1. Zini lezi hi to zi bhinzula loku hi khozela Nungungulu hi ndlela leyi yi faneleko?

JEHOVA NUNGUNGULU wa hi khatalela nguvu niku i lava lezaku hi vuneka hi kongomiso wakwe wa liranzo. Loku hi mu khozela hi ndlela leyi yi faneleko, hi tava ni kutsaka hi tlhela hi potsa zikarato zinyingi wutomini. Yena i ta hi katekisa a tlhela a hi vuna. (Isaya 48:17) Kanilezi, ku na ni mazanazana ya tixaka ta wukhongeli leti ti wulako lezaku ti gonzisa lisine xungetano hi Nungungulu. Hambulezo, tona ti hambana nguvu hi tlhelo ga lezi ti zi gonzisako xungetano hi ku himani Nungungulu ni lezi yena a zi lavako ka hina.

2. U nga yi tivisa kuyini a ndlela yi faneleko ya ku khozela Jehova, niku hi wihi a mufananiso wu hi vunako a ku zwisisa lezo?

² U nga yi tivisa kuyini a ndlela yi faneleko ya ku khozela Jehova? U nga ta yi tiva hi ku gonza ni ku ringanisa a tigonzo ta wukhongeli gontlhe. Wena u fanele ku gonza ntsena lezi hakunene a Biblia gi zi gonzisako xungetano hi wukhozeli ga lisine. Kasi ku fananisa: Matikweni manyingi, ku na ni xikarato xa mali ya mawunwa. Loku ku wo khwatsi wo nyikiwa ntiro wa ku pola a mali ya mawunwa, u wa ta yi pola? U wa ta alakanyela tixaka tontlhe ta mali ya mawunwa? Ahihi. A xikhati xa wena xi wa ta bhinzula loku u wo gonza a mali ya lisine. Anzhako ka kuva u tivile lezi a mali ya lisine yi nga tshamisa zona, u ta zi kotawu ku  pola leyi ya mawunwa. Hi kufanana, loku hi gonza a ndlela ya ku pola wukhongeli ga lisine, ha zi kotawu ku pola a wukhongeli legi gi nga ga mawunwa.

3. Maringano ni lezi Jesu a zi wulileko, zini hi faneleko ku maha kasi ku amukeleka ka Nungungulu?

³ Za lisima a ku hi khozela Jehova hi ndlela leyi a yi amukelako. A vanhu vo tala va kholwa lezaku a tixaka tontlhe ta wukhongeli ta tsakisa Nungungulu, kanilezi a Biblia a gi gonzisi lezo. Ahandle ka lezo, a zi eneli a ku munhu a ti wula muKristu ntsena. Jesu i te ngalo: “A hi vona vontlhelele lava va nge ngalo ka mina: Hosi, Hosi, va ta nga enghena mufunweni wa tilo; kanilezi sine loyi a mahako a kuranza ka Dadani wa mina loyi a nga le tilweni.” Hikwalaho, kasi ku amukeleka ka Nungungulu, hi fanele ku gonza lezi Nungungulu a zi lavako ka hina hi tlhela hi zi maha. Jesu i vitanile lava va nga mahiko kuranza ka Nungungulu kota “vaonhi.” (Mateu 7:21-23) A ku fana ni mali ya mawunwa, a wukhongeli ga mawunwa a gi vuni nchumu. Hi lisine, a wukhongeli lego i mhango.

4. Xana hi wihi a tlhamuselo wa magezu ya Jesu xungetano hi tindlela timbiri, niku yiya kwihi a yinwe ni yinwani ya tona?

⁴ Jehova i nyika vanhu vontlhe misaveni a lungelo go kuma wutomi ga pinzukelwa. Hambulezo, kasi ku kuma wutomi ga pinzukelwa Paradiseni, hi fanele ku khozela Nungungulu hi kufaneleko hi tlhela hi hanya hi ndlela leyi yi vumelekako ka yena. Lexi xi nga tsakisiko hi lezaku vo tala va ala ku maha lezo. Hikwalaho Jesu i te ngalo: “Enghenani hi nyangwa yo hlongana; hakuva a nyangwa yi yako kulobyisweni yi anamile, ni ndlela yi komamako kona yi kulile; mbanyingi va fambako ha yona. Kanilezi a nyangwa ya wutomi yi hlonganile, ni ndlela yi yako kona yi khumile, mbatsongwani lava va yi kumako.” (Mateu 7:13, 14) A wukhongeli ga lisine gi yisa wutomini ga pinzukelwa. A wukhongeli ga mawunwa gi yisa kulobyisweni. Jehova a nga ranzi lezaku ku lova ni munwe, hi lezo zi mu mahako a nyika vanhu va matshamu wontlhe a lungelo ga ku gonza ha yena. (2 Pedro 3:9) Hikwalaho, a ndlela leyi hi khozelako ha yona Nungungulu yi nga hi yisa wutomini kutani kufeni.

