1. Hi wihi a mukhongelo wu tivekako nguvu lowu wu to kambisiswa zalezi?

TIMILIYONI ta vanhu misaveni yontlhe ti tolovele a mukhongelo lowu a vanyingi va wu vitanako Dadani wa Hina, kutani Mukombelo wa Hosi. A magezu lawo ya mambiri ma wula a mukhongelo wu tivekako nguvu lowu Jesu Kristu wutsumbu a nga wu nyika kota xikombiso. Wona mukhongelo wa lisima nguvu, niku a ku kambisisa a zikombelo zo sangula za zinharu za wona ku ta ku vuna a ku gonza zinwani xungetano hi lezi a Biblia gi zi gonzisako hakunene.

2. Hi zihi a zilo zinharu za lezi Jesu a gonzisileko vapizani vakwe a kuva va zi khongelela?

² Kusanguleni ka mukhongelo lowu wa xikombiso, Jesu i gonzisile vaingiseli vakwe ku ngalo: “Hikwalaho khongelani kota lezi: Dadani wa hina wa le tilweni, a vito ga wena a gi hlawuliwe. A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.” (Mateu 6:9-13) Kasi zi wula yini a zikombelo lezo za zinharu?

3. Zini lezi hi faneleko ku zi tiva xungetano hi Mufumo wa Nungungulu?

³ Hi sina hi gonzile zo tala xungetano hi vito ga Nungungulu, Jehova. Niku hi wulawulile zo kari xungetano hi kuranza ka Nungungulu — lezi a zi mahileko ni lezi a ha ta zi mahelako vanhu.  Hambulezo, xana Jesu i wa wula yini a xikhati lexi a nga hi byela lezaku hi khongela a ku: “A wute mufumo wa wena”? Xini Mufumo wa Nungungulu? Xana a kuta ka wona ku ta basisa vito ga Nungungulu hi ndlela muni? Niku xana a kuta ka Mufumo ku zwananisa kuyini ni kumaheka ka kuranza ka Nungungulu?

4. Xini Mufumo wa Nungungulu, niku himani Hosi ya wona?

⁴ A Mufumo wa Nungungulu wukosi gi yimisilweko hi Jehova Nungungulu na gi hi ni Hosi yi hlawulilweko hi Nungungulu. Himani a Hosi ya Mufumo wa Nungungulu? Jesu Kristu. Kota Hosi, Jesu ngwa hombe a ku hunza vafumeli vontlhe va vanhu niku i vitwa ku ngalo i “Hosi ya tihosi, ni Mufumeli wa vafumeli.” (1 Timote 6:15) Yena i na ni ntamu wa ku maha zilo zinyingi za zi nene a ku hunza vontlhe vafumeli va vanhu, hambu ni lava va nga va chukwana xikari ka vona.

5. Xana a Mufumo wa Nungungulu wu fuma na wu hi kwihi, niku xana wu fumela yini?

⁵ Xana a Mufumo wa Nungungulu wu ta fuma na wu hi kwihi? Kasi i kwihi Jesu? Hakunene wa alakanya a kuva u gonzile lezaku yena i delwe mhanzeni ya xanisa, a tlhela vuxiwa hi ka vafileko. Xikhatanyana nzhako ka lezo, yena i loya tilweni. (Mitiro 2:33) Hikwalaho, hi kwaseyo wu nga kona a Mufumo wa Nungungulu — le tilweni. Hi zalezo zi mahako a ku a Biblia gi wu vitana ku ngalo “mufumo wa . . . le tilweni.” (2 Timote 4:18) Hambulezi a Mufumo wa Nungungulu wu nga le tilweni, wona wu ta fumela misava. — Kuvululelwa 11:15.

6, 7. Zini lezi zi mahako Jesu ava Hosi yo hlawuleka?

⁶ Zini lezi zi mahako Jesu ava Hosi yo hlawuleka? A xigelo xo sangula hi lezaku cima a nga tafa. Laha gi ecanisako Jesu ni tihosi ta vanhu, a Biblia gi mu vitana ku ngalo hi “yena yece loyi a nga hiko na kufa, loyi a tshamileko kuwonekeleni loku ku nga hiko na kutshinelelwa.” (1 Timote 6:16) Lezo zi wula ku ngalo a zilo zontlhe za zi nene lezi Jesu a zi mahako zi ta tshama kala kupinzuka. Niku ha zi tiva hakunene lezaku yena i ta maha zilo zo tala lezi zi to vuna vanhu vakwe.

