XIGONZO 7
Xana wa tshuka u chava ni kuzwa xiwunza?
Hi nga wona a mufanyana loyi laha ka mufananiso. I wonekisa ku khwatsi i na ni xiwunza niku wa chava, a hi zona? Xana wa tshuka u ti zwisa lezo? — Zikhati zo kari hontlheni ha ti zwisa lezo. A Biblia gi wulawula hi vanghana va Jehova lava vonawu va zwileko xiwunza ni ku chava. A munwe wabye kuve Elija. A hi gonze hi yena.
Jezebeli i wa lava ku daya Elija
Elija i hanyile le Israeli xikhatini xa kale nguvu, Jesu na a nga se pswaliwa. Ahabi, a hosi ya Israeli, i wa nga khozeli a Nungungulu wa lisine, Jehova. Ahabi ni sati wakwe, Jezebeli, va wa khozela Baali, a nungungulu wa mawunwa. Hikwalaho, a vanhu vo tala le Israeli va lo sangula ku khozela Baali. Muzinza Jezebeli i wa bihile nguvu niku i wa lava ku daya vanhu vontlhe lava va nga khozela Jehova, a ku patsa na Elija! Xana wa zi tiva lezi Elija a nga maha? —
Elija i lo tsutsuma! Yena i yile xiwuleni aya fihlala lomu mhakweni. U alakanya lezaku hikuyini a mahileko lezo? — Ina, i wo chava. Kanilezi ku wa nga hi na xigelo xa lezaku Elija a chava. Hikuyini? Hakuva yena i wa zi tiva lezaku Jehova wa zi kota ku mu vuna. Jehova i wa kombisile a ntamu wakwe ka Elija. Ka khati go kari Jehova i hlamulile mukhongelo wa Elija hi ku rumela nzilo hi le tilweni. Hikwalaho, Jehova i wa zi kota ku vuna Elija ni ka khati legi kambe!
Xana Jehova i mu vunisile kuyini Elija?
Na Elija a hi lomu mhakweni, Jehova i lo wulawula naye a tlhela aku: ‘Zini u mahako laha?’ Elija i lo hlamula aku: ‘Hi mina nzoce nzi simamako ku ku khozela. Nzi nzoce, niku nza chava hakuva nzi ta dawa.’ Elija i wa alakanya lezaku vontlhe vakhozeli va Jehova va wa delwe. Kanilezi Jehova i lo byela Elija aku: ‘Ne, lezo a hi lisine. Ku na ni 7.000 wa vanhu lava va ha simamako ku nzi khozela. Tiya hlana. Nzi na ni ntiro wa hombe lowu u faneleko ku wu maha!’ Xana u alakanya lezaku Elija i tsakile hi kuzwa lezo? —
Zini u gonzako ka lezi zi nga humelela Elija? — A wu faneli ku tizwa na u hi ni xiwunza ni ku chava. U na ni vanghana lava va ranzako Jehova na wena. Jehova kambe i na ni ntamu wa hombe nguvu, yena i ta ku vuna xontlhe xikhati! Xana wa tsaka hi ku tiva lezaku hi lisine a wu wece? —