5. Xana hi nga va tivisa kuyini lava va nga wukhongelini ga lisine?

⁵ Xana yi nga kumiswa kuyini a ‘ndlela yi komamako wutomini’? Jesu i wulile lezaku a wukhongeli ga lisine gi ta ti komba hi mahanyela ya lava va nga ka gona. Yena i te ngalo: “Mu ta va tiva hi mihanzu yabye. . . . Tisinya tontlhe to saseka ti pswala mihanzu yo nanziha.” (Mateu 7:16, 17) Hi magezu manwani, lava va nga wukhongelini ga lisine va wa ta tiveka hi lezi va zi kholwako ni mahanyela yabye. Hambulezi va nga mbhelelangiko ni lezi va hoxisako, a vakhozeli va lisine kota ntlawa va hlota ku maha a kuranza ka Nungungulu. A hi woneni zikombekiso za ntlhanu ni xinwe lezi zi tivekisako lava va nga wukhongelini ga lisine.

6, 7. Xana a malanza ya Nungungulu ma gi wonisa kuyini a Biblia, niku xana Jesu i nyikisile kuyini xikombiso mhakeni leyo?

⁶ A malanza ya Nungungulu ma seketela a tigonzo ta wona lomu ka Biblia. A Biblia ha goce gi ngalo: “Yontlhelele mitsalo yi pimisilweko vanhu hi Nungungulu ya vuna kugonziseni, ni kukawukeni, ni kululekeni, ni kulayeni hi za kululama; kasi a munhu wa Nungungulu a fela ku mbhelela, na a longiselelwe a mitiro yontlhe yo saseka.” (2 Timote 3:16, 17) Na a tsalela maKristu-kulobye, Paule i te ngalo: “Laha mu nga amukela a mhaka ya Nungungulu, leyi mu nga yi kuma ka hina, a mu yi amukelangi khwatsi i mhaka ya vanhu, kanilezi mu lo amukela a mhaka ya Nungungulu kota lezi yi nga yona.” (1 Va Le Tesalonika 2:13) Hikwalaho, lezi a wukhongeli ga lisine gi zi kholwako ni mitiro ya gona a zi seketelwi ka mawonela kutani mikhuwo ya vanhu. Zona zi seketelwa Mhakeni yi pimisilweko ya Nungungulu, a Biblia.

⁷ Jesu Kristu i nyikile xikombiso xi faneleko hi ku seketela a tigonzo takwe Mhakeni ya Nungungulu. Na a khongela ka Dadani wakwe wa le tilweni, i te ngalo: “A mhaka ya wena zinene.” (Johani 17:17) Jesu i wa kholwa ka Mhaka ya Nungungulu, niku zontlhe lezi a gonzisileko zi wa zwanana ni Mitsalo. Hi zikhati zo tala Jesu i te ngalo: “Ku tsalilwe.” (Mateu 4:4, 7, 10) Hi ku wula lezo Jesu i wa tshaha mutsalo. Hi kufanana, a vanhu va Nungungulu inyamutlha a va gonzisi a maalakanyo ya vona venyi. Vona va kholwa lezaku a Biblia i Mhaka ya Nungungulu, niku va seketela nguvu a tigonzo tabye ka lezi gi zi wulako.

8. Xana a ku khozela Jehova zi patsa yini?

 ⁸ Lava va nga wukhongelini ga lisine va khozela Jehova yece va tlhela va tivisa a vito gakwe. Jesu i te ngalo: “Wena u ta khozela Hosi [“Jehova,” NM] Nungungulu wa wena, hi yena yece u to mu tirela.” (Mateu 4:10) Hikwalaho, a malanza ya Nungungulu ma khozela Jehova yece. A wukhozeli lego gi patsa a ku tivisa vanhu a vito ni matshamela ya Nungungulu wa lisine. A bhuku ga Tisimu 83:18 gi ngalo: “Hi wena wece u nga ni vito ga Jehova, loyi a Hunzeleleko Kutlakuka misaveni yontlhe.” Jesu i vekile xikombiso hi tlhelo ga ku vuna vanwani a ku tiva Nungungulu, kota lezi a wulileko lomu ka mukhongelo: “Nzi wonekelisile a vito ga wena ka vanhu lava u va tekileko tikweni u nzi nyika vona.” (Johani 17:6) Hi ndlela yo fana, a vakhozeli va lisine inyamutlha va gonzisa vanwani xungetano hi vito ga Nungungulu, makhungo yakwe, ni matshamela yakwe.

