Xana u alakanya lezaku za karata ku maha za zi nene? — A vanhu vo tala va alakanya lezo. A Biblia gi hi byela lezaku a ku maha za zi nene zi wa karatela nguvu a jaha gi vitwako Josia. Kanilezi yena i wa hi ni vanghana va va nene lava va mu vunileko. A hi gonze zinwani xungetano hi Josia ni vanghana vakwe.

A papai wa Josia i wa hi Amoni, a hosi ya le Juda. Amoni i wa bihile nguvu niku i wa khozela a zifananiso. Loku a papai wa Josia a file, Josia i lova hosi ya Juda. Kanilezi yena i wa hi ni 8 wa malembe basi! Xana u alakanya lezaku i wa bihile a ku fana ni papai wakwe? — Ahihi, i wa nga tshamisangi lezo!

Hambu lezi a nga hi nwanana, Josia i wa lava ku tsakisa Jehova. Hikwalaho yena i lo hlawula kuva munghana basi wa vanhu lava va nga ranza Jehova. Niku vona va vunile Josia a ku maha za zi nene. Va wa hi vamani a vokari va vanghana va Josia?

A munwe wabye i wa hi Zefania. Zefania ive muprofeti loyi a tlharihisileko vanhu lezaku loku va khozela zifananiso va  wa ta humelelwa hi zilo zo biha. Josia i ingisile Zefania a tlhela a khozela Jehova, na ku nga hi zifananiso.

A munwani munghana wa Josia kuve Jeremia. Vona va wa hi va tanga yinwe, niku a miti yabye yi wa gamekene a xikhati lexi va nga ha kula. Vona va wa hi vanghana va hombe laha ka kuza loku Josia a file, Jeremia a tsala lisimu lo hlawuleka xungetano hi lezi a nga mu xuvisa zona Josia. Jeremia na Josia va vunanile ku maha za zi nene, ni ku ingisa Jehova.

Zini u gonzako ka xikombiso xa Josia? — Hambu lezi a nga hi mufanyana nguvu, yena i wa lava ku maha za zi nene. Yena i wa zi tiva lezaku i wa fanele kuva munghana wa vanhu lava va ranzako Jehova. Ti karatele ku hlawula vanghana lava va ranzako Jehova, ni lava va to ku vuna ku maha za zi nene!