⁷ Wona a xiprofeto lexi xa Biblia xi wulawulako ha Jesu: “A  Moya wa Jehova wu ta tshama hehla ka yena, a moya wa wutlhari ni kupima, a moya wa wusungukati ni wa ntamu. A moya wa ku tiva ni wa ku chava Jehova. I ta tsakela ku chava Jehova. A nga ta lamula hi lezi a mahlo yakwe ma zi wonako, ge hambu ku kona hi kuzwa ka tindleve takwe. Kanilezi lava va vumalako i ta va lamula hi kululama, a tshanza hi nongameto timhakeni ta lava va tsimbeketilweko misaveni.” (Isaya 11:2-4) A magezu lawo ma komba lezaku Jesu i tsumbisilwe kuva Hosi yo lulama ni ya ku zwela wusiwana leyi yi to fumela vanhu va misava. U wa ta zi lava kuva ni mufumeli wo fana ni loye?

8. Hi vamani lava va to fuma zinwe na Jesu?

⁸ Laha ku na ni lisine linwani xungetano hi Mufumo wa Nungungulu: Jesu a nga ta fuma na a hi yece. Yena i tava ni vafumeli kulobye. Hi xikombiso, mupostoli Paule i byelile Timote ku ngalo: “Loku hi timisela, hi ta fuma zinwe” kota tihosi. (2 Timote 2:12) Ina, Paule, Timote, ni vanwani vanhu vo tsumbeka lava va hlawulilweko hi Nungungulu va ta fuma zinwe na Jesu Mufunweni wa le tilweni. Vanhu vangani va tova ni lungelo lego go hlawuleka?

9. Vanhu vangani va to fuma zinwe na Jesu, niku xana Nungungulu i sangulile rini a ku va hlawula?

⁹ Kota lezi zi kombilweko lomu ka Xipimo 7 xa bhuku legi, mupostoli Johani i lo nyikiwa a muwoniso laha a nga wona ‘Yivana [Jesu Kristu] na yi yimile xitsungeni xa Zioni [xiyimeko xakwe xa wuhosi le tilweni], na yi hi ni 144.000 lava va tsalilweko a vito ga yona ni vito ga Dadani wa yona laha zimombyeni zabye.’ Hi vamani volavo va 144.000? Johani wutsumbu wa hi byela: “Hi lava va lanzako Yivana ni kwihi laha yi yako kona. Va xabyilwe vanhwini a kuva mbhanzu wo ranga ka Nungungulu ni ka Yivana.” (Kuvululelwa 14:1, 4) Ina, lavo hi vapizani vo tsumbeka va Jesu Kristu lava va hlawulilweko a ku ya fuma le tilweni zinwe naye. Anzhako ka kuva va vuxilwe hi ka vafileko lezaku vaya wutomini ga le tilweni, ‘va ta fumela misava’ zinwe na Jesu. (Kuvululelwa 5:10) Kusukela masikwini ya vapostoli, Nungungulu wa hlawula maKristu yo tsumbeka lezaku ma tlhanganisa a ntsengo lowo wa 144.000.

10. Hikuyini a malulamiselo ya ku Jesu a fumela vanhu na a hi zinwe ni lava va 144.000 ma hi malulamiselo ya liranzo?

 ¹⁰ A malulamiselo ya ku Jesu a fumela vanhu na a hi zinwe ni lava va 144.000 malulamiselo ya liranzo. Hi xilo xinwe, Jesu wa zi tiva lezaku xini kuva munhu wa nyama niku xini ku xaniseka. Paule i te ngalo Jesu “a hi loyi a tsanzekako ku hi zwela wusiwana hi kota ya gome ga hina; kanilezi munwe loyi a ringilweko hi matlhelo wontlhe khwatsi hi hina, kanilezi a nga onhangi.” (Maheberu 4:15; 5:8) A vafumeli kulobye vakwe na vonawu va xanisekile va tlhela vava ni kutimisela a xikhati lexi va nga hi vanhu va nyama. Hi kuengetela, va lwisanile ni kungambheleli va tlhela va timisela a tixaka tontlhe ta mababyi. Hakunene, vona va ta tiva a zikarato lezi a vanhu va tlhanganako nazo!

11. Zini lezi Jesu a zi wulileko ku ngalo a vapizani vakwe va fanele ku zi khongelela xungetano hi kuranza ka Nungungulu?

