Kwalomo ka 100 wa malembe ma nga hundzile, Antíoco IV (Epifânio), a Hosi ya Siriya, i wa akile a alati ga nungungulu wa mawunwa hehla ka alati gi nga hi lomu tempeleni ya Jehovha. Hi ndzhako ka cikhati, a vana va Matatiyasi, a mupristi wa muJudha, va nolwa va teka Jerusalema zvonake va hendleleta a tempeli ka Jehovha hi khati ga wumbiri. Kusukela cikhatini leco, lembe ni lembe ku wa mahiwa festa hi siku ga 25 ka hweti ya Kislevhi. A hweti leyi yi kotlana ni kumbhela ka Novembro ni kusangula ka Dezembro. Makunu Jesu i noya Jerusalema Festeni leyo ya Kuhendleletwa ka tempeli (kutani, Hanuká).

Ku wa hi nguva ya cirami. Jesu i wa kari a famba lomu ligumba-gumbeni la Solomoni. A vaJudha va no ya mu randzela vaku: “Kasi u ta hi djikadjikisela kala rini? Loku u hi wena Kristu tekela ku hi byela hi zvi tiva.” (Johani 10:22-24, NM) I va hlamulisile kuyini? I te: “Ndzi mu byelile, kanilezvi a mu kholwi”. Jesu i wa nga se va byela hi kukongoma lezvaku hi yena Kristu, khwatsi hi lezvi a nga mu byelisa zvona a wasati wa muSamariya laha hloweni. (Johani 4:25, 26) Hambulezvo, i wa va byelile ku hi yena mani laha a ngaku: “Ndzi wa hi kona Abrahama na a nga se . . . pswaliwa.” — Johani 8:58.

Jesu i wa lava lezvaku a vanhu va zvi wona ha voce a ku hi yena Kristu, hi ku wona lezvi a zvi mahako va zvi fananisa ni lezvi zvi nga phrofetilwe ku Kristu i wa ta zvi maha. Hi ceco ci nga maha ku ka makhati man’wani a byela vapizani vakwe lezvaku va nga byeli munhu a ku hi yena Mesiya. Kanilezvi, i no guma a va byela hi kukongoma a vaJudha lavo va xapi, aku: “A mitiro leyi ndzi yi tirako hi vito ga . . . [Papayi], hi yona yi ndzi mahelako wukustumunyu. Kanilezvi a mu kholwi”. — Johani 10:25, 26.

Hikuyini va nga kala va nga kholwi a ku Jesu hi yena Kristu? I te: “A mu kholwi, hakuva a mu tiyivhu ta mina. A tiyivhu ta mina ta ingisa a gezu ga mina; mina ndza ti tiva, ta ndzi landzela. Ndza ti nyika a wutomi ga pindzukelwa; cima ti nga tafa, ni kambe, a nga kona loyi a ta nga ti wutla canjeni ga mina. . . . [Papayi] loyi a ndzi nyikileko tona, ngwa hombe ku hundza vontlhe”. Jesu i no guma a va komba lezvaku wa zwana nguvhu ni Papayi wakwe, hi ku wula lezvi: “Mina na . . . [Papayi] hi mun’we.” (Johani 10:26-30) Jesu i wa hi laha misaveni, a Papayi wakwe i wa hi le tilweni. Hikwalaho i wa nga wuli lezvaku yena ni Papayi wakwe munhu mun’we. Yena ni Papayi wakwe mun’we hakuva va zwana niku va tira zvin’we kasi ku tatisa kungo gin’we.

Lezvi Jesu a nga wula, zvi va kwatisile nguvhu a vaJudha laha ka kuza va rola maribye va lava ku mu daya. Kanilezvi, Jesu a nga chavangi. I no va wutisa lezvi: “Ndzi mu kombisile a mitiro yinyingi yo saseka ya le ka . . . [Papayi]; hi wihi wa yona mu ndzi gandlako hi kota ya wona ke?” Va no hlamula vaku: “A hi ku gandli hi kota ya ntiro wo saseka, kanilezvi hi kota ya tihlamba; . . . [hi ku] u ti maha Nungungulu.” (Johani 10:31-33) Jesu i wa nga se tshuka a ti byela lezvaku i nungungulu. Makunu, hikuyini va nga mu lumbeta lezvo ke?

Hi mawonela ya vaJudha a ntamu lowu Jesu a ngaku i nawo, hi Nungungulu basi a nga nawo. Hi cikombiso, laha a nga wulawula hi “tiyivhu”, i wulile ku “ndza ti nyika a wutomi ga pindzukelwa”, zvi nga zvilo zva ku a vanhu a va na ntamu wa ku zvi maha. (Johani 10:28) A vaJudha va wo kala va nga cheli kota hi lezvi Jesu a nga va byelile kubaseni aku i nyikilwe ntamu hi Papayi wakwe.

Jesu i no va maha ciwutiso kasi ku komba lezvaku va wo mu lumbeta futsi. I te: “A ku tsaliwangi Nayweni wa n’wina ke, [ka Lisimu 82:6] lezvaku: Ndzi te ngalo, n’wina mu vanungungulu? Loku a va vitanile aku vanungungulu, vona lava a mhaka ya Nungungulu yi nga tile kabye . . . xana mu ndzi byela, mina loyi . . . [Papayi] a ndzi basisileko ni ku ndzi rumela tikweni, muku: Wa rukatela; hi lezvi ndzi nge ngalo: Ndzi N’wana wa Nungungulu ke?” — Johani 10:34-36.

Hi nga wona! Hambu vanhu lava va nga hi valamuli vo kala kululama a Mitsalo yi va vitana ku “vanungungulu”. Kunene, zvi wa nga zwali ne ni kutsongwani a ku va zvi wonisa ku ciwonho lezvi Jesu a ngaku: “Ndzi N’wana wa Nungungulu”. I no guma a wula zvilo zvi nga fanele ku va kholwisa ku a  nga wonhangi. I te: “Loku ndzi nga mahi a mitiro ya . . . [Papayi], mu nga ndzi kholwi; kanilezvi loku ndzi kari ndzi yi maha, hambu loku mu nga kholwi ka mina, kholwani hi mitiro; kasi mu fela ku tiva ni ku vhumela lezvaku . . . [Papayi] i kona ka mina, na mina ka . . . [Papayi].” — Johani 10:37, 38.

A vaJudha va no gumesa va zama ku khoma Jesu. Kanilezvi, ni ka khati lego i no pona kambe. I no guma a suka le Jerusalema, a tsemakanya Congo wa Jordhani aya lomu Johani a nga sangulile ku bhabhatisa vanhu ka cipimo ca 4 wa malembe ma nga hundzile. Ko khwatsi a wutshamu lego gi wa hi kusuhani ni mbhiri ya seno Dzongeni ya Bimbi ga Galileya.

Ku noya vanhu vo tala ka Jesu, va yaku: “Johani a nga mahangi ciwoniso ni cin’we; kanilezvi zvontlhe lezvi Johani a nga wulawula hi loyi munhu” lisine. (Johani 10:41) Hi ndlela leyo, a vaJudha vo tala va no kholwa ka Jesu.