XIGONZO 4
Yena i lo tsakisa papai wakwe zinwe na Jehova
Xitsumbiso muni lexi Jefta a xi mahileko ka Jehova?
Zi wa nga vevuki, kanilezi a n’wana wa Jefta i mahile lezi zi nga tsumbisilwe hi papai wakwe
Xana wa mu wona a nhanyana loyi a nga laha ka xithombe? — I n’wana wa wanuna a vitwako Jefta. A Biblia a gi hi byeli a vito gakwe, kanilezi ha zi tiva lezaku i tsakisile a papai wakwe zinwe na Jehova. A hi gonze hi yena ni papai wakwe Jefta.
Jefta i wa hi wanuna wa mu nene, niku i mbhetile a xikhati xo tala na a gonzisa a n’wana wakwe xungetano hi Jehova. I wa hi wanuna wa ntamu a tlhela a hi murangeli wa mu nene. Hikwalaho, a vaIsraeli va lo mu kombela lezaku a va rangela kulweni ni valala vabye.
Jefta i lo kombela ka Nungungulu lezaku a hlula yimpini. Jefta i lo tsumbisa lezaku loku a hlula, i ta nyikela ka Jehova a munhu wo sangula loyi a to huma hi laha mutini wakwe a mu khinga loku a wuya hi yimpini. A munhu loye i wa ta hanya a tlhela a tira tabernakelini a wutomi gakwe gontlhe. A tabernakeli gi wa hi wutshamu legi a vanhu va ngaya kona xikhatini lexo kasi ku ya khozela Nungungulu. Kunene, Jefta i hlulile yimpini! Xana wa zi tiva lezaku himani a rangileko a huma a mu khinga loku a tlhelile kaya? —
Ina, kuve nhanyana wakwe! Yena i wa hi n’wana wakwe wa munwe, kanilezi i wa fanele ku mu rumela tabernakelini. Lezo zi mu mahile a bayiseka nguvu. Kanilezi, alakanya lezaku Jefta i wa mahile xitsumbiso. Zalezo, a n’wana wakwe i te: ‘Papai, u mahile a xitsumbiso ka Jehova, hikwalaho u fanele ku xi tatisa.’
Wontlhe malembe, a vanghana va n’wana wa Jefta va waya mu vuxela
A nhanyana wa Jefta i wa bayisekile yenawu. Le tabernakelini, yena i wa nga ta chada ge hambu kuva ni vana. Kanilezi yena i wa zi lava nguvu ku tatisa a xitsumbiso xa papai wakwe ni ku tsakisa Jehova. Lezo zi wa hi za lisima nguvu ka yena a ku hunza ku chada kutani kuva ni vana. Hikwalaho, yena i lo siya a ngango wakwe a ya hanya tabernakelini a wutomi gakwe gontlhe.
Xana u alakanya lezaku lezi a zi mahileko zi mu tsakisile papai wakwe zinwe na Jehova? — Ina, zi va tsakisile! Loku wena u ingisa u tlhela u ranza Jehova a ku fana ni n’wana wa Jefta, wenawu u ta tsakisa vapswali wa wena zinwe na Jehova.