¹¹ A xikhati lexi Jesu a ngaku a vapizani vakwe va fanele ku khongelela a Mufumo wa Nungungulu lezaku wuta, i tlhelile a ku ngalo vona va fanele ku khongelela lezaku a kuranza ka Nungungulu ku mahiwa “misaveni.” Nungungulu i le tilweni, niku a kuranza kakwe ka mahiwa xontlhe xikhati kwaseyo hi tingelosi to tsumbeka. Hambulezo, lomu ka Xipimo 3 xa bhuku legi, hi gonzile lezaku a ngelosi yo biha yi lo tsika ku maha kuranza ka Nungungulu zonake yi maha Adamu na Eva va onha. Lomu ka Xipimo 10, hi ta gonza zo tala xungetano hi lezi a Biblia gi zi gonzisako maringano ni ngelosi leyo yo biha, leyi yi vitwako Satani Diyabu. Satani ni tingelosi leti ti hlawulileko ku mu lanzela — ti vitwako madimoni — ​va vumelelwe lezaku va simama ku tshama le tilweni hi xikhatanyana. Hikwalaho, a kuranza ka Nungungulu ku wa nga mahiwi hi vontlhe le tilweni. Zalezo zi wa ta cica a xikhati lexi a Mufumo wa Nungungulu wu nga wa ta sangula ku fuma. A Hosi leyi ya yiswa yi yimisilweko xitshanwini xa wuhosi, Jesu Kristu, yi wa fanele kulwa yimpi na Satani. — Kuvululelwa 12:7-9.

12. Zimaho zihi za zimbiri lezi zi nga za lisima, zi hlawutelwako lomu ka Kuvululelwa 12:10?

 ¹² A magezu ya xiprofeto lexo lawa ma lanzelako ma hlawutela lezi zi nga wa ta humelela: “Nzi lozwa a gezu ga hombe le tilweni, giku: Makunu ku chikele a kuhanyiswa, ni ntamu, ni mufumo wa Nungungulu wa hina, ni ntamu wa Kristu wakwe; hakuva a muranisi wa vamakabye va hina [Satani] i hoxilwe lahasi, loyi a nga va ranisa mumu ni wusiku mahlweni ka Nungungulu wa hina.” (Kuvululelwa 12:10) Xana u polile a zimaho zimbiri za lisima lezi zi hlawutelwako ka vesi legi ga Biblia? Xa kusangula, a Mufumo wa Nungungulu wu fumelwako hi Jesu Kristu wu sangula ku fuma. Xa wumbiri, Satani o hlongoliwa le tilweni ata misaveni.

13. Hi wahi a magumo ya kuhlongoliwa ka Satani le tilweni?

¹³ Hi wahi a magumo ya zimaho lezo za zimbiri? Xungetano hi lezi zi humeleleko le tilweni, hi gonza lezi: “Hikwalaho, tsakani nwina matilo, na nwina lava mu tshamako ka wona.” (Kuvululelwa 12:12) Ina, a tingelosi to tsumbeka ta tsaka le tilweni hakuva lezi Satani ni madimoni yakwe va kalako va nga ha hi kona lomo makunu, vontlhe le tilweni va tsumbeka ka Jehova Nungungulu. Ku na ni kurula ni kuzwanana ko mbhelela ni ko tiya. A kuranza ka Nungungulu ka mahiwa makunu le tilweni.

14. Zini zi humelelako hi kota ya lezi Satani a hlongolilweko ata misaveni?

¹⁴ Hambulezo, ku nga wuliwa yini xungetano hi misava? A Biblia gi ngalo: “Nwina misava ni bimbi mu na ni khombo, hakuva Satani i relele ka nwina, na a zangarile nguvu, hakuva wa zi tiva lezaku a xikhati lexi xi mu saleleko xi tsongwanyani.” (Kuvululelwa 12:12) Satani i zangarile hi lezi a nga hlongoliwa le tilweni ni lezi a salelweko hi xikhati xi tsongwanyani. Hi kota ya zanga yakwe i vanga zikarato, kutani “khombo” misaveni. Hi ta gonza zo tala xungetano hi “khombo” lego ka xipimo lexi xi lanzelako. Kanilezi na hi tiva lezo, hi wa ta wutisa, Xana a Mufumo wu nga zi kotisa kuyini ku maha lezaku a kuranza ka Nungungulu ku mahiwa misaveni?

