1, 2. Hi nga gi kuma kwihi a wuchavelo go hlayiseka inyamutlha?

TI ALAKANYELE na u famba ndleleni hi siku ga xingulu. A marefu ma sangula ku phuma. Ku sangula ku hatima, ku dzinza, zonake kuna vula ya hombe nguvu. U sangula ku famba hi kuhatlisa, na u nga tivi ni xo maha, na u lava wutshamu ga ku fihlala. Kwalaho, kusuhani ni ndlela, u wona wuchavelo. Wutshamu go tiya, go woma ni ga ku navetisa. Hakunene u ta gi nyika nguvu lisima a wutshamu lego go hlayiseka!

² Hi hanya zikhatini za gujeguje yo fana ni xingulu. A matshamela ya tiko ma ya ma biha nguvu. Kanilezi ku na ni wutshamu go hlayiseka, a wuchavelo gi zi kotako ku hi vikela ka mhango ya simasima. Wutshamu muni lego? Wona lezi a Biblia gi zi gonzisako: ‘Nzi taku ha Jehova: I wuchavelo ga mina ni khokhola ga mina, Nungungulu wa mina loyi nzi mu tsumbako.’ — Tisimu 91:2.

3. Xana hi nga mahisa kuyini lezaku Jehova ava wuchavelo ga hina?

³ Hi nga alakanyela lezi ntsena! Jehova, a Muvangi ni Hosi ya Hombe ya wuako gontlhe, wa zi kota ku maha wuchavelo ga ku hi vikela. Yena a nga hi vikela, hakuva i na ni ntamu wa ku hunza  vanhu vontlhe kutani michumu leyi yi zi kotako ku hi mahela kubiha. Hambu loku hi wela mhangweni, Jehova wa zi kota ku fuvisa a kubiha kontlhe loku ku humelelako hi kota ya timhango leto. Xana hi nga mahisa kuyini lezaku Jehova ava wuchavelo ga hina? Hi fanele ku mu tsumba. A ku hunza lezo, a Mhaka ya Nungungulu ya hi khongotela yiku ngalo: “Mu ti hlayisa liranzweni la Nungungulu.” (Juda 21) Ina, hi fanele ku simama liranzweni la Nungungulu, na hi hlayisa kubohana ka liranzo ni Dadani wa hina wa le tilweni. Loku hi maha lezo hi ta tiyiseka lezaku yena i wuchavelo ga hina. Kanilezi hi nga ku akisa kuyini a kubohana loko?

4, 5. Hi tihi a tindlela to kari leti Jehova a kombisileko ha tona liranzo ka hina?

⁴ Kasi ku simama liranzweni la Nungungulu, hi fanele ku tiva lezi Jehova a kombisako zona liranzo lakwe ka hina. Alakanyela a tigonzo to kari ta Biblia leti u ti gonzileko hi ku vuniwa hi bhuku legi. Kota Muvangi, Jehova i hi nyikile a misava kota muti wa hina wo tsakisa. I yi tatile hi zakuga zo tala ni mati, titshomba ta ntumbuluko, zihari zo hlamalisa, ni kusaseka ka tiko. Kota Mutumbuluxi wa Biblia, Nungungulu i hi kombile vito gakwe ni matshamela yakwe. A ku hunza lezo, a Mhaka yakwe yi komba lezaku yena i rumele a N’wana wakwe wo ranzeka misaveni, a vumelela lezaku Jesu a xaniseka a tlhela a hi fela. (Johani 3:16) Xana a xinyikiwo lexo xi wula yini ka hina? Xi hi nyika kutsumba ka wumanziko go tsakisa.

