Adamu na Eva va lo pswala vana, anzhako ka lezo a vanhu va lo tala laha misaveni. Hi kufamba ka xikhati, a tingelosi to kari ti lo hluwuka ti ti patsa na Satani.

Ti lota misaveni ti ta ti mahela mimiri ya vavanuna kasi ti tekana ni vavasati. A vavasati lavo va lo pswala vana vo leha nguvu, va tihanyi ni va ntamu.

A misava yi lo tala hi vanhu va nga maha kubiha. A Biblia gi ngalo: ‘A kuonha ka vanhu ku kulile laha misaveni, ni mixuvo ya timbilu tabye yi wa bihile masiku wontlhe.’

Noa i wa hi munhu wa mu nene. Jehova i lo tivisa Noa lezaku i wa lava ku lovisa vanhu vo biha hi ntalo wa hombe.

Nungungulu i lo engeta a byela Noa lezaku a aka a ngalava ya hombe, yi vitaniwako taru, a tlhela a nghena ka yona zinwe ni ngango wakwe ni tixaka tontlhe ta zihari.

Noa i lo tivisa vanhu xungetano hi Ntalo, kanilezi a va ingisangi. A vokari va lo hleka Noa; a vanwani va lo mu venga.

A xikhati lexi a nga mbheta ku aka a taru, Noa i lo tisa zihari nzeni ka gona.