15. Hi kwihi a kuranza ka Nungungulu xungetano hi misava?

¹⁵ Alakanya lezi zi nga kuranza ka Nungungulu xungetano hi  misava. U zi gonzile lomu ka Xipimo 3. Le Edeni, Nungungulu i kombile lezaku a kuranza kakwe hi lezaku a misava yi maha paradise gi teleko hi vanhu va nga fiko, ni va kululama. Satani i lo maha lezaku Adamu na Eva va onha, zonake lezo zi lo khumba a kutatiseka ka kuranza ka Nungungulu xungetano hi misava, kanilezi a zi ku cicangi. Jehova wa ha lava lezaku ‘a valulamileko vaga tshomba ya tiko, va aka ka gona kala kupinzuka.’ (Tisimu 37:29) Niku a Mufumo wa Nungungulu wu ta tatisa a khungo lego. Hi ndlela muni?

16, 17. Zini lezi a bhuku ga Danieli 2:44 gi hi byelako xungetano hi Mufumo wa Nungungulu?

¹⁶ Alakanyela a xiprofeto lexi xi kumekako lomu ka Danieli 2:44. Kwalomo ha gonza: “A masikwini ya tihosi leto, Nungungulu wa le tilweni i ta vuxa a mufumo wu to kala wu nga lobyiswi, ni wuhosi ga wona cima gi nga ta nyikelwa ka ginwani tiko. Wu ta panza wu lovisa yontlhe mifumo leyi, wona wu ku tsonzoma kala kupinzuka.” Xana lezi zi hi byela yini xungetano hi Mufumo wa Nungungulu?

¹⁷ Xa kusangula, zi hi byela lezaku a Mufumo wa Nungungulu wu fanele ku yimiswa “masikwini ya tihosi leto,” kutani xikhatini lexi a mifumo yinwani ya ha hiko kona. Xa wumbiri, zi hi byela lezaku a Mufumo wu ta simama wu va kona kala kupinzuka. Wu nga ta khoziswa hambu ku valetwa hi wunwani mufumo. A xa wunharu, hi wona lezaku ku tava ni yimpi xikari ka Mufumo wa Nungungulu ni ka mifumo ya tiko legi. A Mufumo wa Nungungulu wu ta hlula. Hi kugumesa, wu tava wona woce wu to fumela vanhu. Zonake a vanhu va tava ni kufumelwa ka ku nene ka ku cima a va se nga ku wona.

18. Hi gihi a vito ga yimpi yo gumesa leyi yi tova kona xikari ka Mufumo wa Nungungulu ni mifumo ya tiko legi?

¹⁸ A Biblia gi na ni zo tala za ku hi byela xungetano hi yimpi leyo yo gumesa xikari ka Mufumo wa Nungungulu ni mifumo ya tiko legi. Hi xikombiso, gona gi gonzisa lezaku lezi a kugumesa ku tshinelako, a mimoya yo biha yi ta hangalasa mawunwa kasi ku khohlisa a ‘tihosi ta misava yontlhe.’ Na yi hi ni xigelo muni? Kasi ku “ti tsombanyisela [a tihosi] a kulwa ka siku lego ga hombe ga Nungungulu wa Ntamu-wontlhe.” A tihosi ta  misava ti ta tsombanyiselwa “wutshanwini legi hi xiHeberu va nge i Har–Magedoni.” (Kuvululelwa 16:14, 16) Hi kota ya lezi zi wuliwako lomu ka mavesi lawa ya mambiri, a kulwa ko gumesa loku ku tova kona xikari ka mifumo ya vanhu ni Mufumo wa Nungungulu ku vitwa ku ngalo i yimpi ya Har–Magedoni.

19, 20. Zini lezi zi sivelako lezaku a kuranza ka Nungungulu ku maheka misaveni zalezi?

¹⁹ Zini lezi a Mufumo wa Nungungulu wu to zi maha hi ku tirisa Har–Magedoni? Alakanya kambe hi lezi zi nga kuranza ka Nungungulu xungetano hi misava. Jehova i wa lava lezaku a misava yi tala hi vanhu vo lulama ni vo mbhelela lava va mu tirelako na va hi Paradiseni. Zini lezi zi sivelako a ku lezo zi maheka zalezi? Xo sangula, hina hi vaonhi, niku ha babya hi tlhela hifa. Kanilezi, hi gonzile lomu ka Xipimo 5 lezaku Jesu i hi fele kasi hi zi kota ku hanya kala kupinzuka. Kuzilava wa alakanya a magezu ma tsalilweko lomu ka Ivangeli ya Johani: “Nungungulu i lo ranza tiko kota lezi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa.” — Johani 3:16.

