Rebeka i wa hi wasati a nga ranza Jehova. A nuna wakwe i wa hi Isaka. Yenawu i wa ranza Jehova. Xana Rebeka i mu tivisile kuyini Isaka? I zi kombisile kuyini Rebeka lezaku i lava ku tsakisa Jehova? A hi gonze zinwani hi yena.

A vapswali va Isaka va wa hi Abrahama na Sara. Vona va wa hanya tikweni ga Kanani, a vanhu va kona va wa nga khozeli Jehova. Kanilezi, Abrahama i wa lava lezaku a n’wana wakwe a chada ni wasati loyi a nga khozela Jehova. Hikwalaho, yena i lo rumela xitiri xakwe lezaku xi ya tekela Isaka a sati le tikweni ga Harani, lomu ku nga tshama maxaka ya Abrahama. Kuzilava a xitiri lexo kuve Eliezare.

Eliezare i fambile ni zitiri zinwani za Abrahama. Ku wa hi kule nguvu. Va lo teka khume ga makameli ma nga rwele zakuga ni zinyikiwo. Xana Eliezare i zi kotisile kuyini ku mu hlawulela sati wa mu nene Isaka? Loku Eliezare ni zitiri zinwani va chikele Harani, vona va lo nyima le hloweni hakuva Eliazare i wa zi tiva lezaku ku wa tata vanhu va takha mati. Yena i lo khongela ka Jehova aku: ‘Loku a nhwana loyi nzi to mu kombela mati a vumela ku nyika mina ni makameli ya mina kambe, makunu nzi ta zi tiva lezaku hi yena wasati loyi u nga mu hlawula.’

 Ka xikhatanyana lexo, a nhwana Rebeka i lota hloweni. A Biblia gi ngalo yena i wa sasekile nguvu. Eliezare i lo mu kombela mati ya kunwa, Rebeka i lo mu hlamula aku: ‘Eyo. Nzi ta ku nyika, nzi ta khela ni makameli ya wena kambe.’ Hi nga zi alakanyela! A makameli ya kuzwa tora manwa mati ya talela ga cima, hikwalaho Rebeka i lo phindaphinda kukha mati lomu hloweni. Xana wa zi wona lezi a tirisako zona laha ka xithombe kasi ku khelela mati? — Eliezare i tsakile nguvu hi lezi Jehova a nga hlamula mukhongelo wakwe.

Eliezare i nyikile Rebeka a zinyikiwo zo tala ni zo saseka. Rebeka i lo ramba Eliezare ni zinwani zitiri lezaku vaya kaya kakwe. Eliezare i lo tlhamusela a xigelo xa kuva Abrahama a mu rumele seyo ni lezi Jehova a nga hlamulisa zona a mukhongelo wakwe. A maxaka ya Rebeka ma lo tsaka, ma tlhela ma mu vumelela ku chada na Isaka.

Kanilezi, xana u alakanya lezaku Rebeka i wa zi lava ku chada na Isaka? — Rebeka i wa zi tiva lezaku hi Jehova a nga rumile Eliezare. Hikwalaho, a xikhati lexi a maxaka ya Rebeka ma nga mu wutisa lezaku xana wa zi lava ku famba Kanani kasi ku ya chada na Isaka, yena i lo hlamula aku, ‘Ina, nza zi lava.’ Zalezo, yena i lo famba na Eliezare. Loku va chikele Kanani, Rebeka i lo chada na Isaka.

Kota lezi Rebeka a nga maha lezi Jehova a nga zi lava, Jehova i mu katekisile. Loku ku hunzile malembe yo tala, Jesu i pswalilwe ngangweni wakwe! Loku wena u fana na Rebeka u tlhela u tsakisa Jehova, yena i ta ku katekisa na wenawu.