9, 10. Xana a maKristu ya lisine ma kombisana liranzo hi tindlela tihi?

⁹ A vanhu va Nungungulu va ranzana hi liranzo lo mbhelela. Jesu i te ngalo: “Loku mu ranzana, a vanhu vontlhe va ta zi tiva lezaku mu vapizani va mina.” (Johani 13:35) A maKristu ya zana go sangula ga malembe ma wa ranzana hi ndlela leyo. A liranzo li seketelwako lomu ka Biblia li hlula lezi zi hambanyisako vanhu hi tixaka, wuhlengeli, ni matiko li tlhela li va tlhanganyisa hi xiboho xa wumakabye ga lisine. (Va Le Kolosi 3:14) A ziro za wukhongeli ga mawunwa a zi nago a wumakabye go ranzana a ku fana ni lego. Hi zi tivisa kuyini? Hi lezaku za dayana lomu kulwisaneni ka matiko ni tixaka. A maKristu ya lisine a ma khomi zibhamu ma daya vamakabye va wona va maKristu ge hambu ku daya vanhu vanwani. A Biblia gi ngalo: “Hi xwalexo xi kombisako lava va nga vana va Nungungulu ni lava va nga vana va Satani: kani hi wihi loyi a nga mahiko lezi zi lulamileko a hi wa Nungungulu, ge ni loyi a nga ranziko makabye wakwe. Hakuva a mhaka leyi mu yi zwileko hi le kusanguleni hi leyi, lezaku hi ranzana; hi nga koti Kana, loyi a nga hi n’wana wa loyi wa kubiha, a daya nakulobye.” — 1 Johani 3:10-12; 4:20, 21.

¹⁰ Hakunene, a kuva ni liranzo lo mbhelela ku patsa zinwani ahandle ka ku tsika ku daya vanwani. Hi ku zi ranza, a maKristu ya lisine ma tirisa a xikhati xa wona, a ntamu, ni titshomba lezaku  ma vunana ni ku tiyisana. (Maheberu 10:24, 25) Wona ma vunana zikhatini za zikarato, niku ma khatalelana hi kutsumbeka. Hi lisine, ma tirisa wutomini gabye a wusungukati ga Biblia ga ku ‘tira lezi zi nene ka vanhu vontlhe.’ — Va Le Galatia 6:10.

11. Hikuyini zi nga za lisima a kuva hi vumela Jesu Kristu kota loyi Nungungulu a mu tirisako lezaku a hi hanyisa?

¹¹ A maKristu ya lisine ma vumela Jesu Kristu kota loyi Nungungulu a mu tirisako lezaku a hi hanyisa. A Biblia gi ngalo: “A ku kona kuhanyiswa hi ka munwani; hakuva a ku na vito ginwani lahasi ka tilo, legi gi nyikilweko xikari ka vanhu, legi hi nga hanyiswako ha gona.” (Mitiro 4:12) Kota lezi hi zi wonileko lomu ka Xipimo 5, Jesu i nyikele wutomi gakwe kota nzhiho wa ku tirula vanhu lava va ingisako. (Mateu 20:28) A ku hunza lezo, Jesu hi yena a Hosi leyi yi yimisilweko hi Nungungulu Mufunweni wa le tilweni lowu wu to fumela a misava yontlhe. Kasi ku kuma wutomi ga pinzukelwa, Nungungulu i lava lezaku hi ingisa Jesu hi tlhela hi tirisa a tigonzo takwe. Hi kota ya lezo, a Biblia gi ngalo: “Loyi a kholwako ka N’wana i na ni wutomi ga pinzukelwa; kanilezi loyi a nga ingisiko N’wana a nga ta wona wutomi.” — Johani 3:36.

