XIGONZO 10
Jesu i wa ingisa xontlhe xikhati
Xana xikhati xontlhe za ku vevukela a ku ingisa vapswali va wena? — A zikhati zinwani za karata. Xana u wa zi tiva lezaku Jesu i ingisile Jehova ni vapswali vakwe? — A xikombiso xakwe xi nga ku vuna a ku ingisa vapswali va wena hambu loku lezo zi nga vevuki. A hi gonze zinwani xungetano hi zona.
Na Jesu a nga seta laha misaveni, yena i wa hi zinwe ni Papai wakwe, Jehova, le tilweni. Kanilezi yena i vile ni vapswali kambe laha misaveni. A mavito yabye ku wa hi Josefa na Maria. Xana wa zi tiva lezi zi nga maheka a kuza vona vava vapswali vakwe? —
Jehova i lo susa a wutomi ga Jesu le tilweni a gi chela rumbyini ga Maria lezaku Jesu a pswaliwa a tlhela a hanya laha misaveni. Lezo zive xihlamaliso! Jesu i lo kula lomu rumbyini ga Maria a ku fana ni lezi a vanana vanwani va kulisako zona marumbyini ya vamamani vabye. Anzhako ka 9 wa tihweti, Jesu i lo pswaliwa. Zi mahisile lezo a kuza Maria ni nuna wakwe, Josefa, vava vapswali va Jesu laha misaveni.
A xikhati lexi Jesu a nga hi ni 12 wa malembe basi, yena i mahile zokari zi kombileko a liranzo leli a nga hi nalo hi Papai wakwe, Jehova. Lezo zi humelele a xikhati lexi Jesu ni va ngango wakwe va nga enza vaya kule kasi ku yaga Pasika le Jerusalema. Na va tlhela kaya, Josefa na Maria va no wona lezaku Jesu a nga kona. Xana wa zi tiva lezaku i wa hi kwihi? —
Hikuyini Jesu a nga hi lomu tempeleni?
Josefa na Maria va no hatlisa va tlhela Jerusalema va ya lavetela Jesu matshanwini wontlhe. Vona va wa karatekile nguvu hakuva va wa nga mu kumi. Kanilezi anzhako ka masiku manharu, va lo mu kuma lomu tempeleni! Xana wa zi tiva ku hikuyini Jesu a nga hi lomu tempeleni? — Hi lezaku seyo yena i wa zi kota ku gonza hi Papai wakwe, Jehova. Yena i wa ranza Jehova niku i wa lava ku gonza ndlela yo mu tsakisa. Hambu loku a kulile a maha wanuna wa hombe, Jesu i wa ingisa Jehova zikhati zontlhe. Jesu i wa ingisa hambu loku zi karata niku lezo zi wula ku i wa xaniseka hi zona. Xana Jesu i wa tlhela a ingisa Josefa na Maria? — Ina, a Biblia gi le i wa va ingisa.
Zini u gonzako ka xikombiso xa Jesu? — U fanele ku ingisa vapswali va wena, hambu loku zi karata. Xana u ta maha lezo? —