⁵ A kutsumba ka hina ka wumanziko ku khegele kambe ka wunwani nchumu lowu Nungungulu a wu mahileko. Jehova i yimisile a wukosi le tilweni, gi nga Mufumo wa wuMessia. Lokuloku wona wu ta mbheta a kuxaniseka kontlhe zonake wu hunzula misava yiva paradise. Alakanyela lezo ntsena! Ha zi kota ku hanya seyo hi kurula ni kutsaka kala kupinzuka. (Tisimu 37:29) Na zi nga se ku maheka lezo, Nungungulu wa hi komba ndlela ya ku hanya wutomi ga chukwana zalezi. I hi nyikile kambe a xinyikiwo xa mukhongelo, ku nga ndlela ya ku wulawula naye hi kutlhatlheka. Leto tindlela titsongwani ntsena leti Jehova a kombisileko ha  tona liranzo ka vanhu vontlhe ni ka wena wutsumbu.

6. Xana u fanele ku hlamulisa kuyini a liranzo leli Jehova a li kombako ka wena?

⁶ Kanilezi, u fanele ku alakanyela a xiwutiso lexi xa lisima: Xana nzi ta hlamulisa kuyini a liranzo la Jehova? A vo tala va taku ngalo, “Hakunene, nzi fanele ku ranza Jehova hi kota ya lezi yenawu a nzi ranzako.” Xana wenawu u ti zwisa lezo? Jesu i te ngalo a nayo lowu hi wona wu nga wa hombe ka yontlhe: “U ta ranza Hosi [“Jehova,” NM] Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe.” (Mateu 22:37) Hakunene u na ni zigelo zo tala za ku ranza Jehova Nungungulu. Kanilezi xana lexi xi ku mahako u wula lezaku wa ranza Jehova hi mbilu ya wena yontlhe, ni muhefemulo wa wena wontlhe, ni kupima ka wena kontlhe, i kutizwa?

7. Xana a kutizwa hi kona koce ku lavekako lezaku u wula a ku wa mu ranza Nungungulu? Tlhamusela.

⁷ Kota lezi zi tlhamuselwako lomu ka Biblia, a ku ranza Nungungulu a hi kutizwa ntsena. Hakunene, hambulezi a kutizwa ka liranzo ha Jehova ku nga ka lisima, a kutizwa loko i masangulo ntsena ya ku mu ranza hi lisine. A nyungi ya hanzu yi na ni lisima lezaku ku kula a sinya yi pswalako mihanzu leyo. Hambulezo, loku u lava a hanzu, xana u nga xalala hi ku nyikiwa a nyungi ya kona ntsena? Hakunene a wu nge xalali! Hi kufanana, a kuzwa liranzo ha Jehova Nungungulu i masangulo ntsena. A Biblia gi gonzisa lezi: “A ku mu ranza Nungungulu hi ku hlayisa milayo yakwe; ni milayo yakwe a yi karati.” (1 Johani 5:3) Kasi liva lo mbhelela, a liranzo ha Nungungulu li fanele ku pswala mihanzu ya yi nene. Li fanele ku kombisiwa hi mitiro. — Mateu 7:16-20.

8, 9. Xana hi nga kombisisa kuyini a liranzo la hina ni kubonga ka hina ka Nungungulu?

⁸ Hi kombisa liranzo la hina ha Nungungulu a xikhati lexi hi hlayisako milayo yakwe ni ku tirisa a matshinya ya milayo yakwe wutomini. A zi karati a ku maha lezo. Wutshanwini ga ku binza, a milayo ya Jehova yi mahelwe ku hi vuna a ku hanya wutomi gi nene, go tsakisa, ni go xalalisa. (Isaya 48:17, 18) A xikhati lexi hi  hanyako hi kuyelana ni zileletelo za Jehova, hi komba ka Dadani wa hina wa le tilweni lezaku hakunene ha bonga hi zontlhe lezi a hi mahelako. Lezi zi nga tsakisiko hi lezaku vanhu vatsongwani nguvu lava va kombako a kubonga loko nguveni leyi. Hina a hi zi lavi kuva lava va nga bongiko, a ku fana ni vo kari va hanyileko ka xikhati lexi Jesu a nga hi misaveni. Jesu i lo hanyisa a khume ga vanhu va nga hi ni hlokonho, kanilezi munwe ntsena loyi a wuyileko a ta mu bonga. (Luka 17:12-17) Hi lisine ha zi lava ku fanana ni loyi a bongileko, na ku nga hi ku fana ni lava va ntlhanu ni mune va tsikileko ku bonga!