12. Xana a ku nga mahi xipanze xa tiko ku patsa yini?

¹² A vakhozeli va lisine a va mahi xipanze xa tiko. A xikhati lexi Jesu a nga hi kulamulweni mahlweni ka Pilatu, a hosi ya muRoma, i te ngalo: “A mufumo wa mina a hi wa misava.” (Johani 18:36) A ku khataliseki a tiko legi a valanzeli va Jesu va hanyako kona, vona va ti veka hasi ka Mufumo wa le tilweni niku kambe a va ti nghenisi ni kutsongwani timhakeni ta wupolitika ga tiko. Vona a va ngheneleli kulwisana ka wupolitika. Hambulezo, a va ti nghenisi ka lezi vanwani va zi hlawulako xungetano hi ku maha xipanze xa ntlawa wa wupolitika, a ku palisana kasi kuva hosi ya wupolitika, kutani ku hlawula hosi lomu ka hlawula-mani. Hi kuengetela kwalaho ka lezaku a vakhozeli va lisine va Nungungulu a va ti nghenisi timhakeni ta wupolitika, vona va ingisa a milayo ya mufumo. Hikuyini? Hilezaku a Mhaka ya Nungungulu yi va laya a ku “ingisa a mufumo.” (Va Le Roma 13:1) Loku ku hi kona kulwisana xikari ka lezi Nungungulu a zi lavako ni lezi a mafambisela ya wupolitika ma zi lavako, a vakhozeli va lisine va lanzela a xikombiso xa vapostoli, lava va ngaku ngalo: “Hi fanele  ku ingisa Nungungulu ku hunza ku ingisa vanhu.” — Mitiro 5:29; Marku 12:17.

13. Xana a valanzeli va lisine va Jesu va wu wonisa kuyini a Mufumo wa Nungungulu, niku zini lezi va zi mahako hi kota ya mawonela lawo?

¹³ A valanzeli va lisine va Jesu va xumayela lezaku a Mufumo wa Nungungulu hi wona woce wu nga kutsumba ka vanhu. Jesu i wulile lezi na ka ha hi mahlweni: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe;  hi kona ku ta nga chikela a kugumesa.” (Mateu 24:14) A valanzeli va lisine va Jesu Kristu va kanela a Mufumo wa Nungungulu wa le tilweni kota wona woce wu nga kutsumba ka vanhu. A va kuci vanhu lezaku va cuwukela a tihosi ta misava kota tona ti to va lulamisela a zikarato zabye. (Tisimu 146:3) Jesu i hi gonzisile a ku khongelela a mufumo lowo wo mbhelela a xikhati lexi a ngaku ngalo: “A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.” (Mateu 6:10) A Mhaka ya Nungungulu yi wulile na ka ha hi mahlweni lezaku a Mufumo wa le tilweni “wu ta panza wu lovisa yontlhe mifumo leyi [yi nga kona zalezi], wona wu ku tsonzoma kala kupinzuka.” — Danieli 2:44.

14. Hi wihi a ntlawa wa wukhongeli lowu u alakanyako lezaku wa tatisa a zilaveko za wukhozeli ga lisine?

¹⁴ Xiseketelweni xa lezi hi zi wonileko, ti wutise: ‘Hi wihi a ntlawa wa wukhongeli lowu wu seketelako a tigonzo tontlhe ta wona lomu ka Biblia wu tlhela wu tivisa a vito ga Jehova? Hi wihi ntlawa lowu wu kombisako a liranzo hi ndlela leyi Jehova a hi gonzisako ha yona? Wu kholwako ka Jesu? Wu nga mahiko xipanze xa tiko? Wu kanelako lezaku a mufumo wa Nungungulu hi wona woce wu nga kutsumba ka lisine ka vanhu? A ka mitlawa yontlhe ya wukhongeli misaveni, hi wihi lowu wu tatisako zilaveko lezo?’ Za ti komba zi ku dlunya lezaku a Timboni ta Jehova hi tona ti mahako lezo. — Isaya 43:10-12.

15. Zini kambe lezi Nungungulu a zi lavako zo hunza a ku kholwa ntsena lezaku yena i kona?

¹⁵ A zi eneli a ku kholwa ka Nungungulu ntsena kasi ku hi mu tsakisa. Hi lisine, a Biblia gi ngalo hambu madimoni ma kholwawu lezaku Nungungulu i kona. (Jakobe 2:19) Hambulezo, zi te dlunya lezaku wona a ma mahi kuranza ka Nungungulu ni lezaku a ma amukeleki mahlweni kakwe. Kasi ku amukeleka mahlweni ka Nungungulu, a hi fanelangi ku kholwa ntsena lezaku i kona kanilezi hi fanele ku maha a kuranza kakwe kambe. Hi fanelewo a ku ti hambanyisa ni wukhongeli ga mawunwa hi khomelela a wukhozeli ga lisine.

16. Zini hi faneleko ku zi maha xungetano hi ku maha xipanze xa wukhongeli ga mawunwa?

 ¹⁶ Mupostoli Paule i kombile lezaku hi fanele ku nga mahi xipanze xa wukhozeli ga mawunwa. Yena i tsalile lezi: “Ti hambanyiseni mu huma xikari ka vona, ku wula Hosi; mu nga khumbi a xilo xo nyenyeza, zonake nzi ta mu amukela.” (2 Va Le Korinte 6:17; Isaya 52:11) Hikwalaho a maKristu ya lisine ma potsa zontlhe lezi zi yelanako ni wukhozeli ga mawunwa.

