Ka zikhati zo kari, a vanhu va hi hleka kutani ku hi zangarela loku hi va byela zokari xungetano hi Jehova. Lezo zi nga hi maha hi lava ku tsika ku wulawula hi Nungungulu. Xana u tshuka u ti zwisa lezo? — A Biblia gi wulawula hi mufanyana wo kari loyi a nga ranza Jehova, kanilezi kutsongwani i wa lava ku tsika ku wulawula hi yena. A vito gakwe hi Jeremia. A hi gonze zinwani xungetano hi yena.

A xikhati lexi Jeremia a nga hi jaha, Jehova i lo mu byela lezaku i fanele ku tlharihisa vanhu kasi va tsika a ku maha zo biha. Lezo zi wa binza nguvu ka Jeremia, niku i wa chava. I lo byela Jehova aku: ‘A nzi zi tivi a ku zini nzi to wula. Nzi nwanana.’ Kanilezi Jehova i te ngalo: ‘U nga chavi. Nzi ta ku vuna.’

 Hikwalaho, Jeremia i lo sangula ku tlharihisa vanhu a va byela lezaku loku va nga cici a mahanyela yabye yo biha va ta tsayiswa. Xana u alakanya lezaku a vanhu va mu ingisile Jeremia? — Ahihi. Vona va lo mu hleka va tlhela va mu zangarela. A vokari va zile va lava ku mu daya! Xana u alakanya lezaku i ti zwisile kuyini? — Yena i lo chava a tlhela aku: ‘Nzi nga ta ha wulawula kambe hi Jehova.’ Kanilezi, xana hakunene i zi tsikile? — Ahihi, a nga zi tsikangi. Yena i wa mu ranza nguvu Jehova, hikwalaho a nga tsikangi ku wulawula hi yena. Niku kota lezi Jeremia a nga kala ku tsika ku wulawula hi Nungungulu, Jehova i lo mu vikela.

Hi xikombiso, ka khati go kari a vavanuna vo biha va lo hoxa Jeremia lomu hloweni yo eta yi nga tele hi madhaka. Yena i wa nga hi na zakuga kutani mati. A vavanuna lavo va wa lava ku tsika Jeremia lomo kala afa. Kanilezi hi ku vuniwa hi Jehova, yena i ponile!

Zini u gonzako ka xikombiso xa Jeremia? — Hambu lezi zikhati zo kari a nga chava, yena a nga tsikangi ku wulawula hi Jehova. Loku hi wulawula hi Jehova, a vanhu va nga ha hi hleka kutani ku hi zangarela. Kuzilava u nga hawa tingana kutani ku chava. Kanilezi u nga tshuki u tsika ku wulawula hi Jehova. Yena i ta ku vuna xontlhe xikhati, a ku fana ni lezi a vunileko Jeremia.