⁹ Makunu, hi yihi a milayo ya Jehova leyi hi faneleko ku yi hlayisa? Hi sina hi wulawulile hi yo tala ya yona lomu ka bhuku legi, kanilezi a hi vuxeteni a yo kari. A ku hlayisa milayo ya Nungungulu ku ta hi vuna a ku simama liranzweni la Nungungulu.

10. Tlhamusela lezaku hikuyini zi hi za lisima a ku simama ku gonza ha Jehova Nungungulu.

¹⁰ A ku gonza xungetano hi Jehova xigava xa lisima xa ku mu tshinelela. I ndlela yi faneleko ku simama yi nga nyimi. Loku ku wo khwatsi u le handle na gi hi wusiku go  titimela nguvu na u wora nzilo, xana u wa ta wu tsika wu wombha wu guma wu timeka? Ahihi. U wa ta tshama hi ku wu hlanganyetela kasi wu ta simama ku vura khwatsi. Za koteka ku ngha a wutomi ga wena gi khegela kuvureni ka nzilo lowo! Kota lezi a tihunyi ti vurisako nzilo, hi kufanana a “wutivi ga Nungungulu” gi maha lezaku a liranzo la hina ka Jehova li simama li tiyile. — Mavingu 2:1-5.

11. Xana a valanzeli va Jesu va khumbisilwe kuyini hi gonzo yakwe?

¹¹ Jesu i wa lava lezaku a valanzeli vakwe va simama ku kombisa liranzo lo hanya ni lo tiya khwatsi ka Jehova ni ka Mhaka Yakwe ya lisine ni ya lisima. Anzhako ka kuva a vukile hi ka vafileko, Jesu i lo gonzisa vambiri va vapizani vakwe xungetano hi ziprofeto za lomu Mitsalweni ya xiHeberu leyi yi nga tatisekile ka yena. Zi va khumbisile kuyini lezo? Loku ku hunzile xikhatanyana, vona va te ngalo: “Kasi a timbilu ta hina ti wa nga vuri nzeni ka hina, laha a nga kanela ka hina ndleleni, a hi vululela mitsalo ke?” — Luka 24:32.

12, 13. (a) Xikari ka vanhu vo tala inyamutlha, xini xi humeleleko a liranzo ha Nungungulu ni Biblia? (b) Xana hi nga vikelisa kuyini a liranzo la hina lezaku li nga titimeli?

¹² A xikhati lexi u sangulileko ku gonza lezi a Biblia gi zi gonzisako hakunene, xana u zi wonile lezaku a mbilu ya wena yi lo sangula ku vura hi kutsaka, hi kuchivirika, ni liranzo ka Nungungulu? Handle ko kanakana yi vurile. A vanyingi va ti zwisile lezo. Lexi xi karatako makunu hi ku maha lezaku a liranzo lelo lo tiya li simama ku hanya u tlhela u li vuna a ku kula. A hi zi lavi ku lanzela a kubyekelela ka tiko ga nguva leyi. Jesu i wulile na ka ha hi mahlweni lezaku: “A liranzo la vanyingi li ta titimela.” (Mateu 24:12) Xana u nga vikelisa kuyini a liranzo la wena ka Jehova ni ka lisine la Biblia lezaku li nga titimeli?

¹³ Simama ku gonza ha Jehova Nungungulu zinwe na Jesu Kristu. (Johani 17:3) Alakanyela hi kueta xungetano hi lezi u zi gonzako Mhakeni ya Nungungulu, u tlhela u ti wutisa: ‘Xana lezi zi nzi gonzisa yini hi Jehova Nungungulu? Zi nzi nyika xigelo muni xo engeteleka xa lezaku nzi mu ranza hi mbilu ya mina yontlhe, hi kupima ka mina kontlhe, ni muhefemulo wa mina wontlhe? (1 Timote 4:15) A kualakanyela loko ku ta maha lezaku a liranzo la wena ka Jehova li simama ku vura khwatsi.