²⁰ A mhaka yinwani hi lezaku a vanhu vanyingi va maha za kubiha. Vona va hemba, va kanganyisa, ni ku maha zilo zi nga hlazekangiko. A va zi lavi ku maha a kuranza ka Nungungulu. Lava va mahako zilo za kubiha va ta loviswa yimpini ya Nungungulu ya Har–Magedoni. (Tisimu 37:10) A xigelo xinwani kambe xa ku a kuranza ka Nungungulu ku nga maheki misaveni hi lezaku a mifumo a yi kuci vanhu a ku ku maha. A mifumo yo tala a yi na ntamu, yi na ni tihanyi, hambu kukanganyisa. A Biblia gi wula hi kutiyileko lezaku: “Munwe a fumela munwani a mu yisa khombyeni.” — Mutshawuteli 8:9.

21. Xana a Mufumo wu ta maha lezaku a kuranza ka Nungungulu ku maheka misaveni hi ndlela muni?

²¹ Anzhako ka Har–Magedoni, a vanhu va ta fumelwa hi mufumo munwe ntsena, a Mufumo wa Nungungulu. A Mufumo lowo wu ta maha kuranza ka Nungungulu wu tlhela wu neha makatekwa yo tsakisa. Hi xikombiso, wona wu ta susa Satani ni madimoni yakwe. (Kuvululelwa 20:1-3) Ku ta tiriswa a lisima la muphahlo wa Jesu kasi ku maha lezaku a vanhu vo tsumbeka va  nga ha babyi ni kufa. Hakunene, a xikhati lexi va to fumelwa hi Mufumo va ta zi kota ku hanya kala kupinzuka. (Kuvululelwa 22:1-3) A misava yi ta mahiwa paradise. Zonake a Mufumo wu ta maha lezaku a kuranza ka Nungungulu ku mahiwa misaveni wu tlhela wu basisa a vito ga Nungungulu. Xana lezo zi wula yini? Zi wula ku ngalo hi magumo a vanhu vontlhe lava va to hanya kufumeni ka Mufumo wa Nungungulu va ta dzunza a vito ga Jehova.

22. Hi zi tivisa kuyini lezaku a Mufumo wa Nungungulu a wu tangi xikhatini lexi Jesu a nga hi misaveni kutani ka xikhatanyana nzhako ka kuvuxiwa kakwe hi ka vafileko?

²² A xikhati lexi Jesu a nga byela valanzeli vakwe lezaku va khongela ku ngalo, “A wute mufumo wa wena,” zi wa te dlunya lezaku a Mufumo wu wa nga seta xikhatini lexo. Xana wu tile a xikhati lexi Jesu a nga tlakukela tilweni? Ahihi, hakuva Pedro na Paule va wulile lezaku anzhako ka kuvuka ka Jesu hi ka vafileko, a xiprofeto xi nga ka bhuku ga Tisimu 110:1 xi tatisekile ka yena: “Jehova i te ngalo ka hosi ya mina: Tshama hi le reveni ga mina ga xinene, kala nzi veka a valala va wena a kuva xikegetelo xa mikonzo ya wena.” (Mitiro 2:32-34; Maheberu 10:12, 13) Ku wa hi ni xikhati xa kurinzela.

23. (a) Xana a Mufumo wa Nungungulu wu sangulile rini a ku fuma? (b) Zini lezi hi to wulawula hi zona ka xipimo lexi xi lanzelako?

²³ Ku wa tava xikhati xo kota kwihi? Nzeni ka zana ga wu 19 ga malembe, a zigonzani zo tsumbeka za Biblia zi lo hlayela lezaku  a xikhati xa kurinzela xi wa ta mbhela hi 1914. (Xungetano hi lembe lego, wona a Xiengetelo lomu ka maphajina 215-18.) A zimaho za misava lezi zi sangulileko hi 1914 zi tiyisa lezaku a kuhlayela loko ka zigonzani lezo zo tsumbeka za Biblia ku wa hi ka lisine. A kutatiseka ka ziprofeto za Biblia ku komba lezaku hi 1914, Kristu i lo maha Hosi niku a Mufumo wa Nungungulu wa le tilweni wu lo sangula ku fuma. Hikwalaho, hi hanya ka ‘xikhati xi tsongwanyani’ lexi xi saleleko Satani. (Kuvululelwa 12:12; Tisimu 110:2) Ha zi kotawu a ku wula hi kutiya ku ngalo lokuloku, a Mufumo wa Nungungulu wu ta maha lezaku a kuranza ka Nungungulu ku mahiwa misaveni. Xana lezo wa zi wona na zi hi mahungu yo tsakisa? Wa kholwa a ku lezo lisine? A xipimo lexi xi lanzelako xi ta ku vuna a ku wona lezaku a Biblia hakunene gi gonzisa zilo lezo.