Zini lezi u mahako loku u chava? — Kuzilava u tsutsumela ka mamani kutani papai wa wena kasi ku lava xivuno. Kanilezi ku na ni munhu munwani a zi kotako ku ku vuna. Yena i na ni ntamu wa hombe nguvu ku hunza ni wihi munhu munwani. Wa mu tiva ku hi mani? — Ina, hi Jehova Nungungulu. A hi wulawule hi jaha ga lomu ka Biblia gi vitwako Davida. Yena i wa zi tiva lezaku Jehova i ta mu vuna xikhati xontlhe, hikwalaho i wa nga chavi.

Kusukela loku Davida a ha hi nwanana nguvu, a vapswali vakwe va mu gonzisile ku ranza Jehova. Lezo zi vunile Davida lezaku a nga chavi hambu loku a humelelwa hi zilo zo chavisa. I wa zi tiva lezaku Jehova Munghana wakwe, niku Yena i wa lava ku mu vuna. Ka xikhati xo kari, na Davida a khatalela tiyivu, ku lota nghala ya hombe yi ta khoma yivu hi nomu yi tsutsuma! Xana wa zi tiva lezi Davida a nga maha? Yena i lo lanza a nghala leyo a yi khoma a guma a yi daya hi mandla basi! Ka ginwani siku, Davida i lo tlhela a daya urso na yi lava ku daya a tiyivu takwe! Xana u alakanya lezaku hi mani a nga vuna Davida? — Ina, kuve Jehova.

Kuve ni xikhati xinwani laha Davida a nga kombisa kutiya-hlana ka hombe nguvu. A vaIsraeli va wa kari valwa yimpi ni vanhu va vitwako vaFilistia. A musochwa munwe wa muFilistia i wa lehile nguvu, i wa hi xihotlovila! A vito gakwe ku wa hi Goliate. A xihotlovila lexi xi wa ruka a masochwa ya vaIsraeli na Jehova. Goliate i lo ramba masochwa ya vaIsraeli lezaku ma talwa naye. Kanilezi wontlhe masochwa ya vaIsraeli ma wa chava nguvu kulwa naye. Loku Davida a zi zwile lezo, i lo hlamula Goliate aku: ‘Nzi talwa na wena! Jehova i ta nzi vuna, niku nzi ta ku hlula!’ Xana u alakanya lezaku Davida i wa hi wanuna wo tiya hlana? — Ina, i wa hi ni kutiya-hlana ka hombe nguvu. Xana wa zi lava ku tiva lezi zi nga humelela hi kulanzela?

Davida i lo teka lingoti la wundandi ni ntlhanu wa maribye ya timbokota kasi ku yalwa ni xihotlovila. Loku Goliate a wonile jaha Davida, i lo mu hleka. Kanilezi Davida i lo mu byela lezi: ‘Wena uta ka mina ni supado kanilezi mina nzita ka wena hi vito ga Jehova!’ Anzhako ka lezo yena i lo vekela a ribye laha ka lingoti la wundandi, a tsutsuma a kongoma Goliate, a  guma a gi hoxela kakwe. A ribye gi loba Goliate laha ximombyeni! A xihotlovila xi lowa lahasi, xifa! A vaFilistia va lo chava nguvu, va guma va tsutsuma vontlhe. Xana Davida i zi kotisile kuyini ku hlula xihotlovila? — I lo vuniwa hi Jehova, niku Jehova i vile ni ntamu wa hombe nguvu a ku hunza xihotlovila lexiyani!

Zini lezi u gonzako ka tlhatlhambutelo wa Davida? — Jehova i na ni ntamu wa hombe nguvu a ku hunza ni wihi munhu munwani. Niku yena Munghana wa wena. Hikwalaho loku u tshuka u chava, alakanya lezaku Jehova wa zi kota ku ku vuna lezaku u tiya hlana!