14. Xana a mukhongelo wu nga hi vunisa kuyini a ku hlayisa a liranzo la hina ka Jehova na li hanya?

 ¹⁴ A yinwani ndlela ya kuva u hlayisa ha yona a liranzo la wena ha Jehova na li vura khwatsi hi kuva u khongela hi kukhanzakanya. (1 Va Le Tesalonika 5:17) Lomu ka Xipimo 17 xa bhuku legi, hi gonzile lezaku a mukhongelo xinyikiwo xa lisima hi nyikilweko hi Nungungulu. A ku fana ni lezi a kuzwanana ka vanhu ku tiyako hi kota ya kuangulana ko khanzakanya ni ko tlhatlheka, a kuzwanana ka hina na Jehova ku simamawu ku tiyile ku tlhela ku hanya a xikhati lexi hi khongelako ka yena hi kukhanzakanya. Za lisima a ku cima hi nga tsiki a mikhongelo ya hina yiva yo tatisa nayo — ku nga ku yi maha hi ku phindaphinda magezu ya manwe na ma nga sukeli mbilwini, na ma nga wuli nchumu kambe. Hi fanele ku wulawula na Jehova hi ndlela leyi a nwanana a wulawulisako zona ni raru wakwe a ranzekako. Hakunene hi lava ku wulawula hi xichawo, kanilezi na hi tlhatlhekile, na zi sukela mbilwini. (Tisimu 62:8) Ina, a xigonzo xa Biblia xa hina wutsumbu ni mukhongelo wo sukela mbilwini zipanze za lisima za wukhozeli ga hina, niku zi hi vuna a ku simama liranzweni la Nungungulu.

15, 16. Hikuyini hi faneleko ku wona a ntiro wa ku xumayela hi Mufumo kota lungelo ni tshomba?

¹⁵ A xigonzo xa Biblia xa hina wutsumbu ni mukhongelo tindlela ta ku khozela leti hi zi kotako ku ti tatisa na hi hi hoce. Kanilezi, makunu a hi woneni a tshamela go kari ga wukhozeli legi hi gi tatisako laha kubaseni: a ku wulawula ni vanwani xungetano hi lezi hi zi kholwako. Xana u sina u sangulile a ku bhulela vanwani hi lisine la Biblia? Loku ku hi lezo, u na ni lungelo go saseka. (Luka 1:74) A xikhati lexi hi bhulelako vanwani a lisine leli hi li gonzileko xungetano hi Jehova Nungungulu, hi tatisa xiavelo xa lisima nguvu lexi xi nyikilweko a maKristu wontlhe ya lisine — xa ku xumayela a mahungu yo saseka ya Mufumo wa Nungungulu. — Mateu 24:14; 28:19, 20.

¹⁶ Mupostoli Paule i wa wona a wutireli gakwe kota nchumu wa lisima, a gi vitana a ku i tshomba. (2 Va Le Korinte 4:7) A ku wulawula ni vanhu xungetano ha Jehova Nungungulu ni makhungo yakwe i ntiro wa wuchukwana lowu u nga wu mahako. I ntiro wu mahelwako a Hosi ya chukwana, niku wu tisa mabhinzu ya  chukwana a ku hunza wontlhe. Hi ku nghenela a ntiro lowu, u vuna vanhu va timbilu ti nene lezaku va tshinela ka Dadani wa hina wa le tilweni ni ku va vuna a ku sangula ku famba ndleleni yi yako wutomini ga pinzukelwa! Xana wu kona wunwani ntiro wu tsakisako a ku hunza lowo? A ku hunza lezo, a ku kustumunya ha Jehova ni Mhaka yakwe ku engetela a kukholwa ka wena wutsumbu  ku tlhela ku tiyisa liranzo la wena ha yena. Jehova wa nyika a lisima la hombe a mizamo ya wena. (Maheberu 6:10) A ku tshama u khomekile ntirweni lowo ku ku vuna a ku simama liranzweni la Nungungulu. — 1 Va Le Korinte 15:58.

