Xana u tshuka u byeliwa xihundla? —  *A Biblia gi wulawula hi xihundla xo hlawuleka xi vitwako ‘fihlakalo’ wo basa. I fihlakalo wo basa hakuva wuta hi ka Nungungulu. Niku i fihlakalo hakuva a vanhu va wa nga wu tivi. Hambu a tingelosi ti wa lava ku wu tiva khwatsi. Xana wa zi tsakela ku wu tiva a fihlakalo wa kona? — 

Xikhatini xa kale nguvu, Nungungulu i lo vanga wanuna ni wasati vo sangula. A mavito yabye ku wa hi Adamu na Eva. Nungungulu i lo va nyika muti wo saseka nguvu wu nga vitanwa ku i simu ga Edeni. Loku Adamu na Eva va wa no ingisa Nungungulu, vona ni vana vabye na va mahile misava yontlhe yiva paradise a ku fana ni simu lego. Niku na va hanyile Paradiseni kala kupinzuka. Kanilezi, xana wa zi alakanya lezi Adamu na Eva va nga maha? — 

Adamu na Eva a va ingisangi Nungungulu, niku lexo hi xona xigelo xa ku hina hi nga hanyi paradiseni nyamutlha. Kanilezi Nungungulu i wulile lezaku i ta maha misava yontlhe yiva yo saseka, niku a vanhu vontlhe va ta hanya kala kupinzuka na va tsakile. Xana i ta zi mahisa kuyini? Hi xikhati xo leha a vanhu va wa nga zi tivi. Zi wa hi fihlakalo.

Loku Jesu a tile laha misaveni, yena i gonzisile vanhu zilo zo tala xungetano hi fihlakalo lowu. I wulile lezaku a fihlakalo lowu wu wa yelana ni Mufumo wa Nungungulu. Jesu i byelile vanhu lezaku va khongela kasi a Mufumo lowo wuta. Wona wu ta maha misava yontlhe yiva paradise go saseka.

Xana wa tsaka hi ku tiva a fihlakalo lowu? — Alakanya lezaku ntsena lava va ingisako Jehova hi vona va to hanya Paradiseni. A Biblia gi na ni matimu yo tala ya vavanuna ni vavasati va ingisileko Jehova. Xana wa zi tsakela ku ma tiva? — A hi wone lezaku hi vamani vokari va vona hi tlhela hi tiva a ndlela ya ku fana navo.