17, 18. Xini “Babuloni wa hombe,” niku hikuyini zi nga za xihatla a ku ‘huma ka yena’?

¹⁷ A Biblia gi komba lezaku a tixaka tontlhe ta wukhongeli ga mawunwa ti maha xipanze xa “Babuloni wa hombe.” * (Kuvululelwa 17:5) A vito lego gi hi alakanyisa a doropa ga Babuloni wa kale, lomu gi nga tumbulukela kona a wukhongeli ga mawunwa anzhako ka Ntalo wa le masikwini ya Noa. A tigonzo to tala ni mitiro leyi zalezi yi tolovelekileko lomu wukhongelini ga mawunwa zi tumbulukile kale nguvu le Babuloni. Hi xikombiso, a vaBabuloni va wa khozela vanungungulu va vanharu-munwe. Inyamutlha, a tshinya ga tigonzo ta xikholwa ta wukhongeli ginyingi i Vanharu-munwe. Kanilezi a Biblia gi gonzisa laha kubaseni lezaku ku na ni Nungungulu munwe ntsena wa lisine, Jehova, niku Jesu Kristu i N’wana wakwe. (Johani 17:3) A vaBabuloni va wa kholwawu lezaku a vanhu va na ni muhefemulo wu nga fiko lowu wu ponako a xikhati lexi a miri wu fako niku a muhefemulo lowo kambe wa zi kota ku xaniseka wutshanwini ga xanisa. Inyamutlha, a mhaka ya ku a muhefemulo a wufi niku wona wa zi kota ku ya xaniseka nzilweni lowu wu nga timekiko ya gonzisiwa lomu ka tixaka tinyingi ta wukhongeli.

¹⁸ Kota lezi a wukhozeli ga le Babuloni wa kale gi hangalakileko misaveni yontlhe, a Babuloni wa Hombe wa masiku ya hina wa fanelwa hi ku woniwa kota mufumo wa misava yontlhe wa wukhongeli ga mawunwa. Niku Nungungulu i wulile na ka ha hi mahlweni lezaku a mufumo lowu wa wukhongeli ga mawunwa wu ta loviswa hi xitshuketi. (Kuvululelwa 18:8) Wa zi wona a ku  hikuyini u faneleko ku ti hambanyisa ni matlhelo wontlhe ya Babuloni wa Hombe? Jehova Nungungulu i lava lezaku u ‘huma ka yena’ hi kuhatlisa na xa ha hi kona xikhati. — Kuvululelwa 18:4.

19. Zini u to zi bhinzula hi ku tirela Jehova?

¹⁹ Hi kota ya xiboho xa wena xa ku tsika a wukhongeli ga mawunwa, za koteka a ku vo kari va hlawula a ku hambana wunghana na wena. Hambulezo, loku u tirela Jehova na u hi zinwe ni vanhu vakwe, u ta bhinzula nguvu a ku hunza zontlhe lezi u to zi luza. A ku fana ni vapizani va Jesu va zana go sangula ga malembe lava va nga tsika zilo zinwani va mu lanzela, hi magumo u ta kuma vamakabye vanyingi va moya. U ta maha xipanze xa ngango wa hombe wa misava yontlhe wa timiliyoni ta maKristu ya lisine, lawa ma kombako liranzo lo mbhelela. Niku u tava ni kutsumba ko tsakisa ka ku kuma wutomi ga pinzukelwa “ka tiko gi tako.” (Marku 10:28-30) Kuzilava hi kufamba ka xikhati, lava va nga hambana na wena hi kota ya lezi u zi kholwako va ta kambisisa lezi a Biblia gi zi gonzisako va tlhela vava vakhozeli va Jehova.

20. Zini lezi a wumanziko gi vekelako lava va nga wukhongelini ga lisine?

²⁰ A Biblia gi gonzisa lezaku lokuloku Nungungulu i ta lovisa a mafambisela lawa yo biha ya zilo a ma valeta hi misava yiswa yi nga ni kululama kufumeni ka Mufumo wakwe. (2 Pedro 3:9, 13) A hi kusaseka ka lezi a misava leyo yi tova zona! Niku kwalomo ka mafambisela lawo ya maswa ma nga ni kululama, ku tava ni wukhongeli ginwe ntsena, ni makhozelela manwe ya lisine. Xana a hi wutlhari a ku wena u lanzela a tindlela ti lavekako lezaku u zi kota kuva ni wuhlengeli ginwe ni vakhozeli va lisine zalezi?