17. Hikuyini a wutireli ga wuKristu gi nga ga xihatla inyamutlha?

¹⁷ Zi nene a ku alakanya lezaku a ntiro wa ku xumayela a Mufumo i ntiro wa xihatla. A Biblia gi ngalo: “Kanela a mhaka; pinyama [“ka yona hi xihatla,” NM].” (2 Timote 4:2) Hikuyini a ntiro lowo wu nga wa xihatla nguvu inyamutlha? A Mhaka ya Nungungulu yi hi byela lezi: “A siku ga hombe ga Jehova gi kusuhani, ga tshinela hi xihatla.” (Zefania 1:14) Ina, a xikhati xa Jehova xa ku ta fuvisa a mafambisela wontlhe lawa ya zilo xa tshinela hi kuhatlisa. A vanhu va fanele ku tivisiwa! Vona va fanele ku tiva lezaku zalezi xikhati xa ku hlawula Jehova kota Hosi yabye ya Hombe. A kugumesa ku “nga ta tindeka.” — Habakuka 2:3.

18. Hikuyini hi faneleko ku khozela Jehova laha kubaseni na hi hlengela ni maKristu ya lisine?

¹⁸ Jehova i lava lezaku hi mu khozela laha kubaseni na hi hlengela ni maKristu ya lisine. Hikwalaho a Mhaka yakwe yi ngalo: “Ngha hi khatalelana kasi ha susumetana liranzweni ni mitirweni yo saseka; na hi nga tsiki a tinkhozo ta hina khwatsi hi mukhuwo wa vanwani, kanilezi hi khongotelana; nguvunguvu kota lezi mu wonako lezaku a Siku gi tshinela kusuhani.” A xikhati lexi hi tlhanganako ni makholwa-kulori mitlhanganwini ya wuKristu, hi na ni xikhati xa xi nene xa ku dumisa ni ku khozela a Nungungulu wa hina wo ranzeka. Kwalomo, ha akana ni ku tiyisana kambe.

19. Mizamo muni hi zi kotako ku yi maha kasi ku tiyisa a kubohana ka liranzo lomu bandleni ga wuKristu?

¹⁹ A xikhati lexi hi hlengelako ni vanwani vakhozeli va Jehova, hi tiyisa a kubohana ka liranzo ni ka wunghana lomu bandleni. Za lisima a ku hi wona matshamela ma nene ka munwe ni munwani wa hina, kota lezi Jehova a wonako matshamela ma nene ka hina. U nga rinzeli kumbhelela hi ka makholwa-kuloni. Alakanya lezaku vona vontlhe va lomu ziyinweni zo hambanahambana za kukula hi tlhelo ga moya, niku a munwe ni munwani wa hina wa maha zihoxo. (Va Le Kolosi 3:13) Hlota ku aka wunghana go tiya ni lava va mu ranzako nguvu Jehova, zonake u ta ti wona na u kula hi tlhelo ga moya. Ina, a ku khozela Jehova ni vamakabye va wena va moya va xinuna ni va xisati ku ta  ku vuna a ku simama liranzweni la Nungungulu. Xana Jehova i chachazelisa kuyini lava va mu khozelako hi kutsumbeka niku hizalezo va simama liranzweni lakwe?

20, 21. Xini a “wutomi legi gi nga wutomi hizinene,” niku hikuyini gi hi kutsumba ko tsakisa?

²⁰ Jehova i chachazela a malanza yakwe yo tsumbeka hi wutomi, kanilezi wutomi go tshamisa kuyini? Xana u alakanya lezaku wo hanya hakunene zalezi? Vanyingi va hina va nga haku a hlamulo wu laha kubaseni. A xa hombe hi lezaku, hina ha hefemula, haga, niku hanwa. Hakunene ha hanya. Niku zikhatini za hina za kutsaka , hi nga haku, “Legi makunu hi gona wutomi hakunene!” Kanilezi, a Biblia gi komba lezaku, hi mawulela ya lisine, a nga kona munhu a hanyako hakunene inyamutlha.

