza lezi mupostoli Johani a hlawutelisako zona a Siku ga Kulamula: “Nzi lo wona a xitshamu xa hombe xa wuhosi xo basa, ni loyi a tshamileko ka xona; a tilo ni misava zi lo tsutsuma nghoheni yakwe, a zi kumelwangi wutshamu. Nzi lo wona a vafileko, lava vahombe ni vatsongwani, na va yimile mahlweni ka xitshamu xa wuhosi, ku lo vululwa mabhuku. Ku lo vululwa ginwani bhuku gi nga bhuku ga wutomi; ni vafileko va lo lamulwa hi lezi zi tsalilweko mabhukwini hi mitiro yabye.” Himani a Mulamuli loyi ku wulawuliwako hi yena laha?

Jehova Nungungulu hi yena Mulamuli wa hombe wa vanhu. Kanilezi, yena i nyika munhu munwani a ntiro lowo wa kulamula. Maringano ni bhuku ga Mitiro 17:31, mupostoli Paule i wulile lezaku Nungungulu “i vekile a siku legi a ta nga lamula ha gona tiko hi kululama hi munhu a mu yimisileko.” A Mulamuli loye hi Jesu Kristu  loyi a vuxilweko hi ka vafileko. (Johani 5:22) Hambulezo, xana gi ta sangula rini a Siku ga Kulamula? Xana gi ta teka xikhati muni?

A bhuku ga Kuvululelwa gi komba lezaku a Siku ga Kulamula gi sangula anzhako ka yimpi ya Har–Magedoni, a xikhati lexi a mafambisela ya Satani ma to ngha ma lovisilwe misaveni. * (Kuvululelwa 16:14, 16; 19:19–20:3) Anzhako ka Har–Magedoni, Satani ni madimoni yakwe va ta khotselwa nkeleni wa lieswila hi 1000 wa malembe. Nzeni ka xikhati lexo, a 144.000 wa zigatshomba za le tilweni zi tava valamuli zi tlhela zi “fuma zinwe na Kristu a 1000 wa malembe.” (Kuvululelwa 14:1-3; 20:1-4; Va Le Roma 8:17) A Siku ga Kulamula a hi ximaho xa xihatla xa siku ginwe ntsena. Gona gi teka a 1000 malembe.

Nzeni ka xikhati lexo xa 1000 wa malembe, Jesu i ta “lamula a vahanyako ni vafileko.” (2 Timote 4:1) “A vahanyako” va tava a “xidlemo xa tsanza-vahlayi” lexi xi to pona a Har–Magedoni. (Kuvululelwa 7:9-17) Mupostoli Johani kambe i wonile “a vafileko . . . na va yimile mahlweni ka xitshamu xa wuhosi” xa kulamula. Kota lezi Jesu a tsumbisileko, lava ‘va nga le zilahleni va tazwa a gezu [ga Kristu], va huma’ hi kuvuxiwa hi ka vafileko. (Johani 5:28, 29; Mitiro 24:15) Kanilezi, xana vontlhe va ta lamuliwa hi ka xiseketelo muni?

Hi kuyelana ni muwoniso wa mupostoli Johani, “ku lo vululwa mabhuku.” Ni “vafileko va lo lamulwa hi lezi zi tsalilweko mabhukwini hi mitiro yabye.” Xana lomu ka mabhuku lawo ku tsalilwe mitiro leyi a vanhu va yi mahileko kale? Ahihi, a kulamula ku nga ta seketelwa ka lezi a vanhu va zi mahileko mahlweni ka kufa kabye. Hi zi tivisa kuyini lezo? A Biblia gi ngalo: “Loyi a fileko i tirulwe kuonheni.” (Va Le Roma 6:7) Hi mawulela manwani, lava va vuxiwako hi ka vafileko va wuya kuhanyeni na va hi xiyinweni xi basileko. Hikwalaho, ko khwatsi a mabhuku ma yimela a zileletelo zinwani za Nungungulu. Kasi ku hanya kala kupinzuka, lava va ponako ka Har–Magedoni zinwe ni lava va vuxiwako hi ka vafileko va tava ni xilaveko xa ku ingisa milayo ya Nungungulu, a ku patsa ni zileletelo zontlhe za ziswa lezi zi kotekako lezaku Jehova a zi humesa nzeni ka 1000 wa malembe. Makunu, a vanhu va ta lamuliwa hi kuya hi lezi va to zi maha nzeni ka Siku ga Kulamula.

 Nzeni ka Siku ga Kulamula a tibiliyoni ta vanhu ti tava ni xikhati xa ku sangula ku gonza xungetano hi kuranza ka Nungungulu kasi va ti zwananisa na kona. Lezo zi wula lezaku ku tava ni ntiro wa hombe wa kugonzisa. Hakunene, ‘a vaaki va misava va ta gonza kululama.’ (Isaya 26:9) Kanilezi, a hi vontlhe va to zi lava a ku ti zwananisa ni kuranza ka Nungungulu. A bhuku ga Isaya 26:10 gi ngalo: “Loku a wakubiha a rivalelwa, a nga gonzi ku maha kululama, ni lomu tikweni ga kululama i ta maha kubiha, a nga woni a wukulu ga Jehova.” A vakubiha va ta dawelwa magumo nzeni ka Siku ga Kulamula. — Isaya 65:20.

A kugumeseni ka Siku ga Kulamula, a vanhu lava va to pona va tava va ‘vukile’ kota vanhu vo mbhelela. (Kuvululelwa 20:5) Hizalezo, nzeni ka Siku ga Kulamula, a vanhu va ta wuyiselwa xiyinweni xabye xo sangula xa kumbhelela. (1 Va Le Korinte 15:24-28) Zonake ku tata a xikambelo xa kugumesa. Satani i ta tlhatlhiwa hi lomu makhotsweni yakwe a tlhela a nyikiwa a xikhati xo gumesa xa ku zama ku khohlisa vanhu. (Kuvululelwa 20:3, 7-10) Lava va to mu ala va ta amukela a kutatiseka ka xitsumbiso lexi xa Biblia: “A valulamileko va taga tshomba ya tiko, va aka ka gona kala kupinzuka.” Ina, a Siku ga Kulamula gi tava xikhati xa makatekwa ka vanhu vontlhe vo tsumbeka!