A hi gonze hi jaha legi gi nga ponisa a wutomi ga kokwani wa gona. A kokwani wa jaha legi i wa hi mupostoli Paule. A hi gi tivi a vito ga jaha legi, kanilezi ha zi tiva lezaku gona gi mahile zokari zi nga kombisa kutiya-hlana. Xana wa zi lava kuzwa lezi gi nga maha? — 

Paule i wa hi paxweni le Jerusalema. Yena i wa khomilwe hi lezi a nga xumayela xungetano hi Jesu. A vavanuna vo kari vo biha va wa zonda Paule, hikwalaho vona va lo boha xikungo xo biha. Vona va te: ‘A hi kombeleni a nduna ya masochwa lezaku yi ruma masochwa yakwe ma yisa Paule wuhosini. Hi ta fihlala ndleleni, loku Paule a hunza, hi ta mu daya!’

A zukulu wa Paule i lozwa xikungo lexo. Zini lezi a nga maha? Yena i loya paxweni a ya hlawutela a mhaka leyo ka Paule. Hi kuhatlisa, Paule i lo mu byela lezaku i fanele ku ya hlawutela xikungo lexo xo biha ka nduna ya masochwa. Xana u alakanya lezaku zi wa vevuka ka zukulu wa Paule a ku ya wulawula ni nduna ya masochwa? — Ahihi, hakuva a nduna ya masochwa yi wa hi wanuna wo chaveka. Kanilezi a zukulu wa Paule i wa hi ni kutiya-hlana niku i lo ya wulawula ni nduna ya masochwa.

A nduna ya masochwa yi wa zi tiva khwatsi lezi yi nga fanele ku maha. Yona yi lo rumela a masochwa yo ringana a 500 kasi ku vikela Paule! Yi tlhela yi ma byela lezaku ma heleketa Paule Kesaria ni wusiku. Xana Paule i ponile? — Ina, a vavanuna lavayani vo biha a va zi kotangi ku mu daya! A xikungo xabye xo biha a xi tirangi.

Zini u gonzako ka tlhatlhambutelo lowu? — Wenawu u ngava ni kutiya-hlana a ku fana ni zukulu wa Paule. Hi fanele kuva ni kutiya-hlana loku hi wulawula ni vanwani xungetano hi Jehova. Xana u tava ni kutiya-hlana u tlhela u simama ku wulawula hi Jehova? — Loku u maha lezo, kuzilava u ta ponisa a wutomi ga wokari.