²¹ A Mhaka ya Nungungulu ya hi khongotela a ku “kuma wutomi legi gi nga wutomi hizinene.” (1 Timote 6:19) A magezu lawo ma komba lezaku a “wutomi legi gi nga wutomi hizinene” i nchumu hi rinzelako ku wu kuma xikhatini xi tako. Ina, a xikhati lexi hi to ngha na hi mbhelele, hi ta hanya wutomi legi gi nga wutomi hizinene, hilezaku hi ta ngha na hi hanya kota lezi Nungungulu a nga zi xuvisile zona kusanguleni. Loku hi kari hi hanya paradiseni ga misava na hi hi ni wutomi go mbhelela, ni kurula, ni kutsaka, hi magumo hi ta buza a “wutomi legi gi nga wutomi hizinene” — a wutomi ga pinzukelwa. (1 Timote 6:12) Xana loko a hi kutsumba ko tsakisa?

22. Xana u nga zi kotisa kuyini a ku khomelela khwatsi ka “wutomi legi gi nga wutomi hizinene”?

²² Xana hi nga zi kotisa kuyini a ku khomelela khwatsi ka “wutomi legi gi nga wutomi hizinene”? Mhakeni yaleyo ya yinwe, Paule i khongotele maKristu lezaku ‘ma maha zo saseka’ ma tlhela ‘ma fuma hi mitiro yi nene.’ (1 Timote 6:18) Makunu, zi te dlunya lezaku a ku khomelela khwatsi ka wutomi legi gi nga wutomi hizinene ku khegela nguvu ka ndlela leyi hi tirisako ha yona a lisine leli hi li gonzileko lomu ka Biblia. Kanilezi, xana Paule i wa kari a wula lezaku hi kuma “wutomi legi gi nga wutomi hizinene” hi ku maha mitiro yo saseka? Ahihi, hakuva a kutsumba loko ko tsakisa ku koteka hi kuva hi amukela a “tipswalo” ta Nungungulu.  (Va Le Roma 5:15) Hambulezo, Jehova wa tsaka hi ku chachazela lava va mu tirelako hi kutsumbeka. Yena i lava ku ku wona na u hanya a “wutomi legi gi nga wutomi hizinene.” A wutomi lego go tsakisa, ga kurula, ni ga pinzukelwa, gi rinzela lava va simamako liranzweni la Nungungulu.

23. Hikuyini zi hi za lisima a ku simama liranzweni la Nungungulu?

²³ Munwe ni munwani wa hina i maha khwatsi hi ku ti wutisa lezi, ‘Xana nzi khozela Nungungulu hi ndlela leyi a yi yimisileko lomu ka Biblia?’ Loku hi ti hlola, siku ni siku, hi wona lezaku hi khozela Nungungulu hi ndlela leyo, zonake hi le ndleleni ya yi nene. Hi nga tiyiseka lezaku Jehova wuchavelo ga hina. I ta vikela vanhu vakwe vo tsumbeka masikwini lawa yo gumesa ni ya zikarato ya mafambisela lawa ya zilo ya kale. Jehova kambe i ta hi nghenisa hi kuhlayiseka mafambiseleni ya zilo ya maswa ni ya kutsakisa ma nga kusuhani. A hi kutsaka ka hombe hi tova nako hi ku wona xikhati lexo! A hi kutsaka loku hi tova nako hi kuva hi hlawulile za zi nene masikwini lawa yo gumesa! Loku u hlawula a za zi nene zalezi, u ta buza “wutomi legi gi nga wutomi hizinene,” kota lezi Jehova Nungungulu a nga zi xuvisile zona kusanguleni, hi kupinzuka ni kupinzuka!