Ka siku go gumesa ga Mubuzo wa Mixaxa — gi nga siku ga wu 7 — Jesu i no gondzisa lomu tempeleni, ka wutshamu gi nga vitaniwa ku i “bhako ga minyikelo”. (Johani 8:20; Luka 21:1) Ko khwatsi a wutshamu lego hi legi gi nga vitaniwa ku i Tsendzela wa Vavasati, laha a vanhu va nga mahela kona minyikelo.

Hi masiku ya mubuzo, a wutshamu lego gi wa woningelwa khwatsi hi tikandiya to vhura khwatsi, leti ti nga tlhatekiwa laha ka 4 wa timeza ta tikandiya. A meza yin’we ni yin’wani yi wa hi ni 4 wa tikandiya leti ti nga cheliwa mafura ma tala. A tikandiya leto ti wa vhura laha ka kuza ti woningela wutshamu ga hombe nguvhu. Jesu i no wula zvilo zva ku kuzvilava lava va nga kari va mu ingisela va alakanyile tikandiya leto. I te: “Mina ndzi kuwonekela ka tiko. Loyi a ndzi landzelako a nga ta ha famba munyameni; kanilezvi i tava ni kuwonekela ka wutomi.” — Johani 8:12.

A vaFarisi va no monya lezvi Jesu a nga wula, va tlhela vaku: “U ti mahela wukustumunyu wena n’winyi; a wukustumunyu ga wena a hi . . . [lisine].” Jesu i no va hlamula aku: “Hambu loku ndzi ti mahela wukustumunyu mina n’winyi, a wukustumunyu ga mina . . . [lisine]; hakuva ndza ku tiva laha ndzi humako kona, ni laha ndzi yako kona; kanilezvi n’wina a mu ku tivi laha ndzi humako kona, ni laha ndzi yako kona.” A engeta aku: “Lomu Nayweni wa n’wina ku tsalilwe ku ngalo: A wukustumunyu ga vanhu vambiri . . . [lisine]. Mina loyi ndzi ti mahelako wukustumunyu ndzi mun’we, . . . [na Papayi] loyi a ndzi rumileko wa ndzi mahela wukustumunyu na yenawu.” — Johani 8:13-18.

A vaFarisi va no kaneta lezvi Jesu a nga tlhamusela, hi ku mu wutisa vaku: ‘I kwihi a Papayi wa wena?’ Jesu i no va hlamula na a nga djikadjiki aku: ‘Mina a mu ndzi tivi, hambu ni ku tiva . . . [Papayi] wa mina. Loku mu wa ndzi tiva mina, na mu tiva na . . . [Papayi].’ (Johani 8:19) Hambu lezvi a vaFarisi va nga ha lava ku Jesu a khon’wa, i hava a nga tiya ku mu henya.

 Jesu i no phinda lezvi a nga wulile, aku: “Mina ndza famba, zvonake mu ta ndzi lava, kanilezvi mu ta fela kuwonheni ka n’wina; ni laha ndzi yako kona, a mu zvi koti kuta.” Lezvi Jesu a nga wula ne ku keti a zvi mahangi lomu ka mapimo ya vaJudha, va se sangula ku ti wutisa lezvi: O lava ku ti daya ke, lezvi a nge: “Laha ndzi yako kona, a mu zvi koti kuta?” A va zvi zwisisangi hakuva va wa nga ku tivi lomu Jesu a nga tumbulukela kona. I no va tlhamusela aku: “N’wina mu huma hi lahasi, mina ndzi huma hi le hehla; n’wina mu va misava, mina a ndzi wa misava leyi.” — Johani 8:21-23.

Jesu i wa wulawula hi wutomi gakwe le tilweni na a nga seta laha misaveni, ni lezvi a nga hi yena Mesiya kutani Kristu, loyi a varangeli va wukhongeli va nga fanele ku zvi tiva ku hi yena. Hambu lezvi a nga hi yena Mesiya, va no mu wutisa na va mu chepeta vaku: “Hi wena mani?” — Johani 8:25.

Kota lezvi va nga kari va mu kaneta va tlhela va mu vhukela, Jesu i no va hlamula aku: “Kona ndzi buvhela yini hi ku wulawula na n’wina?” I no guma a wulawula hi Papayi wakwe, kasi ku vhuna vaJudha lezvaku va zvi zwisisa ku hikuyini va nga fanele ku ingisa yena N’wana wa kona. I te: “Loyi a ndzi rumileko wa tsumbeka; ni lezvi ndzi zvi zwileko ka yena, hi zvona lezvi ndzi wulawulako lomu tikweni.” — Johani 8:25, 26, NM.

Jesu i no guma a komba lezvaku i wa mu tsumba Papayi wakwe, loyi a vaJudha lavo va nga kala va nga mu tsumbi. I te: ‘Loku mu tlakusile N’wana wa munhu, zvonake mu ta zvi tiva lezvaku hi mina yena, ni lezvaku a ndzi mahi nchumu ha ndzoce, kanilezvi ndza kanela kota lezvi a ndzi gondzisileko Papayi. Loyi a ndzi rumileko i zvin’we na mina, a nga ndzi siyangi ndzoce; hakuva contlhe cikhati ndzi maha lezvi zvi mu xalalisako.’ — Johani 8:28, 29.

A vaJudha vo kari va no kholwa ka Jesu, a va byela lezvi: “Loku mu simama ku hlayisa a timhaka ta mina, mu vapizani va mina, niku mu ta tiva lisine, ni lisine li ta mu tlhatlhisa.” — Johani 8:31, 32, NM.

A vokari va no hlamala a cikhati Jesu a nga wulawula hi ku va ta tlhatlhiswa. Va se kaneta vaku: “Hina hi pswalo wa Abrahama, cima a hi na ngava tikhumbi ta munhu. Hi yini u wulako wena, uku: Mu ta tlhatlhiswa?” A vaJudha va wa zvi tiva ku va tshukile va hanya kota valuveli; kanilezvi va wa tlula va khoma ni tilo hi ku ala ku byeliwa ku tikhumbi. Hambulezvo, Jesu i no va byela lezvaku va wa ha hi tikhumbi. I te: “Ndza mu byela lisine ndziku: Ni wihi a wonhako i khumbi ya ciwonho.” — Johani 8:33, 34, NM.

Kota lezvi a vaJudha va nga kari va ala ku va wa hi tikhumbi ta ciwonho, Jesu i no va byela lezvi zvi nga wa ta va humelela, aku: “A khumbi a yi tshami laha mutini wa n’winyi wa yona kala kupindzuka, kanilezvi a n’wana i tshama kala kupindzuka.” (Johani 8:35, NM) A citiri a ci avelwi tshomba ya n’winyi wa cona niku ci nga hlongoliwa ni ka cihi cikhati. Kanilezvi a n’wana wo pswaliwa, kutani a nga wa lixaka lelo hi kuya hi nayo, hi yena a lumbako muti lowo “kala kupindzuka” — ku nga masiku wontlhe ya kuhanya kakwe.

Hikwalaho, a lisine xungetano hi N’wana wa Nungungulu hi lona li tlhatlhisako vanhu kala kupindzuka, li va tlhatlhisa ka ciwonho ci yisako kufeni. Jesu i no gumesa aku: “Loku N’wana a mu tlhatlhisa, mu tava mu tlhatlhekile futsi.” — Johani 8:36.